1 MAKORINTIYO 1 - Ha`bari Ndjema ya I Maore

¹ Wami Ɓaulusu nahiriwa ha yamav̄endzeleo ya Mungu nike Muv̄ingizi-Risala wa Kristi-Insa, v̄umoja na umwananya wa shi uaminifu Sustani,

² risumuangishiani wanyu iDjama Ndziwaminifu ya Mungu ilio Korintiyo, watru watwaharishiwa hari mwa uv̄umoja na Kristi-Insa, wahiriwa wake twahara v̄umoja na piya wao waombao hari mwa kula mukaɓala lidzina la Raɓi watru Insa-Kristi, Raɓi wawo amma watru.

³ Urehema na amani zalawa ha Ɓaɓatru Mungu na Raɓi Insa-Kristi nazimuendreleyeni.

Himida ha Mungu

⁴ Ha daima nisumuhimidia Mungu ha siɓaɓu ya wanyu na ineema amudjaãlianiyo ha uv̄umoja wanyu na Kristi-Insa.

⁵ Mana hari mwa uv̄umoja na waye, mudjaãliwa kula utadjirifu wa kula urongozi na kula ujuzi,

⁶ iv̄o ushahidifu wamuhusu Kristi wadhiɓitishiha hanyuju.

⁷ Ha izo, wanyu kamwakosewa na neema itsokao yotsi hari mwa umulindrilio wanyu wa umuv̄enulio wa Raɓi watru Insa-Kristi.

⁸ Waye ɗe atsomuhodarishaoni tsena ata mupaka mwiso, ile musutuhumilwe na itsokao yotsi isuku ya Raɓi watru Insa-Kristi.

⁹ Mungu waye muaminifu, waye amuhirani muke hari mwa uv̄umoja na uMwana wahe Insa-Kristi, Raɓi watru.

Mitsapushiano hari mwa iDjama Ndziwaminifu ya Korintiyo

¹⁰ Nisumutriani ɓari wananyangu, ha lidzina la Raɓi watru Insa-Kristi, namusike piyanyu urongozi moja, v̄usuke mitsapushiano hari mwa wanyu, ɓadi mutsanganisihe, muke fikira moja na nia moja.

¹¹ Mana wananyangu, tsipara haɓari zamuhusuni ha watru wa umuraɓa wa Kloyi, amba v̄wa mitsapushiano hari mwanyu.

¹² iTrongo niirongoao ɗe ini, amba kula moja hari mwanyu asurongoa: «Wami wa Ɓaulusu»; na wangina: «Wami wa Aɓulusu»; wangina tsena: «Wami wa Sefasi»; na tsena v̄wa wangina arongoao: «Wami wa Kristi.»

¹³ Hali Kristi aanisiwa? Hali Ɓaulusu aka aremwa mizumari hari mwa muri wa pawa ha siɓaɓu ya wanyu? Au muɓaĩshiwa|uɓaĩsha ha lidzina la Ɓaulusu?

¹⁴ Nisumuhimidia Mungu iv̄o tsaɓaĩsha ata moja hari mwanyu neka tsi ɗe Krispusu na Djayusu.

¹⁵ Ha izo, kav̄u ata moja hari mwanyu ashindrao arongowe amba muɓaĩshiwa ha lidzina langu.

¹⁶ Ayi, v̄ale tsiɓaĩsha tsena umuraɓa wa Stefanasi. Ɓaanda ya v̄av̄o tsisufahamu neka tsiɓaĩsha mutru wangina.

¹⁷ Mana Kristi kaniv̄eleha naɓaĩsha, ɓadi amba nijudze iIndjili, wala iyo tsi ha hikima ya urongozi, pare umuri wa pawa|muri wa pawa wa Kristi wasupuhe ushindzi.

Insa-Kristi ɗe ihikima na ushindzi wa Mungu

¹⁸ Mana ihaɓari ya ufa wa Kristi hari mwa umuri wa pawa, iyo ujinga ha wao wandrao waangamiye, ɓadi ha wasi rendrao rahuyiwe, iyo ushindzi wa Mungu.

¹⁹ Mana mauri ɗe iheli yaangihwa moni mwa uMuangishio Mutwaharifu: «Nitsoangamidza ihikima ya wendza hikima, nitsozima hatwi ĩlimu ya wendza ĩlimu.»

²⁰ A hav̄i umwendza hikima? A hav̄i umutaãlamu wa Sharia? A hav̄i umushindranifu wa lidunia lini? Hali Mungu kafanya ndzijinga ihikima ya lidunia lini?

²¹ Kweli amba ha iv̄o hari mwa ihikima ya Mungu ulemengu kawamujua ha ihikima yawo, Mungu waye aono afudhwali ha ndzia ya ujinga wa umujudzio wa umuri wa pawa ahuyi wao waaminio.

²² Mayahudi wasutsaha waone ãlama za midjuza na yaMagiriki wao, wasuzunguha hikima,

²³ wakati ulio amba wasi risumujudza Kristi aremwa mizumari hari mwa muri wa pawa, trongo ilio siɓaɓu ya mukwaliso wa Mayahudi, amma ujinga ha zinishani zangina;

²⁴ ɓadi ha wao wahiriwa, rangu Mayahudi ata Magiriki, Kristi waye ɗe ushindzi wa Mungu, tsena hikima ya Mungu.

²⁵ Mana trongo ya Mungu ionehanao amba ugedze, iyo yendza hikima rahana wanadamu, na uwambamba wa Mungu, uwo hodari rahana wanadamu.

²⁶ Wananyangu, namufikiri iheli mwaka wakati mwahiriwa: kav̄u wendza hikima wengi matsoni ha wanadamu, wala tsi wendza ushindzi wengi, wala tsi wengi wadzalwa hari mwa udjama wendza sheo.

²⁷ Ɓadi Mungu atsahua zilio ndzijinga ulemenguni, ile ajadze haya uwendza hikima; zi tsi zendza nguvu ulemenguni, Mungu azitsahua ajadze haya zendza nguvu.

²⁸ Mungu atsahua zilio ndziv̄ungufu ulemenguni, zitefulwao, izo kazisi, ile azime hatwi izo zilio,

²⁹ ha namuna amba v̄usuke ata shiumbe ishindre idzisifu mbeli za Mungu.

³⁰ Ne ɗe ha waye Mungu ɗe muliona uv̄umoja na Kristi-Insa, alio amba hatruju afanyishiha hikima yalawa ha Mungu: haki, mutwaharisho, na ukombofu,

³¹ ile mauri ɗe iheli yaangihwa moni na uMuangishio Mutwaharifu: «Mutru asifuo, namusifu ɗe Mola.»