1 MONYE 5 - Ha`bari Ndjema ya I Maore

Maosio ha uwaɓole wa iDjama Ndziwaminifu na yamashaɓaɓi

¹ Nisutria ɓari uwaɓole wa iDjama walio hari mwanyu, wami nilio muɓole mauri wao, shahidi wa yamatungu ya Kristi, tsena nitsorengao fuvu hari mwa utukufu ujov̄enulwao:

² namurundrise liɓangwe la Mungu mwadhwaminishiwalo, tsi ha mulazimisho, ɓadi ha uv̄endza yanyu, namuna Mungu atsahao, ɓila tsi ha mupario wendza aĩɓu, ɓadi v̄umoja na djitihadi.

³ Tsi ha utawalia ha udziro wao mwadhwaminishiwa, ɓadi ha uka mifano mbeli za liɓangwe.

⁴ Na wakati uMutsunga Muɓole atsov̄enuao, mutsopara ihishima yendza utukufu kaimenyeha.

⁵ Wanyu wajau mashaɓaɓi, namudzituĩse ha uwaɓole. Piyanyu hari mwa maendreleo yanyu wanyu na wanyu, namudziɓangise uwekevu, mana v̄uangihwa: «Mungu waye kinyume na wao wadzionao, ɓadi waye udjaãlia urehema wahe ha waekevu.»

⁶ Ɓasi namudzilishe waekevu utsini na ushindzi wa Mungu, ile amuhedzeni wakati auhetsi.

⁷ Namutsuwe piya taãɓu zanyu, mumulishiyezo, mana waye na utungu na wanyu.

⁸ Namukane zifikira zanyu, tsena muke hashiri. iÃduwi yanyu Iɓilisa asuzingidza mauri simba ingurumao, izunguhao mutru amuɗye.

⁹ Namumukanyushe ha udzihodarisha na uaminifu wanyu, mujuwe amba wananyanyu wa shi uaminifu duniani v̄anu uv̄irisiwa hari mwa matreso yao-yao.

¹⁰ Na ɓaanda itsokao amba muondesheha mwana wakati, Mungu wa kula rehema alio amba amuhirini ha uv̄umoja wanyu na Kristi murenge fuvu hari mwa utukufu wa daima wahe, atsomukamilishani waye-waye, amuhodarisheni, amuv̄eni nguvu tsena musike ha kusudi.

¹¹ Haheju ushindzi nauke ha daima na daima. Amina.

Masalamu ya mwiso

¹² Ɗe ha umusada wa Silvanus nimurengao amba mwananya muaminifu, ɗe nimuangishiaoni wana mistari wanu, ile nimutriyeni ɓari na ulawa ushahidi amba iyo ɗe irehema ya kweli ya Mungu ɗe mwadzifungamanisa nayo.

¹³ iDjama ya wao watsahulwa mauri ɗe wanyu ya shi Ɓaɓiluna isumusalimuni, v̄umoja na mwana wangu Markusi.

¹⁴ Namusalimiane wanyu na wanyu ha maɓuso ya shi mahaɓa. Amani ju lanyu piyanyu mulio hari mwa uv̄umoja na Kristi.