1 MAKORINTIYO 2 - Ha`bari Ndjema ya I Maore

Mujudzio wa Ɓaulusu wahusu umuri wa pawa

¹ Hanguju wananyangu, wakati naja hanyu, tsi v̄umoja na luha yendza faswaha au hikima ɗe naja namujudzani isiri yamuhusu Mungu.

² Mana tsiãzimia nasujuwe trongo yangina hanyuju neka tsi Insa-Kristi, waye alio amba aremwa mizumari hari mwa muri wa pawa.

³ Wami-wami uka yangu hanyu, tsikana ulemevu na faza, tsena na mudridrimio wendza nguvu.

⁴ Hutuɓa yangu na mujudzio wa ihaɓari wangu kazaka zaketsi hari mwa marongozi yendza hikima yaswadikishao, ɓadi hari mwa uv̄enufu wa iRoho ya Mungu v̄umoja na ushindzi,

⁵ ile uaminifu wanyu usuketsi hari mwa ihikima ya shiuɓinadamu, ɓadi hari mwa ushindzi wa Mungu.

Hikima ya Mungu

⁶ Na v̄av̄o, kweli amba risujudza hikima hari mwa watru waaminifu wakamiliha shiroho, ɓadi hikima ilio amba tsi ya ulemengu unu, wala tsi ya matawalizi wa lidunia lini, walio amba wahetsiwa wandre waangamidziwe;

⁷ risujudza ihikima ya Mungu yendza siri tsena yatsitswa, ilio amba Mungu aka aiãzimia ha utukufu watru rangu kaɓula madza ina mida.

⁸ Kav̄u ata mutawalizi moja wa ulemengu unu ajua hikima ini, mana na djeli waka waijua, kawatsomurema mizumari murijuRaɓi mwendza utukufu.

⁹ Ɓadi mauri ɗe iheli yaangihwa moni na uMuangishio Mutwaharifu: «Trongo zilio amba dzitso kalaziona, kio kalazikia, wala kazangia hari mwa umo wa mwanadamu, trongo zilio amba Mungu azitayarishia wao wamuv̄endzao.»

¹⁰ Ne ɗe Mungu ariv̄enushiazo wasi ha iRoho. Mana iRoho utunda piya, ata zilio hari mwa zilindri zahe Mungu.

¹¹ Ɓasi mbani hari mwa uwanadamu ajuao zahusu mwanadamu, neka tsi ɗe iroho ilio moni hahe? Ɗe ha inamuna iyo wajau, kav̄u ajuao zahusu Mungu, neka tsi ɗe iRoho ya Mungu.

¹² Na wasi karapara iroho ya ulemengu, ɓadi iRoho ilawao ha Mungu, ile rijuwe izo Mungu arirehemu.

¹³ Na wasi risuzilagua, tsi ha marongozi yasomedzewa na hikima ya shiuɓinadamu, ɓadi ha marongozi yasomedzewa na iRoho, na ha izo risueledza izo zilio za Roho, ha luha ya shiRoho.

¹⁴ Ɓadi mwanadamu nyama-nyama kashindri ukuɓali trongo zahusu iRoho ya Mungu. Mana haheju izo ujinga, tsena kashindri uzijua, mana izo unamulwa ha iRoho.

¹⁵ Mutru wa shi Roho waye, ha kinyume ujua anamuwe piya, wala waye-waye kaji anamulwa na atsokao yotsi. Amwesa uMuangishio usurongoa:

¹⁶ «Kweli amba mbani ɗe ajua iãkili ya Mola? Mbani ɗe atsojuao amuv̄e mashauri?» Ɓadi wasi, wasi rina iãkili ya Kristi.