Lɔgɔ Sabba 16 - Suri Latin

Lɔga Agari ko Ga Ismayeli

¹ Na tɛriya Awurami Ngasaray dha bere wo hɔlɔng. Na nɔng Ngasaray bere lɔmma gaymayte ku sedhdheya Gibsi kèe Agar mesinɛ bhɛa nɛnɛ.

² Na sɛɛsɛ hira nɛnɛ Awuram, “Anye mɛa taganyɛany ꞉Tumu eri na ngakuhudhuginɛni. Na ga ok assa ngagaymayta nande. Kako aynde kɔjɔan eri bhɛa nɛnɛ.” Na Awuram damiyaa senɛsɛna ꞉Ngasaray shiktɛ.

³ Na hunaa Awuram bhakka Kanan oynya tɔmmɔn na tewa ushaye, Ngasaray aynɛ Awuram gaymaya nɛnɛ Agar ke tɛriya nɛnɛ chinynyo.

⁴ Na koo tunggi kari na tɔlɔma eri. Na nɔng Agar hunaa arra rɛa nɛnɛ hunde lɔmmana erite, bhassu karbaya bany.

⁵ Na nɔng Ngasaray sɛɛsɛ Awuram, “Mɛa ngalɔkta kɔ̀chɔllayɛanyde tɔlɔ ꞉inyo sabbaa nunu. Nɔng gaymaya nanu kajjiny ꞉anyo tɔllɔng. Na mɛa aru rɛa nɛnɛ hunde lɔ erite na bhasany anye. Na ngalɔkta gaye any kegen ꞉Tumu.”

⁶ Na nɔng sɛɛsɛ, “A challi. Nɔng gaymaya nunu i siya nunu na damite hiniye messo.” Na Ngasaray koo tiranyɛ Agar goore na hangɛ.

⁷ Na hira ekkono ꞉Tumu aru Agar ɛlaa iho korugiye. Na ngaɛlaonu i ganggua kɔa Shurɔ dheyyɔ.

⁸ Na nɔng sɛɛsɛ Agar, “Gaymaya Ngasaray Agare, kuni ori? Na seni ok ori?” Na sɛɛsɛ ꞉Agari, “Kojori lɔga karbaya dori.”

⁹ Na hira ekkono ꞉Tumu sɛɛsɛ, “Wak bhɛa bere nunu na tagay karbaya dori.”

¹⁰ Na yogɛsɛ lɔgɔ sɛgɛn na sɛɛsɛ, “Anye ale kɛbhɛlliny na ashaa gunyu bhɛlnɛ na toyi rɛkkiytɔ.

¹¹ Na mɛa inye lɔmi eri kɛngɔ na ale ngaeritonu kalde hudhukkonde, a may. Na tɔgɔdhɛsɛ sarre kèe Ismayel ke ngaya Tumu shikɛiny na orɛ chɔllaa nunuye.

¹² Na nɔng ale hɛ ko bɛa ku ariy na mar zugo ko bhɛnɛna gɛnyɛ kari. Na ko nɔng marrɛ ꞉zugu na kɛngana rɛ na bhak bhichang.”

¹³ Na Agar iwachiyɛ na seu, “Yee, Tumuaa orronyi, wa karra ngaya sɛgɛn!” Na komoruya yogɛsɛna nɔng lɔgɔ tɔgɔdhɛsɛ sarre kèe “El Roy.” Na El Roy a bhɛa kènɛa “Komoruya Orronyi.”

¹⁴ Na ngaɛlaonu i Kadesɔ ko Baredɔ kɛrghɛnɔye kɔ̀tɔgɔndɛsɛ sarre ke “Bɛr Lay Roy.”

¹⁵ Na Agar irriyɛsɛ Awuram erite may. Na Awuram koo tɔgɔdhɛsɛ sarre kèe Ismayel.

¹⁶ Na huna Awuram irriyɛsɛna ꞉Agari eri, oynyaa gɛnyɛ a 86.