Yaykob 4 - Suri Latin

Lɔga Kàmarɛa Lɔga Bany Gɛrsa

¹ Na ngalɔkta ɛkkɛnyannɛnɛo na dhaginɛnɛoye, tisinya ɛnɛng? Ngatisinyao ngalɔkta chirkanno hinisiya gu toye na dhaginɛnɛo ko hinisiye?

² Chirkanno lɔk gena na nɔng bhee orɛo ninggɛ na koo nisso zugo. Na chɔɔ chirkanno ahaa zugony goore na bhee orɛo ninggɛ na koo ɛkkɛnyannɛno na dhaginɛnoyɔ. Nɔng bhee ngaorɛoyoye, a ngaya Tumu ngaogolɛoyoye.

³ Na chɔɔ hunde ogoloyɛ, Tumu ngaajjungo, ke ngaya ogolɛo hinisiya bo gɛrsa na senno ale ɛdhdhɛttannung igge sɔngge.

⁴ Ngazukta sabbi dhittinɛ hɛtto ko tɛrroa messɛa lollumoye, ngaya ganɛnɛo ko lɔga banyde, hunde a bhɛa marnɛnɛo ko Tumuye, imaggoyɔ dha? Hirre se kete dehunya zuga marrɛa Tumu nɔng a mirogiya Tumu.

⁵ Chɔɔ lɔga ɛlla dadaba Tumu annaa sennɛa, “Tumu chirkan kuloya bere ajjiy agge kɔ̀lɔmma hinisichinne toye goore na agge kète ga gɛnyɛ sɔng.” Na ngalɔkta igge senno bere yokkono ke butomo hung?

⁶ Nɔng chirbhisiey goore dhogoy na aynde lɔga ɛlla dadaba Tumu senɛ, “Tumu mar zuga dhunggurrɛa, na chirbhisi zuga lachchanɛa rɛhiye.”

⁷ Ngamɛa igge rɛhiya gu ayɛ Tumu na kɔtɔlɔmung :nɛa. Na Moldoy tamara na chugutɔ na aynde ale jorrɛungge.

⁸ Na ago gɔra Tumu na ko nɔng aynde ale assanɛungge. Ngazukta messo lɔga gɛrsaye tonydo sɛnɔ! Na ngazukta dhaginɛno ko hinisiye, tonydo ridhinga lɔmmo hinisichinne na tɛldi hurr.

⁹ Na shurtɛ na munyu na turgi goore ke ngaya lɔmmɛo ridhingge. Na lɔga shigɛo any kɔbhɔdhtɛ na kete ga ruyɛo, na ga dɛllo any kete ga munyusɛo.

¹⁰ Na bhɛa Tumu layta rɛhi na nɔng kojjung na te zuga bibiyo.

¹¹ Gochonginyaye, kɛngɔ dari ngakennɛno. Hirre ken gochonga nɛnɛ na ujjukkanaye, ngangaye ken Damiya Tumu na ujjukkanayɔ. Nɔng hunde ujjukkana Damiya Tumuye, ngangaye dami ngabhɛkko na se kete hira kedhdho lɔga Tumu.

¹² Na inye nganda dhumman rɛ na seni ken lɔga zugonyde ani nɛng? Nɔng Hira Ajjiy Dami ko Na Kedhdho Lɔgɔ, a Tumu dhɔnɛnɛ sɔng. Na chɔɔ nɔng anna ibbayseiy ko na iggarisey.

Lɔga Kìbbayɛa Zuga Dhɔngngɛa Rɛhi

¹³ Ngazukta senno, “Mɛa oo rogonɔ kɛhɛo ɔrre kihinnoye na kɛllo oyo dhɔnɛ na kemesso ngagaymo na kitissano birinyaye,” ga shigitɔ!

¹⁴ Yɔk lɔkte rogonɔ dokkonoye imaggoyɔ. Ga ɛlɛhɛnɛ lɔga basseyiya gu. Yɔk heo ko wanggaya korro na garsa mɛarrɛ.

¹⁵ Igge maya senno ɛnɛnggeo, “Hunde se :Tumu na ngani kɛllo basseyɔye, ale kèmesso nganga ko nganga.”

¹⁶ Na nɔng igge anno ngagiya marro ngalɔkta na dhunggurro na dhɔngngo rɛhiye. Yɔk ngalɔkta messo ngangaye kumulɔng a kuhuyamo.

¹⁷ Nɔng hirre ga lɔga challa kènno keme na ngamessoye, nɔng me lɔga gɛrsa.