Lɔgɔ Sabba 3 - Suri Latin

Lɔga Ɛddɛanɛa :Hiriyɔ Lɔgɔ

¹ Na bhɛa kɛginyaa bere ghendono ꞉Komoruyɔ Tumu kumulɔng, kono nɔng dha bere a ghurghuri. Na kali kona koo ghinu tɛri na sɛɛsɛ, “Ngangaye, Tumu se kèe ngakɛnda ɛl darɔye kumulɔng ngaammo?”

² Na tɛri yagɛsɛ na sɛɛsɛ, “Tumu bɔɔ sennagiy, ‘Ngakɛnda ɛl darɔye kawarɛ usigiyɛ

³ Na nɔng ngakɛta i darɔ kɛrghɛnɔye ngaammo. Hunde chɔɔ idharroye, rɛssoyɔ.’”

⁴ Na nɔng kono sɛɛsɛ, “Ngarɛssoo dhul.

⁵ Nɔng se ngausigi ngakɛta kawarɛ na kawara gu koyɛ na ngɛrɛ lɔga challa ko ga gɛrsa hunde nɛnde na tɛhɛyɛ ko nɔng.”

⁶ Na tɛri hunaa jɔana kɛyɔ kawarɛ bhɔlbhɔldin, ko bhɛa anda kàmmɛa na kàggayɛa bhoye, dhuya na ussu. Na koo aynɛ hira nɛnɛ na ko nɔng ussu.

⁷ Na rammane kawarɛ oyɛ na taga bhɛa ɛlɛa ngaulo. Na ibhta bhalloga bhogoniyony na arakudhana na bhildɛ rɛhi.

⁸ Na hunaa senno bho kabarte, shigi Komoru Tumu hunde wo darɔye, na maga ba kɔshiyɔ.

⁹ Na nɔng Komoru Tumu eliu hiri na sɛɛsɛ, “Ngahirrae! Ihi ori?”

¹⁰ Na hiri sɛɛsɛ, “Wa kishigenyɔ jagari hunde wo darɔye na kɛtɛngɛrinyɔ na kullugunyɛu ke ngaya kihɛ ngauloye.”

¹¹ Na sɛɛsɛ ꞉Tumu, “Bhee woɛ ngauloye yokkoginy :noy? Wa ussu kɛya bɔɔ kaganyɛinyi?”

¹² Na hiri sɛɛsɛ, “Wa dhuyaa ꞉ngatɛrita bere ajjany :inyo na kɛ̀tɛldo kariye na aanyɔ na kussa.”

¹³ Na Komoru Tumu ghinu tɛri na sɛɛsɛ, “Ngalɔkta wa mesiye aggee kunɛnɛng?” Na nɔng seu, “Wa tabhaganyɔ ꞉kono na kussa.”

Lɔga Attiya :Tumu

¹⁴ Na nɔng Komoru Tumu sɛɛsɛ kono, “Ngaya mesɛ ngangaye, inye mɛa ale kɛnginyan bhɛa kɛginyaa dusuny ko bhɛa ahaa kìwoo ko bhɛa ahaa ɛlla bay ngaya kumulɔng na ani chɔrnɛ. Na silolnɛn bay bay na oynya kumulɔng ami ba.

¹⁵ Na inye ko ngatɛrita ale annɛno mirɔkɔn. Na ko nɔng ashaya nunu ko na nɛnɛ ale annɛ mirɔkɔn. Na nɔng ale rɔnyiny sabbaa nunu. Na inye ale ngɛti tiinyoya nɛnɛ.

¹⁶ Na koo sɛɛsɛ tɛri, “Ngaya mesɛ ngangaye, mɛa inye kajjiny shura. Na hunde ale lɔmman eriye, kala hudhuginɛnɛi, ale chɔllanɛn goore. Na ko hunde kete nganga, nɔng inye ale ngani hini hira nunu chi, na hira nunu ale allinɛnɛiny inye.”

¹⁷ Na koo sɛɛsɛ hiri, “Ngaya shigɛ lɔga yokkoginyi :tɛriya nunu na ammɛ kɛya bɔɔ keni ngaamiye, mɛa ba any kete chɔrnɛ. Na amissɛa ami oynya kari ale messo yira nunu.

¹⁸ Na mɛa ba ale chillanɛ :birinnu ko :kazoku na inye ale ami kɛnɔ kawarɛ.

¹⁹ Na amissɛa ami, ale kachan dheriya nunu ko bhee rɛsɛ na wogɛ na anɛ ba ke ngaya bere kèghendonɛiny baye. Nɔng inye ani ba, na ale wogi na ani ba.”

²⁰ Na Adam tɔgɔdhɛsɛ tɛriya nɛnɛ sarre kèe Ngahɛwan ke ngaya anɛ mama zugony kumulɔngge.

²¹ Na Komoru Tumu ngɔnya sayo ramman na aynɛ Adam ko Ngahɛwan na maluguyɛ.

²² Na seu, “Nɔng mɛa Adam dhaa tagu bhɛa ngɛrɛa lɔga challa ko ga gɛrsa hunde naye. Na mɛa ga kàtaganydɛ bhɛa kɔyɛa na dhushshanɛa kɛya basseyny kawarɛ na ammɛa na ihɛa basseyɔ dhul.”

²³ Na Komoru Tumu taganyɛ Adam dara bo challa iho Ɛdɛnɔ na chugu na kok na kɔɔs baa bere kèghendonɛa nɔng.

²⁴ Na hunaa chukka na tewa ushaye, koo ibha zuga ekko ꞉nɛa bo ɔnnɛna kèleo Kurubel ko mashaa bo bhadhdha na bhɔdhinɛna til til huna talanguny, na ojju dara iho Ɛdɛnɔ gɔra yaluny na kɛbhɛgɛ ganggua kɔa bhɛa ihɛa kɛya ajjiy bassey.