Lɔgɔ Sabba 22 - Suri Latin

Lɔga Illobɛa :Tumu Awuraham Na Senno Kuddulɛsɛ Hoynɛ Tumu

¹ Na koo Awuraham illobu ꞉Tumu na eliu na sɛɛsɛ, “Awurahame!” Na nɔng elɛɛ na seu, “Woy, kani nganda.”

² Na sɛɛsɛ ꞉Tumu, “Ga dhuma ngaerita nun ku dhɔnɛ yeli goore kèe Isakte na dhigan baa Moriya. Na ngonu ale kɔdhɔllaginy kutul kona na ibha nɔng na uddulogony anye.”

³ Na bhorroyɔ shaw Awuraham bana na tɛngɛdha kɛna senno kuddulɛsɛ Tumu go. Na dhuma aha na chɔdhɛsɛ sigirɔ. Na eliu Isak ko gaymanyaa gɛnyɛ gee ku ramman na banda na ago gɔra bare senɛsɛna ꞉Tumu.

⁴ Na hunaa tɔya ungo sizzi gɔrɔye, Awuraham gɔnyu ba na dharɛsɛ bhɛa bortɔ yogɛsɛna ꞉Tumu ko rɛna.

⁵ Na sɛɛsɛ gaymanya, “Ga bhɛgɛ sigirɔ ngaya. Anye ko eriya nanu ga kayto ngonu na kɔgɔndhɛsɛo Tumu kɔmma. Na hunde kɔgɔndo kɔmma na te ushaye, kowokkonoyɔ.”

⁶ Na ibha kɛnaa senno kudduldɛsɛ Tumu go na aynɛ Isak na kɛtɛa :nɛa. Na nɔng Awuraham lɔgɔna wara ko go. Na hunaa hɛaye,

⁷ Isak eliu chɔgɔnɛ na sɛɛsɛ, “Babaye!” Na chɔgɔnɛ elɛɛ, “Woy! Seni ɛnɛng?” Na sɛɛsɛ :Isaki, “Yɔk kɛnɔ ko goa kùddulɛsɛna Tumu a ngagiya kɔlɔmbe. Na mɛdɛrte kuddulɛsɛnde i ori?”

⁸ Na sɛɛsɛ :Awurahami, “Eriya nanuye, mɛdɛrte kuddulɛsɛnde ale oy ꞉Tumu kɔk.” Na ago.

⁹ Na hunaa dokkɛa bhɛa bortɔ senɛsɛna ꞉Tumuye, nɔng Awuraham esheo ngawu na ibha kɛnɔ na ɛsɛdhu ngawugiye tundɔ. Na ibha eriya nɛnɛ Isak na chɛbu jagarɛ ko sɛnɔ na bhagɛsɛ ba kɛnaa ɛsɛdhdha ngawugiye.

¹⁰ Na koo hɔrɔa wara na kin eriya nɛnɛ.

¹¹ Na nɔng hira ekko ꞉Tumu tɛu tumɔ na eliu Awuraham na sɛɛsɛ, “Awuraham! Awurahame!” Na nɔng elɛɛ, “Woy, kani nganda!”

¹² Na sɛɛsɛ ꞉hira kèkko, “Ɔdda! Ngame eri hun kona! Bhɛa anɛi hira ɛngɛrsi Tumu wa katagga ke ngaya eriya nunu dhɔnɛna ngani ushubhbhɛanyoye.”

¹³ Na nɔng Awuraham dhɔnga sabba na aru mɛdɛrte ku ole kuzubiyɔ toye hunde kɛrrɛɛna ibhbhɛ ꞉kɛnuye. Na ogu na tuguro na sɛrɛu bhɛa eriyny na uddulɛsɛ Tumu.

¹⁴ Na ngabaonu tɔgɔdhɛsɛ sarre kèe, “Ale Oy :Tumu Kɔk.” Na ko mɛa toye zugo sennɛ, “Ale ojjogiy :Tumu kutula nɛnɛ kɔk.”

¹⁵ Na hira ekko :Tumu eliu Awuraham tumɔ sɛgɛn

¹⁶ na sɛɛsɛ, “Tumu sennaginy ɛnɛnggeo, ‘Anye mɛa kibhiikkaginy lɔgɔ ke ngaya mesɛ ngalɔkta na chɔɔ eriya nunu dhɔnɛna ngani ushubhbhɛanyoye.

¹⁷ Na anye ale kutuheny na kɛbhɛlliny na ashaa gunyu hɛt ko munyunya tumony ko kassaya yirisiny. Na dhakkanɛ oriya mirɔga gɛ na sɛrɛɛ ke gɛ.

¹⁸ Na bhorinyaa bany kumulɔng ale tuhinɛnɛ hoyaa gunyu ke ngaya shigɛ lɔga ganyuye.

¹⁹ Na koo Awuraham wagu bhɛa gaymanyaa gɛnyɛ na banda na dhi Bersabagiye kari na tɛu ngonu.

Ashaa Nakori

²⁰ Na kali kona Awuraham shigu lɔkte sennɛ, “Tɛriya goonu Nakori kèe Ngamilka dha bɔɔ hudhugo erroye ku lusa.”

²¹ Na eriya ku aw keli Uz. Na gɔynggɛa chicho keli Boz ko Kemuyel (nɔng Kemuyel a baba Arami)

²² ko Keset ko Hazo ko Bhilday ko Yidala ko Batul.

²³ Na nɔng Batul koo irriyo Ngaribika. Na nɔng Awuraham gɔynɛ Nakor irriyo ngaerroya gɛny ku isseyte bhɛa Ngamilka.

²⁴ Na koo irriyo erroa maya gen bhɛa tɛriya nɛnɛ chinynyo kèe Ngaruma. Na ngaerroonu keli Tebba ko Gaham ko Tahay ko Makka.