Zuga Kèkko 14 - Suri Latin

Lɔga Ɛlɛa ꞉Barnabasi Ko Saoli Ikoniyomɔ

¹ Na hunaa Bhaulos ko Barnabas ɛlla Ikoniyomɔye, banda na ago doraa madhinɛnɛa zuga Ayhudhi lɔga Tumu damiya bɔɔ messɛa Ansokiyaa iho Bisidhagiye. Na madhtɛsɛ zugo kamannaa Yesusi na kɔbhtɛsɛ ko bhee gaɛ shɛɛ. Na zuga Ayhudhi ko bhorinya gen ga mɛra yɛbhɛyɛ.

² Na yɔk zuga Ayhudhi marrɛa ngalɔkta gen kɔnkɔnɔ bhorinyaa anaa ngani kamannaa Yesusi kɛyɛbhtao na kowoloktɛ ko zuga yɛbhbhɛa Yesus.

³ Na yɔk Bhaulos ko Barnabas tɛldi ngonu ungge mɛri na madhtɛsɛ zugo lɔga Komoruyny dhɛ dhɛ. Na aynɛ ꞉Komoruyɔ bhɛa mesɛa lɔga bo barara iwachiyɛa ꞉zugu na kataktɛ lɔga Komoruyny chirbhisiyɛa zugo hunde a dhereye.

⁴ Na yɔk zuga orony kendiyaa gaminya ramman. Na gam kona tɔrɔ zuga Ayhudhi. Gam kona tɔrɔ zuga ekko ꞉Yesusi.

⁵ Na zuga Ayhudhi ko bhorinya gen ko gulsachina gɛ daga go na kitiranydɛ Bhaulos ko Barnabas na kɔchɔ bɛnne na kinditɔ.

⁶ Na hunaa shikkɛa ngalɔktaye, ullugunydɛ na ago oriya ɛlla baa kèe Likoniya kènno Litira ko Derbe ko gaa ɛlla jaajaa.

⁷ Na madha zugo kamannaa challa ngonu.

Lɔga Ɛlɛa ꞉Barnabasi Ko Saoli Litiragiye Ko Derbegiye

⁸ Na dha bere Litiragiye lɔ hirre anyakuwaninya erimo na jagarre ngani kɔtɔyo dhul.

⁹ Na ligin bay na chirar Bhaulos hunde madhɛsɛn zugo lɔgɔye. Na gɔnyu ꞉Bhaulosi churr na tagu hunde lɔ yɛbhaa ibbayseo ilagaya nɛnɛye.

¹⁰ Na yogɛsɛ lɔgɔ goore na sɛɛsɛ, “Ga bana tunɔ na chil jagarre dib!” Na bana shaw na chilu tunɔ na tɔu.

¹¹ Na hunaa zugo orrɛa lɔga messo ꞉Bhaulosiye, ara wuy tuga Likoniya na se, “Yee gɛrɛɛ! Tumoa gayo kɛyɛbhbho ꞉aggeu a ngagiya! Wa ɛlɛhɛndɛsɛa zugo rɛhi na hoya bhɛa na!”

¹² Na Barnabas tɔgɔndɛsɛ sarre kèe “Diya”. Bhaulos nɔng tɔgɔndɛsɛ sarre kèe “Hermen” ke ngaya anɛ hira yokkono lɔgɔye.

¹³ Nɔng dha bere ngaɔrronu dheyyɔ lɔ doree eterrisanɛ tumua nɛ kèe Diya. Na gɔldanga Diya ko zug gena ibhta olinya na chɛbtɛsɛ karumoa kàraka gala bu hulnɛa na hoya chɔɔ ɔr waran na kudduldɛsɛ Bhaulos ko Barnabas go.

¹⁴ Na yɔk hunaa shikkɛa ngalɔktaye, munyu na ɛrrɛyɛ ruminya. Na nge gɔra zugony na artɛsɛ wuy

¹⁵ na seyɛsɛ, “Ngazukta nganga messo kɛ ɔng? Agge kanno zugo hung hunde nuye. Na kohonynyo na kòyoktogung kamannaa challa. Na bhɛa ngalɔkta hologun ninggɛye kumulɔng kènno tɛldi rɛna na wakta gɔra Komoruya iho basseyɔ bere bhɛllana tumu ko ba ko yirisi ko ngaahaya ɛl bayte kumulɔng.

