1 MAKORINTIYO 8 - Ha`bari Ndjema ya I Maore

Zahula zatolewa sadaka masanamwe

¹ Ɓasi yahusu nyama zatolewa sadaka masanamwe, risujua amba piyasi rina ujuzi. Ujuzi, uwo uv̄inga mutru adziɓuwe, ɓadi mahaɓa, yao uhudza.

² Neka mutru asudzifikiria ujua trongo, ɓasi v̄av̄o raha kasujua namuna yalazimu ajuwe.

³ Ɓadi neka mutru asumuv̄endza Mungu, waye uwo ujulihwana na waye.

⁴ Ɓasi yahusu muɗyio wa nyama zatolewa masadaka masanamwe, risujua amba sanamwe, lilo mufano wa shitru kaisi ha kweli ulemenguni, tsena risujua amba kav̄u Mungu neka tsi moja ɓas.

⁵ Mana wala ukana v̄wa zihiriwao miungu, au mbinguni, au shiv̄andreju mwa tsi, ha namuna amba v̄wa miungu mengi na mamola mengi,

⁶ ɓadi hatruju v̄wa Mungu moja tu, Ɓaɓa alio amba zitru piya ulawa haheju, na ha waye ɗe rilio; na Raɓi moja, Insa-Kristi, alio amba ha ndzia yahe ɗe piya zilio, na ha ndzia yahe tsena ɗe rilio.

⁷ Ɓadi piya tsi ɗe waliona ujuzi uwo. Wasalia wakana udzevu wa masanamwe, ha namuna amba ata upara av̄asa wamoɗya nyama yatolewa sadaka masanamwe, wao uona amba v̄ale wasuɗya sadaka la shi sanamwe. liKoho la unamuzi hari mwa zindjema na zimbovu hawo tsi hodari. Ha izo, wao uona mauri wasunagisiha na inyama ile.

⁸ Ɓadi tsi shahula ɗe itsorikuruɓishao na Mungu. Neka karisuɗya, karitsolatsishiwa na itsokao yotsi; neka risuɗya, karitsozidishiwa na itsokao yotsi.

⁹ Ɓadi namudzitahadharishe ile unafasi wanyu usuke siɓaɓu ya ukwalisa wao kawasi wahodari.

¹⁰ Mana neka mutru asuhuona wawe uliona ujuzi amba uketsi, usuɗya moni na nyumba ya masanamwe, hali v̄av̄o ule alio amba likoho la unamuzi wa zindjema na zimbovu kalisi hodari, katsotrilwa ɓari ya waye uɗya nyama yatolewa sadaka masanamwe?

¹¹ Na ha izo tsi muhodari ule asuangamia ha ujuzi waho, waye mwananya muaminifu alio amba Kristi afu ha siɓaɓu ya waye.

¹² Na v̄av̄o, mwamoãswi namuna iyo kinyume na uwananya wa shi uaminifu na uhodza likoho la unamuzi hari mwa zindjema na zimbovu tsi hodari lawo, v̄av̄o musuãswi kinyume na Kristi.

¹³ Iyo ɗe imana ata neka shahula isukwalisa umwananya muaminifu wangu, tsisina tsena suku nitsoɗyao nyama, pare nasukwalise mwananyangu.