Matiyos 4 - Suri Latin

Lɔga Kìllobɛa Yesus Korugiye

¹ Na koo Yesus ɔgɛ :Kuloya Tumu korugiye na killob :Moldoyɔ.

² Na hunaa chɛbba rɛ hozzo ungo 40 bar ko kali na tewa ushaye, koo dhagu :hozzo.

³ Na Moldoy ko na sɛɛsɛ, “Hunde ani Eriya Tumu dhereye, ga sɛɛsɛ ngabɛnda na kɔbhɔdhtɛ ke amissɛ!”

⁴ Na nɔng yagɛsɛ na sɛɛsɛ, “Lɔga Tumu bere kɔ̀gɔdhdhɛsɛna dadab sennɛ, ‘Hiri amissɛyɔ sɔng ba ngabhakko. Bhak lɔga yokkono :Tumu kumulɔng.”

⁵ Na koo ɔgɛ :Moldoyɔ Yerusalemɔ ɔra kɛnginyana ridhing ningginɛna na ojju doraa Tumu barara kuragiye tundɔ.

⁶ Na sɛɛsɛ, “Lɔga Tumu bere kɔ̀gɔdhdhɛsɛna dadab sennɛ, ‘Tumu ale ajjɛ zuga ekko :nɛa lɔgɔ na bhɛkkinyɛ na boinyɛ sɛnɛ na chɔɔ bɛ jagari ngaujjenynyo.’ Na mɛa hunde ani Eriya Tumu dhereye, ga hauk rɛ ngaya.”

⁷ Na nɔng Yesus yagɛsɛ na sɛɛsɛ, “Ko yɔk lɔga Tumu bere kɔ̀gɔdhdhɛsɛna dadab sennɛ, ‘Komoruya nunu Tumu ngaillobi.’”

⁸ Na koo ibha :Moldoyɔ sɛgɛn na ɔgɛ kutula bo rammaya tundɔ. Na dhɔlɛsɛ ba hana allinɛnɛa :komortɛnnu kumulɔng ko bhɛa anɛa na bo challa kìwacheo dhogoy.

⁹ Na sɛɛsɛ, “Hunde tɔgɔdhagany kɔmma na eterrisananyɔ, kajjiny ngabaya allinɛnɛ :komortɛnnuye kumulɔng na allinɛnɛ :inyo.”

¹⁰ Na nɔng sɛɛsɛ, “Ay! Ok ngagɔrronu Ngamoldoyta nganda! Yɔk lɔga Tumu bere kɔ̀gɔdhdhɛsɛna dadab sennɛ, ‘Kɔmma tɔgɔdhɛsɛ Komoruya nunu Tumu na tagay nɔng sɔng.’”

¹¹ Na koo Moldoy dhɔyu nɔng na ogo. Na yɔk zuga ekko :Tumu hoya na tagaya nɔng.

Lɔga Kɔdhdhanɛa :Yesusi Madha

¹² Na Yesus hunaa shikko hunde dha bɔɔ Yohanis kɛ̀chɛbɛɛye, wagu Gelilagiye.

¹³ Na koo dhɔyu Naziret na ogu ɔrre i yirisiyɔ tugɔ kèe Kibirom na bhagu ngonu. Nɔng ngaɔrronu dha bere i baa zuga Zabiloni ko Nibitalemi.

¹⁴ Na bhee kɔɛ ngaɔrronuye, dha bere se kurrugɛsɛ lɔga bere yokkono :hira yogɛsɛna zugo lɔga dhugunono :Tumu kèe Isayas sennɛa,

¹⁵ “Ngazukta bhakkɛ baa zuga Zabiloni ko Nibitalemi ɛl ko bhorinyaa anaa Yordanosɔ tandɔ baa kènno Gelila, Ganggua Yirisiny dheyyɔ,

¹⁶ na ko mɛa ngani ɛl kɔrrɔynɔye, wa arta hɔldina bo gore. Na ngahɔldinda wa terinya ngazukta ngani bhakkɛ baa nyabbunyde.”

¹⁷ Na ngabɛrguonu Yesus tɔgɔdhay bhɛa madhɛa zugo lɔga Tumu. Na madhɛsɛ na sɛɛsɛ, “Kolea senno kɔtɔlɔmɛ :Komoruya tumony zugo mɛa te ja. Na mɛa ujjugu lɔga gu gɛrsa.”

Lɔga Bɛrranɛa ꞉Yesusi Zuga Sabbune Kɔbhbhɛa Nɔng

¹⁸ Na kali kona hunaa Yesus woo yirisiya Gelila tugɔye, aru zukte ku gɔ̀ynggɛ ramman hunde ujjugɛsɛnɛ galiya ibhɛa urgusa yirisi toyeye. Yɔk dha bere a zuga ibhbhɛa urgusa, na kona a Simonde keli Betiros, kona keli Indiriyas.

¹⁹ Na sɛɛsɛ :Yesusi, “Ga hoya kɔbhtaanyu, na kàmadhung na kòjjung ke zuga mukkano zugo ngadamita ibhɛo urgusaye!”

²⁰ Na yɔk dhɔyɔ gala gɛ ibhɛa urgusa ke tiri na kɔbhɔ nɔng.

²¹ Na hunaa hɛa ko bhe chinyiye, nɔng aru erroa Zɛbɛdosi ku gɔ̀ynggɛ rammane, Yaykob ko Yohanis, hunde ɛl ko chɔgɔnɛ gonggulɔ tundɔ na ɔdhdhɛ gala gɛ ibhɛa urgusaye. Na eliu.

²² Na yɔk dhɔyɔ chɔgɔnɛ ko gonggul ke tiri na kɔbhɔ Yesus.

Lɔga Ibbaysiyɛa :Yesusi Zuga Ilagassɛa

²³ Nɔng Yesus bere woo baa Gelila kumulɔng na madhdha zugo doriyoa gɛ madhinɛnɛa lɔga Tumu, na kɔbhɛsɛna kamannaa challa ale lɔmɛa :Tumu zugo. Na chɔɔ bere ibbayseo zuga ilagassɛa mutanyoga bhiy bhiy ko ga chɔllaa bhoyɔ kumulɔng.

²⁴ Na koo kamannaa nɛnɛ shigi :zugu kumulɔng na tɛhɛtɛy ko baa Soriya. Na zugo hoyɛy zuga ilagassɛa mutanyoga bhiy bhiy, ko ga chɔllanɛna ilagayɛna bo dhandala, ko ga tɔgɛsɛnɛa :mɛnɛngu, ko ga amma kalalɛ, ko ga chudhinɛna kumulɔng na ayɛsɛ nɔng na ibbaysiu.

²⁵ Na hunaa anna ngangaye, zuga bo mɛra hoya na kɔbhɔ nɔng. Yɔk ngazuktonu dha bere gena hony baa Gelila, gena hony baye kèe Ori Tɔmmɔn, gena hony Yerusalemɔ, gena hony baa Yudha, na gena hony baa iho Yordanosɔ tandɔ.