1 TIMUTAUSU 2 - Ha`bari Ndjema ya I Maore

Misomo yahusu mamilio

¹ Kaɓula ya kula trongo, nisutsaha v̄uv̄elehwe ha Mungu hadja, mamilio, mirayilio, v̄umoja na himida ya wanadamu piya.

² Nazifanyiwe ha yamafalume na ha piya wendza ɓandza la yezi, ile riẽshi ha utrulivu na unafasi, ha trisidzo la Mungu v̄umoja na kula staha.

³ Iyo ndzuzuri tsena umujiv̄idza Mungu Muhuyifu watru,

⁴ atsahao amba piya wanadamu wahuyiwe, tsena wapare ujuzi wa ukweli.

⁵ Mana v̄wa Mungu moja tu, tsena muparanisa moja ɓaina ya Mungu na wanadamu, ne ɗe Kristi-Insa, mwanadamu,

⁶ adziv̄a waye-waye ake shiliv̄o ya ukombofu wa piya. Uwo ɗe ushahidifu watolewa wakati wawo wahetsiwa.

⁷ Ushahidifu ulio amba wami tsifanyiha mujudzizi na Muv̄ingizi-Risala wawo, nisurongoa kweli ɓadi tsi trambo, tsena musomedza ha watru wa nishani zangina yahusu uaminifu na ukweli.

⁸ Nisutsaha ɓasi amba hari mwa kula v̄ahanu, watruwaume wafanye mamilio ha uhedza mihono mitwaharifu, ɓila hadhaɓu wala mashindrano.

⁹ Ɗe namuna iyo wajau amba watruwashe wapindre namuna yastahiki, ha mastaha na usitirifu. Wadzistawidze tsi amba ha ufanya musuko namuna kayastahiki, wala udziɗayidza ha dhahaɓu na lulu, au vao lendza thamani,

¹⁰ ɓadi nawadzistawidze ha zitrendro ndjema zistahikio watruwashe wadzihetsio amba watru wahishimuo Mungu.

¹¹ Mutrumushe nasome ha ustamiyivu, na utuĩvu mukamilifu.

¹² Wami tsisuruhusu mutrumushe usomedza, ɓila utawalia mutrumume; nadzilishe mutrulivu.

¹³ Mana Adamu ɗe aumbwa kadimu, iv̄o Hawa.

¹⁴ Na Adamu tsi ɗe adanganyiwa, ɓadi umutrumushe, ɓaanda adanganyiwa, ɗe arendreha mukosefu.

¹⁵ Ɓadi atsohuyiwa ha yamadzazi, neka aɓaki hari mwa uaminifu, uv̄endza na utwaharifu, v̄umoja na uwekevu.