1 MAKORINTIYO 16 - Ha`bari Ndjema ya I Maore

Mutsango wa usaidi wananya waaminifu wa Yerusalemu

¹ Yahusu umutsango wa waaminifu, namufanye wajau mauri ɗe inamuna naambia ziDjama Ndziwaminifu za Galatwiya.

² Kula mutru mengoni mwanyu isuku ya handra ya mufumo, nagamise hahe iyo atsoshindrao ha ikadiri yahe, ile watru wasulindre naja iv̄o v̄wafanyiwa umutsango.

³ Ata namowaswili, nitsov̄a maɓarua wao mwawatsahua, niwav̄elehe wav̄inge zawadi zanyu Yerusalemu.

⁴ Neka ionehana amba ɓorwa nendre wami wajau, v̄av̄o watsendra v̄umoja na wami.

Mipango ya musafara wa Ɓaulusu

⁵ Nitsoja nimuoneni ɓaanda itsokao amba tsiv̄iri Makadoniya, mana kweli amba nitsov̄ira Makadoniya.

⁶ Ukiri uka amba nitsoɓaki hanyu, au ata niv̄itse wakati wa ɓaridi, ile munisaidi na iyo yanilazimu pare niendreleye na musafara wangu, v̄ahali yotsi nitsendrao.

⁷ Mara ini tsisutsaha nav̄ira tu na ndzia amba nimuoneni, ɓadi nisutumainia niv̄itse mwana wakati v̄umoja na wanyu, neka ɗe uv̄endza ya Raɓi.

⁸ Ɓadi nitsoɓaki ɗagoni Efeso ata isuku ya Pentikoti,

⁹ mana v̄uniɓulishia mulongo muɓole wa hazi yendza manufa, wala ukana walio kinyume wa wengi.

¹⁰ Timutausu amowaswili oho, namumurenge ha uzuri ha namuna amba asutaãɓihe, mana waye ufanya mauri ɗe wami hazi ya umurumishia Raɓi.

¹¹ Ɓasi v̄wasuke ata mutru amudharau. Namumuendrese ha usalama umusafara wahe ata aje anipare, mana nisumulindra v̄umoja na uwananya waaminifu.

¹² Yahusu umwananya Aɓulusu, tsimutria ɓari hodari aje amuoneni v̄umoja na uwananya waaminifu, ɓadi ha kweli kayaka mav̄endzeleo yahe waye uifanya av̄asa; atsoja wakati atsoparao inafasi.

Masariɓu ya mwiso na masalamu

¹³ Namuke hashiri, musike hodari uaminifu wanyu, mudziv̄inge mauri watruɓaɓa, muke wahodari.

¹⁴ Naike amba hari mwanyu kula trongo ifanyishihe v̄umoja na mahaɓa.

¹⁵ Sariɓu langina tsena wananyangu: musujua amba umuraɓa wa Stefanasi, uwo ɗe wa handra waamini hari mwa umukaɓala wa Akaya, tsena wadzihetsi amba wasurumishia idjama ya waaminifu.

¹⁶ Ɓasi namutuĩ watru mauri ɗe wao, na piya warengao fuvu hari mwa ihazi, wadzirumao ha siɓaɓu ya wiyo.

¹⁷ Nisujiv̄iwa na umujilio wa Stefanasi, wa Fortunatusa, na wa Akayikusa. Warenge ɓandza lanyu iv̄o kamwaka.

¹⁸ Mana watrulidza roho yangu, v̄umoja na yanyu. Ɓasi namuv̄e mastaha watru mauri ɗe wao.

¹⁹ ziDjama Ndziwaminifu za Aziya zimusalimuni. Akila na Priskila, v̄umoja na iDjama Ndziwaminifu ilio muraɓani hawo, wamuv̄ani masalamu mengi hari mwa uv̄umoja na Raɓi.

²⁰ Piya uwananya waaminifu wamusalimuni. Namusalimiane wanyu na wanyu masalamu ya shi utwaharifu.

²¹ Ha umuhono wangu wami Ɓaulusu nisumuv̄ani lisalamu lini.

²² Neka v̄wa mutru kamuv̄endze Raɓi, nalaãniwe. Maranatha!

²³ Rehema ya Raɓi Insa naike ju lanyu piyanyu.

²⁴ Uv̄endza yangu ya na wanyu piyanyu hari mwa uv̄umoja na Kristi-Insa.