1 MONYE 3 - Ha`bari Ndjema ya I Maore

Maẽsha hari mwa ndrolo

¹ Ɗe namuna iyo wanyu watruwashe, namudzituĩse ha waume wanyu, pare neka amba v̄wa waharao utuĩ Urongozi, waparihane ha maendreleo ya watruwashe wawo, ɓila urongozi utsokao yotsi,

² ɓadi ha uona maendreleo maraharifu yendza adaɓu yanyu.

³ Mustawidzio wanyu usuke wa v̄ondze, hari mwa musukio nyole, muɗayidzio dhahaɓu, wala mupindrio nguo zendza thamani,

⁴ ɓadi nauke wa moni wa utru wanyu, ustawivu kaukomo wa roho makini yendza utrulivu. Iyo ɗe itrongo ikao na faida ɓole mbeli za Mungu.

⁵ Iyo ɗe inamuna hale oho watruwashe watwaharifu walio amba wakomutumainia Mungu wakodzistawidza, ha udzituĩsa ha watruwaume wawo,

⁶ mauri ɗe Sara akomutuĩ Iɓrahima na umuhira mwalahe. Ɗe ha waye ɗe mwafanyiha wana ha ufanya ndjema, wala udzilisha muhafilishiwe na trisidzo litsokao lotsi.

⁷ Ɗe namuna iyo wanyu watruwaume, namuẽshi na watruwashe wanyu ha ujua inamuna ndzambamba yawo. Namuwahishimu, iv̄o wao walazimu wawarithi v̄umoja na wanyu irehema ya uhayati, ile v̄wasuke trongo itsokao yotsi yaja yazia mamilio yanyu.

Uondesheha ha ufanya indjema

⁸ Ha muhutaswari, namuke konyo moja piyanyu, namuoneane utungu, muv̄endzane shiunanya, muv̄orehane, mukane uwekevu.

⁹ Mwasuɗiv̄e mbovu ha mbovu, wala shilihidzo ha shilihidzo. Ɗe ikinyume, namusopeleye, mana ha iyo ɗe mwahirwa, ile muwarithi ɓaraka.

¹⁰ Kweli amba uMuangishio usurongoa: «Neka mutru asutsaha afurahi maẽshani hahe, tsena aone suku zendza raha, naɓalidze ulimi wahe na mbovu, na uzia hanyo yahe na marongozi yendza unafiki.

¹¹ Nadziɓause na mbovu, afanye indjema, natsahe iamani, tsena aiɗunge.

¹² Mana matso ya Mola uka hari mwa uwendza haki, na makio yahe uvulishia mamilio yawo. Ɓadi isura ya Mola uka kinyume na wao warendrao mbovu.»

¹³ Ɓasi mbani ɗe atsomurendraoni mbovu neka muna djitihadi hari mwa indjema?

¹⁴ Na wala ukana musuondesheha ha siɓaɓu ya ihaki, v̄av̄o muɓarikishiha. «Musukane trisidzo na wao, tsena mwasuɓaɓanyihe.»

¹⁵ Ɓadi namumuhetsi Kristi rohoni hanyu amba Raɓi. Ha daima namuke tayari ya udifaĩ itama mulionayo moni hanyu, mbeli za yotsi atsotsahao ajuwe,

¹⁶ ɓadi namuifanye ha namuna ya shiuwekevu v̄umoja na hishima, na ukana roho yarahara, ile v̄ahanu kamwe musingidziwao, wao watefuao maendreleo mema yanyu hari mwa uv̄umoja wanyu na Kristi, waone haya.

¹⁷ Ɓorwa mutru aondeshehe ha ufanya ndjema, neka yao ɗe yamav̄endzeleo ya Mungu, rahana uondesheha ha ufanya mbovu.

¹⁸ Mana Kristi waye-waye ne aondesheha mara moja ɓas ha siɓaɓu ya madhambi ya wanadamu. Waye mwendza haki afariki ha tanafu ya tsi wendza haki, ile pare amuv̄ingeni ha Mungu. Aulawa umwili wahe, ɓadi aẽshisiwa ha iRoho.

¹⁹ Na ha wiyo ɗe andra aĩdhia ziroho zafungwa,

²⁰ ne ɗe zizo zakohara utuĩ hale oho, wakati isuɓira ya Mungu yakolindra hari mwa zisuku Nuhu akofanya lidjahazi. Moni v̄walo v̄uhuyiwa hisaɓu titi ya wanadamu yapara wanane, ha uv̄irisiwa hari mwa maji.

²¹ Na iyo ika mufano wa umuɓaĩsho umuhuyioni leo ini, muɓaĩsho ulio amba kausutoa tsama za umwili, ɓadi ulio miyadi mbeli za Mungu ha roho yarahara. Na uhuyifu uwo uparihana ha umuregezeo hayi wa Insa-Kristi,

²² alio amba andre pev̄oni, a humeni ha Mungu, tsena zimalayika, ziyezi na zingushindzi zilazimishiwa umutuĩ.