1 MONYE 1 - Ha`bari Ndjema ya I Maore

Masalamu

¹ Wami Monye, Muv̄ingizi-Risala wa Insa-Kristi, ha wao watsahulwa waẽshio shi wadjeni, tsena watsambadziwa hari mwa yimikaɓala ya Pontusu, Galatwiya, Kapadokiya, Aziya na Ɓitiniya.

² Mutsahulwa na Mungu amma Ɓaɓa, ha ulingana na inia akanayo rangu kaɓula, tsena mutwaharishiwa na iRoho, mukane utuĩvu ha Insa-Kristi na urenga fuvu hari mwa umutsambadzio wa idamu yahe: Urehema na amani nazimuendreleyeni ha uwengi.

Tama ilio hayi

³ Naɓarikishihe Mungu amma Ɓaɓa wa Raɓi watru Insa-Kristi, alio amba ha urehema muɓole wahe, ariv̄a uhayati muv̄ia ha umuregezeo hayi wa Insa-Kristi ulawa ha uwafu, ile rikane tama ilio hayi,

⁴ mwaratha tsi muangamivu, ɓila pandra, wala unyaivu, mwalishiwawo pev̄oni,

⁵ wanyu mutundwao na ushindzi wa Mungu ha ndzia ya uaminifu, ile mupare uhuyifu ulio tayari uv̄enulwe hari mwa uwakati wa mwiso.

⁶ Namufurahi na trongo iyo, wala ukana av̄asa hari mwa mwana muda, ukiri uka mungiliweni huzuni ha siɓaɓu ya madjereɓio ya namuna na namuna.

⁷ Yao yaja ile yav̄ime ukweli wa uaminifu wanyu, uaminifu uliona faida rahana dhahaɓu ndziangamivu, wala ukana iyo udhiɓitishiwa ha moro. Na uaminifu wanyu uwo ɓaanda wadhiɓitishiwa, ufanyiha siɓaɓu ya sifa, utukufu na hishima wakati wa umuv̄enulio wa Insa-Kristi

⁸ alio amba kamwamuona, ɓadi wanyu umuv̄endza. Na ata av̄asa wala ukana kamusumuona, ne musumuamini, ata musungiliwa na furaha ndzitukufu kaieledzesheha,

⁹ iv̄o muparao ikusudi ya uaminifu wanyu, ne ɗe uhuyifu wa roho zanyu.

¹⁰ Uhuyifu uwo, yimitrume yakojudza marongozi washukidziwa ju la urehema mwahetsiwa, yiutwalia na uzunguha ikweli yawo.

¹¹ Wakozunguha wajuwe amba wakati trini, na ha namuna jeje zitsohidjirio zitrongo zarongolwa na iRoho ya Kristi yaka hawoju, Roho ilio amba ijudza rangu kaɓula matungu ya Kristi na utukufu wakoja uɗunge v̄av̄o.

¹² Wav̄enuliwa amba kawakodzirumishia wenyewe ɓadi wanyu hari mwa trongo zizo, zilio amba av̄asa mujudziwazo na wao wamutekelezeani iHaɓari Ndjema ha iRoho Ndzitwaharifu yav̄elehwa ulawa pev̄oni, trongo zilio amba ata zimalayika, ne zatsov̄endza zizielewe.

Uẽshi ha utwaharifu

¹³ Ha izo, namuke na fikira zanyu, muke hashiri, tsena muhetsi tama ndzikamilifu yanyu hari mwa irehema itsomujiliaoni wakati wa umuv̄enulio wa Insa-Kristi.

¹⁴ Mauri wana watuĩvu, mwasudzilishe mwatawaliwa na zingushauku mwakanazo nyumeni hule, wakati raha kamwakana ujuzi.

¹⁵ Ɓadi mauri ɗe inamuna Uwo amuhirani alio mutwaharifu, wanyu wajau namufanyihe watwaharifu hari mwa piya muendreleo wanyu,

¹⁶ mana v̄uangihwa: «Mutsoka watwaharifu, mana wami mutwaharifu.»

¹⁷ Na neka musumumia Mungu ha umuhira Ɓaɓa, Monyewe uhukumu kula mutru na zitrendro zahe ɓila uv̄endzelea, ɓasi namudziv̄inge v̄umoja na trisidzo wakati raha mulio shiv̄andreju mwa tsi.

¹⁸ Namujuwe amba tsi ha zitru muangamia mauri fedha au dhahaɓu ɗe mwakombolwa hari mwa yamaendreleo kayana mana mwayawarithi ha wadzaɗe wanyu,

¹⁹ ɓadi ha idamu yendza kima ɓole ya Kristi, mauri ya mwana ɓariɓari kana shifeli wala pandra.

²⁰ Atsahulwa rangu kaɓula, raha lidunia kalaka laumbwa, tsena av̄enulwa hari mwa uwakati wa mwiso unu ha faida yanyu,

²¹ mulio amba ha ndzia yahe, musumuamini Mungu, waye amuregeza hayi ulawa ha uwafu, amwesa amuv̄a utukufu, ha namuna amba uaminifu wanyu na itama yanyu za ha Mungu.

²² Ɓaanda mwadzitwaharisha ziroho ha utuĩ ikweli, pare mukane huɓa ya shiunanya ɓila unafiki, ɓasi namuv̄endzane wanyu na wanyu ha djitihadi na roho yarahara.

²³ Kweli amba muv̄olwa uhayati muv̄ia, tsi ha mbeu muangamia, ɓadi ha mbeu tsi muangamia, ha urongozi ulio hayi tsena ulio v̄av̄o wa Mungu.

²⁴ Mana v̄uangihwa: «Kula shiumbe yendza roho, iyo mauri ɗavu, na kula utukufu wayo, mauri ga la liɗavu. Ɗavu, lilo uhuma, na liga upuliha,

²⁵ ɓadi urongozi wa Mola wa v̄av̄o dahari.» Na urongozi uwo, ɗe iHaɓari Ndjema mwajudziwayo.