1 TIMUTAUSU 5 - Ha`bari Ndjema ya I Maore

Mashauri yahusu maendreleo moni mwa iDjama Ndziwaminifu

¹ Usulaguliye mangavu ɓaɓa muɗuhazi, ɓadi musariɓiye mauri ɓaɓa, yamashaɓaɓi waume mauri wananya watruɓaɓa,

² watruwashe waɗuhazi mauri wamama, na watruwashe mashaɓaɓi mauri wananya watruwashe, ha uraharifu mukamilifu.

³ Hishimu watruwashe wafiliwa walio amba ha kweli wa weke.

⁴ Neka amba mutrumushe afiliwa ana wana au wajuhu, nawafundrihe raɓuzi ufanya ĩɓada zawo ha wadjamazawo, ike amba shiliv̄wa mbeli za wadzaɗe wawo, mana iyo ɗe imujiv̄iao Mungu.

⁵ Mutrumushe afiliwa wa kweli alio amba aɓaki weke, ahetsi tama yahe ha Mungu, amwesa waye uendrelea ha hadja na mamilio uku na mutsana.

⁶ Ɓadi ule aẽshio hari mwa masterehi, afu wala ukana a hayi.

⁷ Wav̄e maosio yao, ile wasutuhumilwe.

⁸ Neka mutru kasuangalia wadjamazahe, na hususwani wale muraɓani hahe, v̄av̄o av̄a mengo uaminifu, tsena a movu rahana mutru kaamini.

⁹ Mutrumushe afiliwa asuangihwe hari mwa uurdhwa kaɓula ukana maha sitini, ike amba aka mutrumushe wa mutruɓaɓa moja,

¹⁰ narongoleshehe ha zitrendro ndjema zahe, amba alele wana wahe ha uzuri, akokariɓisa, akohosa yimindru ya uwatwaharifu, akosaidi wendza taãɓu, na uendrelea na kula shitrendro ndjema.

¹¹ Ɓadi usukuɓali hari mwa uurdhwa watruwashe wafiliwa waliona maha mishashi, mana neka ngushauku zawo zisuwaɓausa na Kristi, wao utsaha wangiye hari mwa ndrolo;

¹² na v̄av̄o watsodzitria hari mwa hukuma iv̄o wavundza mukuɓalisho wa handra wawo.

¹³ Na zaidi ya v̄av̄o, iv̄o kawana za ufanya, wao urenga udzevu wa ungia na ulawa hari mwa miraɓa. Tsi tu amba kawana za ufanya, ɓadi tsena waɓaɓufu na upasiwa na tsi zawo, amwesa urongoa zilio amba kayalazimu warongoa.

¹⁴ Ha izo natsov̄endza watruwashe wa maha mishashi wafiliwa walolwe, wadze, wasike ha uzuri miraɓa yawo, ile wasuv̄e iãduwi shisa itsokao yotsi ya urilagua ha unayi.

¹⁵ Mana madza v̄wa ɓaãdhwi waav̄uha ha umuɗunga Shetwani.

¹⁶ Neka v̄wa mutrumushe aaminio alio amba hari mwa udjama wahe ana watruwashe wafiliwa, nawasaidiye, ɓadi iDjama Ndziwaminifu yasudjukumisiwe na wao, ile pare iyo isaidiye wale wafiliwa walio weke ha kweli.

¹⁷ Ɓasi uwaɓole waendresao ha uzuri iDjama Ndziwaminifu, nawaonehane amba wazidi ustahiki sheo, hususwani ɗe wao wadzirumao hari mwa mujudzio wa Urongozi na musomo.

¹⁸ Mana uMuangishio usurongoa amba: «Kutsoɓala ihanyo ya nyombe ikitsao mele», na tsena amba: «Mutru wa hazi ustahiki mushahara wahe.»

¹⁹ Usukuɓali musingidzio kinyume na muɓole wa iDjama Ndziwaminifu neka kwaupara na ushahidifu wa watru waili au wararu.

²⁰ Wao waãswio, warudi mbeli za piya uwatru, pare wasalia wajau wariye.

²¹ Nisuhuosia mbeli za Mungu, mbeli za Kristi-Insa, na mbeli za zimalayika ndzitwaharifu, utuĩ ãmuri zizo pasipo ya mav̄endzeleo wala utsahulivu.

²² Usudzihafilishe udhwaminisha mutru atsokao yotsi ha mukadzio-mihono, wala usurenge fuvu hari mwa dhambi la wangina. Wawe ha wawe, dzisike muraharifu.

²³ Lisha wawe unwa maji tu; nwa mwana maji ya zaɓiɓu ha siɓaɓu ya imimba yaho na maɓuhuo ya kula sa yaho.

²⁴ Madhambi ya ɓaãdhwi ya watru uv̄enuha, ata kaɓula neka amba raha kayanamulwa; na ya wasalia uv̄enuha amba ɓaanda yanamulwa.

²⁵ Ɗe namuna iyo wajau zitrendro ndjema uv̄enuha, ata izo zilio amba kazionehana, ne kazishindri uɓaki amba zidzama.