1 MAKORINTIYO 3 - Ha`bari Ndjema ya I Maore

iSiɓaɓu ya umutsapushiano wa iDjama Ndziwaminifu

¹ Hanguju wananyangu, tsi mauri ha watru wav̄ingwao na iRoho ɗe nashindra nalagua na wanyu, ɓadi ha watru wadziv̄ingao shiuɓinadamu, mauri ha watru walio wanazaza hari mwa uv̄umoja wawo na Kristi.

² Tsimuv̄ani dzia, ɓadi tsi shahula mangavu, mana kamwatsoshindra, wala ata av̄asa ne kamushindri.

³ Mana raha musudziv̄inga shiuɓinadamu. Rangu hari mwanyu v̄ulio uwivu na umani, v̄av̄o kamusi shiuɓinadamu? Hali kamusudziv̄inga ha namuna ya shi ulemengu?

⁴ Moja amorongoa: «Wami wa Ɓaulusu», na wangina: «Wami wa Aɓulusu», hali v̄av̄o kamusi shiuɓinadamu?

⁵ Afa Aɓulusu mwa, uwo mbani? Na Ɓaulusu ɗe mbani? Warumishi walio amba ha indzia yawo ɗe mwaja mwaamini, ha ikiasi Raɓi av̄a kula moja hari mwasi.

⁶ Wami tsitaɓu, Aɓulusu atria maji, ɓadi Mungu ɗe ahudzao.

⁷ Ha izo, tsi ule ataɓuo ɗe alio muhimu, wala tsi ɗe ule atriao maji, ɓadi Mungu ahudzao.

⁸ Ule ataɓuo na ule atriao maji, wao sawa, na kula moja atsopara thawaɓu yahe ulawana na ihazi yahe monyewe.

⁹ Mana wasi washangirizi wa Mungu rifanyao hazi v̄umoja na waye; wanyu ɗe lishamba la Mungu, amma ɗe umuundrio wa Mungu.

¹⁰ Ha ineema ya Mungu nadjaãliwayo, tsihedza musingi mauri muundrizi mwendza hikima, na wangina asuundra uju mwawo. Ɓadi kula moja nafahamu na inamuna yahe aundrao uju.

¹¹ Mana kav̄usi mutru ashindrao ahedze musingi wangina ɓadala ya ule wahedzewa, na uwo ɗe Insa-Kristi.

¹² Neka mutru asuundra uju na musingi uwo ha dhahaɓu, au fedha, au ha mawe yendza thamani, au miri, au unyasi, au tsaha,

¹³ v̄av̄o hazi ya kula mutru itsoonehana, mana iSuku ya Hukuma itsoionesa. Itsov̄enulwa ha moro, na umoro ɗe utsotoao udhiɓitifu wa inamuna ya ihazi ya kula mutru.

¹⁴ Neka ihazi mutru aifanya uju na umusingi istahamili, v̄av̄o uwo atsopara thawaɓu.

¹⁵ Ɓadi neka ihazi ya mutru aifanya ivuwu ata ikomo, monyewe atsoparwa na hasara; waye kweli atsohuyiwa, ɓadi mauri ha uv̄ira moni na jenge la moro.

¹⁶ Hali kamusujua amba wanyu nyumba ndzitwaharifu ya Mungu, na iRoho ya Mungu isuẽshi moni hanyu?

¹⁷ Neka mutru asuangamidza inyumba ndzitwaharifu ya Mungu, Mungu atsomuangamidza. Mana inyumba ndzitwaharifu ya Mungu, iyo twahara, na inyumba ndzitwaharifu iyo, ɗe wanyu.

¹⁸ V̄wasuke ata mutru adzilaɓa: neka mutru mengoni mwanyu asudziona mauri mwendza hikima, hikima ya shi duniani, nafanyihe mujinga, ile afanyihe mwendza hikima.

¹⁹ Mana hikima ya ulemengu unu, iyo ujinga mbeli za Mungu. Mauri ɗe iheli yaangihwa moni na uMuangishio Mutwaharifu: «Waye usika wendza hikima hari mwa udjandja wawo.»

²⁰ Na tsena: «Mola ujua fikira za wendza hikima, amba kazina mana.»

²¹ Ɓasi v̄av̄o v̄usuke mutru adziparia sifa ulawana na wanadamu; mana piya zanyu,

²² neka Ɓaulusu, au Aɓulusu, au Sefasi, au ulemengu, au uhayati, au ufa, au trongo za leo, au izo zijao. Piya zanyu,

²³ ɓadi wanyu wa Kristi, na Kristi wa Mungu.