1 MAKORINTIYO 6 - Ha`bari Ndjema ya I Maore

Mashitaka ɓaina ya wananya wa shi uaminifu tsi trongo yalazimu

¹ V̄wamoka mutru mengoni mwanyu amba ana umani na munyahe muaminifu, namuna jeje asuɓutuo av̄inge umani ule wahukumulwe na watru kawamuji Mungu, ɓadi tsi mbeli za uwaaminifu?

² Hali kamusujua amba waaminifu watsohukumu ulemengu? Na neka ɗe ha wanyu ɗe ulemengu utsohukumulwao, kamutsostahiki uhukumu wana trongo watiti?

³ Kamusujua amba ritsohukumu zimalayika? Na v̄av̄o karisurongoa ata hata trongo za maẽsha ya leo!

⁴ Neka amba muna umani wahusu trongo mauri ɗe zizo, ɓasi musuziv̄inga zinamulwe na watru watiti matsoni mwa iDjama Ndziwaminifu?

⁵ Nisuirongoa ha aĩɓu yanyu. Amba kav̄u hari mwanyu mwendza hikima atsoshindrao anamuwe ɓaina ya wananyahe waaminifu!

⁶ Ɓadi mwananya asushitaki mwananya, na iyo mbeli za watru tsi maaminifu!

⁷ Ɓasi rangu muliona mashitaka wanyu na wanyu, v̄av̄o mushindriha halisi. Tsi ɓorwa mwadhulumiwa? Tsi ɓorwa mwadzilisha mwav̄oshewa mali zanyu?

⁸ Ɓadi wanyu ɗe mudhulumuo na urav̄a, na iyo ha wananyanyu wa uaminifu!

⁹ Kamusujua amba wadhuluma kawatsopara fungu hari mwa Utawalizi wa Mungu? Musulaɓihe! Watru wendza taɓia za peu za shi mwili, maãɓudu-masanamwe, wazindzi, watruɓaɓa waliona shahawa wao na wao,

¹⁰ waidzi, mav̄endza-upara, walevi, marongoa-nnayi, na warav̄izi, kawatsopara fungu hari mwa Utawalizi wa Mungu.

¹¹ Na v̄av̄o ɗe v̄ahanu wasalia mengoni mwanyu waka. Ɓadi muja muhoswa, muja mutwaharishiwa, muja mukuɓalishiha mbeli za Mungu ha lidzina la Raɓi Insa-Kristi, na ha iRoho ya Mungu watru.

Namurumiye mili yanyu ha utukufu wa Mungu

¹² V̄wa warongoao: «Tsiruhusiwa piya.» Ɓadi tsi piya ɗe ziliona mana na mutru. Kweli amba tsiruhusiwa piya, ɓadi hanguju wami, tsitsodzilisha natawaliwa na itsokao yotsi.

¹³ Na tsena: «Zahula, izo za mimba, na imimba, ya zahula.» Izo kweli; ɓadi Mungu atsoziangamidza izo mbili. Na umwili tsi wa ufanya taɓia za shahawa kazalazimu; uwo wa Raɓi, na Raɓi waye, wa umwili.

¹⁴ Ɓasi Mungu amuregeza hayi Raɓi ulawa ufaju, atsoriregeza hayi ulawa ufaju wasi wajau, ha ushindzi wahe.

¹⁵ Afa kamusujua amba yimili yanyu ya ziga za Kristi? Ɓasi nitsorenga ziga za Kristi, nizifanye ziga za susu? Ata hata!

¹⁶ Hali kamusujua amba mutru adzifungamanisao na susu, uwo a mwili moja na waye? Mana v̄uangihwa: «Wao waili watsofanyishiha mwili moja.»

¹⁷ Ɓadi uwo adzifungamanisao na Raɓi, ufanyiha roho moja na waye.

¹⁸ Namutrale taɓia za shahawa kazalazimu. Dhambi langina lotsi mutru alifanyao, lilo kalihusu umwili wahe, ɓadi uwo afanyao taɓia za shahawa kazalazimu, v̄av̄o asuãswi kinyume na umwili wahe monyewe.

¹⁹ Afa kamusujua amba umwili wanyu, uwo ɗe inyumba ndzitwaharifu ya iRoho Ndzitwaharifu ilio moni hanyu, tsena mwaipara ulawa ha Mungu? Wanyu tsi wanyu wenyewe.

²⁰ Mununulwa ha thamani. Ɓasi namumutukuze Mungu mwilini hanyu.