¹⁶ Bɛrgunyaa bere kinginye annaa bhorinya kumulɔng messɛa damite hinnɛye na nɔng Tumu hun kona ngani kesɛɛsɛayo.

¹⁷ Nɔng hunde kako imaggoye, dhɔllagung bhɛa anɛa Komoruya challa na messogung lɔga challa dhɛynɛnɛo kali kali. Na ajjung guyɔ ko bɛrgunyaa suniyeo liwa na chassɛo na hinisi hɔlɛungu.”

¹⁸ Na hunaa yogɛsɛnɛa nganga na tewa ushaye, yɔk ngani zugo se kudduldɛsɛ go chi. Na yɔk tɔllɔsɛsɛ na go uddul dhɔyɔyɛ.

¹⁹ Na zuga Ayhudhi gen hoya Ansokiyagiye ko Ikoniyomɔ na kɔnkɔnɔ zugo na kɔchɔ Bhaulos bɛnne. Na chɔ na tugurtɛsɛ ɔr dhey. Yɔk sennɛ wa ere.

²⁰ Na zuga yɛbhbhɛa Yesus hoya na muknyɛsɛ Bhaulos. Na hunde ngani muknyɛsɛnɛye, nɔng bana na ogo ɔr toye na tungu. Na bhorroyɔ dhi ko Barnabas Derbegiye.

Lɔga Wokkonɛa ꞉Barnabasi Ko Saoli Ansokiyagiye

²¹ Na hunaa madhtɛsɛa zuga Derbe kamannaa challa na ga mɛra bhɔttɛa na yɛbhta lɔga Tumuye, yɔk koo waga Litiragiye ko Ikoniyomɔ ko Ansokiyaa iho Bisidhagiye

²² na kiriyi zuga bɔɔ yɛbhbhɛa Yesus na kete dhandali. Na madhtɛsɛ lɔgɔ na seyɛsɛ, “Hunde kèe kago bhɛa Tumu na kɔtɔlɔmiy ꞉nɛaye, maya kinyim chɔlla goore.”

²³ Na hana madhinɛnɛa kumulɔng bɛrtɛsɛ zuga bibiyo bhiy bhiy na kalliyɛy zuga yɛbhbhɛa kamannaa Yesusi. Na chɛbɛ rɛhi hunynɛn na ogoldɛsɛ yɔk Tumu na dhɔtɛsɛ Komoru Yesus hira bere yɛbhbhɛa.

²⁴ Na hunaa ogoldɛsɛa Tumu na tewa ushaye, banda na dha Bisidha na ago baye kèe Bhimbiliya.

²⁵ Na Bhimbiliyagiye lɔ ɔrre kèe Bhɛrga na madha zugo lɔga Tumu. Na hunaa madhta na tewa ushaye, ago ɔrre kèe Ataliya.

²⁶ Na banda Ataliyagiye na wakta Ansokiya gonggulɔ. Nɔng Ansokiya a ɔra bere kɛ̀bɛrranɛa Bhaulos ko Barnabas sabbɔ na kògolɛsɛna Tumu na kajjɛa lɔga kènno koyoktɛsɛ zugo kamannaa challa ori genne. Na mɛa lɔga bere kàjjɛa dheyta.

²⁷ Na hunaa dokkɛa Ansokiyaye, mukta zuga yɛbhbhɛa Yesus na kɔbhtɛsɛ lɔga mesɛsɛna ꞉Tumu kumulɔng. Na seyɛsɛ, “Chɔɔ zuga bhora anaa hunaa shikkɛa kamannaa challaye, Tumu owo hinisiya gɛ na yɛbhɛyɛ.”

²⁸ Na tɛldi ko zuga yɛbhbhɛa Yesus bhakkɛa Ansokiya ngonu dirr.