1 MONYE 2 - Ha`bari Ndjema ya I Maore

¹ Namutsuwe ɓasi kula uovu, kula udangamanyifu, unafiki, uwivu, na kula musingidzio.

² Mauri wana wadzalwa av̄asa, namutsahe dzia swafi-swafi la shiroho, ile ha wilo muhuwe, mupare uhuyifu,

³ ɓaanda ilio amba «mulaulia uwema wa Raɓi.»

Ɓwe lilio hayi na umati watsahulwa na Mungu

⁴ Namuje mumupare waye, Ɓwe lilio hayi, lalatswa na wanadamu, ɓadi latsahulwa na uonehana amba lendza faida ɓole mbeli za Mungu.

⁵ Na wanyu-wanyu mauri mawe yalio hayi, namurumishihe hari mwa liɓundro la nyumba ya shiroho, mukane urumishi mutwaharifu wa Utolezi-Masadaka, ile mutowe masadaka ya shiroho, yakuɓalishiha na Mungu, ha ndzia ya Insa-Kristi.

⁶ Mana v̄uangihwa moni na uMuangishio: «Tsami nisuhetsi hari mwa iSiyuna|Siyuna ɓwe la nyongaju, ɓwe latsahulwa, tsena lendza faida, na uwo aliaminio, katsojaya haya.»

⁷ Ɓasi v̄av̄o ha wanyu muaminio, ɓwe lilo lina faida halisi; ɓadi ha wao kawasuamini, «Ɓwe lile maundrizi walilatsa, lifanyishiha liɓwe mahususu la nyongaju.»

⁸ Na tsena: «Ɓwe likwalisao, ɓwe-monye liusao.» Wao ulikwala, mana kawasutuĩ Urongozi. Na iyo ɗe itrongo wahetsiwayo.

⁹ Ɓadi wanyu kaɓila yatsahulwa, Matolezi-Masadaka ya shiufalume, nishani ndzitwaharifu, umati Mungu adziparia, ile mujudze yimisifio ya Uwo amuhirani ulawa shidzani mwendre hari mwa iheu ndzitukufu yahe.

¹⁰ Wanyu mulio amba hale hule kamwaka umati, av̄asa mufanyiha umati wa Mungu; wanyu mulio amba kamwaka mwapara urehema, av̄asa mupara urehema.

Maendreleo mazuri mbeli za watru

¹¹ Wav̄endzewa wangu, wanyu mulio wadjeni shiv̄andreju mwa tsi, tsena muv̄irao na ndzia, nisumutafadalini mudziɓause na zingushauku za shiunadamu ziwanao na nafusi zanyu.

¹² Namukane maendreleo mazuri mbeli na watru kawamuji Mungu, ile pare v̄ahanu kamwe wamurongoaoni amba wanyu warendrezi-mbovu, waone zitrendro ndjema zanyu, amwesa wamutukuze Mungu isuku ya umujilio wahe.

Namudzituĩse mbeli za wendza yezi

¹³ Namudzituĩse ha siɓaɓu ya Mola mbeli za kula utawalifu wa shiunadamu: neka mufalume alio umuhu,

¹⁴ au mawakala walio amba waye ɗe awav̄eleha wav̄e zifungo warendrezi-mbovu, na usifu warendrezi-ndjema.

¹⁵ Mana mav̄endzeleo ya Mungu ɗe amba ha ufanya ndjema, muɓale ihanyo ya ujinga wa yamalaɓa.

¹⁶ Namudziv̄inge shi wendza unafasi, ɓila ufanya unafasi wanyu amba shitamba ifinikiao taɓia mbi; mudziv̄inge shi warumwa wa Mungu.

¹⁷ Namuhishimu piya uwatru, muv̄endze wananyanyu wa shi uaminifu, mumuriye Mungu, muhishimu umufalume.

Mufano wa matreso ya Kristi

¹⁸ Wanyu warumwa, namudzituĩse ha warumisa wanyu v̄umoja na hishima ɓole, wala tsi amba ha wao walio wema tsena waeledzeshehao tu ɓasi, ɓadi wajau ha wao walio wahali.

¹⁹ Mana iyo rehema amba ha mastaha mbeli za Mungu, mutru ustahamili utungu wa maondo tsi ya haki.

²⁰ Kweli amba sifa trini ikao mutru amostahamili ziv̄ondro ɓaanda akosa? Ɓadi neka amba musustahamili maondo ɓaanda murendrao ndjema, iyo rehema mbeli za Mungu.

²¹ Na ha iyo ɗe mwahirwa, mana Kristi wajau ne aondesheha ha umufayidishani, amulishiani mufano, ile muɗunge yimirohoro yahe:

²² «Waye kafanya dhambi, na hanyoni hahe kav̄waparihana udangamanyifu.»

²³ Waye alio amba amoruhanwa, kakoruhana, amoondesheha, kakorisidza, ɓadi akodzilisha ha Uwo anamuao ha haki.

²⁴ Waye alio amba waye monyewe av̄ingi madhambi yatru mwilini hahe hari mwa umuri|muri wa pawa, pare rife uhusu madhambi, ne riẽshi uhusu ihaki; waye alio amba ha madjaraha yahe muangalisiwa.

²⁵ Mana muka mauri maɓariɓari yandrao mboya, ɓadi av̄asa murudi ha Uwo alio Mutsunga wanyu, tsena Mugogezi wa ziroho zanyu.