1 MAKORINTIYO 5 - Ha`bari Ndjema ya I Maore

Mwendza taɓia zendza aĩɓu natolwe hari mwa iDjama Ndziwaminifu

¹ Na v̄anu v̄usurongolwa kula v̄ahanu amba v̄wa shahawa endza ulaãnifu hari mwanyu, aina ya shahawa ilio amba kaiparihwana ata ha watru wa zinishani zangina kazimuji Mungu, ha namuna amba moja hari mwanyu a na umutrumushe wa ɓaɓahe.

² Na v̄av̄o musudziona! Tsi ɓorwa anga mwaka hari mwa usikitifu, ata mutru afanya taɓia iyo atolwa hari mwa wanyu?

³ Wami hanguju, wala ukana tsisi v̄umoja na wanyu ha mwili, ɓadi tsa v̄umoja ha roho, madza tsinamua mutru afanya taɓia iyo, mauri tsa v̄umoja na wanyu.

⁴ Wakati itsokao amba mungulidzana ha lidzina la Raɓi Insa, wanyu na iroho yangu v̄umoja na wanyu, ɓasi ha ushindzi wa Raɓi watru Insa,

⁵ namuv̄elehe mutru uwo ha Shetwani, ile ihali ndziãswifu yahe iangamidziwe, na iroho yahe ihuyiwe isuku ya umujilio wa Raɓi.

⁶ Kaina ata mana wanyu udziona. Hali kamusujua amba mwana lalive mutiti ushindra afumuwe piya uunga wa muhare?

⁷ Namutenge ilalive ya zamani, ile muke unga muv̄ia, ɓaanda ilio amba kamuna lalive. Mana Kristi, mwana ɓariɓari wa *Mutupio watru, atolwa sadaka.

⁸ Ɓasi v̄av̄o narifanye umusherehio, ɓila tsi na lalive ya zamani, wala tsi na lalive ya uovu na upeu, ɓadi na madipe kayana lalive ya uraharifu na ukweli.

⁹ Tsimuangishiani hari mwa liɓarua langu amba musudziparanise na wao waliona taɓia za shahawa kazalazimu.

¹⁰ Na v̄ale tsakorongoa ɗe udjimilifu wa wazindzi wa lidunia lini, wala tsi ɗe mav̄endza-upara, marav̄izi, au maãɓudu-masanamwe; mana neka ɗe namuna iyo, mutsolazimu mulawe ulemenguni.

¹¹ Ɓadi v̄ale itrongo namuangishiani, ɗe amba musudziparanise na mutru adzihirao amba mwananya wa shi uaminifu, ne asufanya taɓia ya peu ya shi mwili, au ya uv̄endza upara, au ya uãɓudu masanamwe, au ya urongoa nnayi, au ya ulevi, au ya udangamanyifu. Ata musuɗye ata hata na mutru mauri ɗe uwo.

¹² Hali izo zangu za unamua watru walio v̄ondze na iDjama Ndziwaminifu? Na wao walio moni, wanyu tsi ɗe mwalazimu muwanamuwe?

¹³ Wao walio v̄ondze, Mungu ɗe atsowanamuao. V̄uangihwa: «Namutowe umovu hari mwanyu.»