Dadaba Yonasi 4 - Suri Latin

Lɔga Chirbhiseo ꞉Tumu Zuga Nɛnɛwe

¹ Na hunaa Tumu zugo ngani ngadhittoye, nɔng Yonas hini te chinyi na munyuwu gore.

² Na alliyɛ ko Tumu na sɛɛsɛ, “Komoruye, hunaa bare kihi ɔrɔ lɔga bare kɛsɛdhi ngaanno ngalɔkta rɛ? Kagainydɔ hunde hinisa nunu a bu na ani challi na chirbhisi zugo kali kali na guyi lɔgɔ na zugo shaw ngadhiyioye. Na bhɛa bare kojorɛi lɔga gunyu na kengesɛi Tersesegiye, anggiya rɛ.

³ Na mɛa Komoruye, any kère. Ko bhee kihɛ basseyɔ hunde kère, a challi.”

⁴ Na nɔng Tumu sɛɛsɛ, “Seni dɛbɛ ore gore ngangaye?”

⁵ Na nɔng Yonas bana na ogu ɔr dheyyɔ gɔrre yalunyde na dhagu gaha kete riy na tɛu bay. Se kɔgɔny lɔkte ale dokonɛ zuga Nɛnɛweye.

⁶ Na koo Komoru Tumu mesɛsɛ kɛya hɛtta ko kugumi na chilu shaw shaw na kulubɛ su. Se kɛtɛ bhɛa bo lalna. Na hunaa kèmesɛsɛna ngangaye, hini te hɔli.

⁷ Na nɔng bhelleyɔ Tumu kuyɛy kuruyoy kona na ussu kugumi bhɛa ku morok na dhɔrɔgu kak.

⁸ Na hunaa su ujjonoye, kuyɛy yelegoya bo awurno yalɔ. Na Yonas dhagu susɔ ko bhee rɛ anɛ dildiliye. Na tɛhɛnu rɛsɛ na seu, “Ko bhee kihɛ basseyɔ hunde kère, a challi.”

⁹ Na Tumu sɛɛsɛ, “Inye bhee dɛmnɛ ngakugumita ninggɛ.” Na nɔng Yonas sɛɛsɛ, “Anye maya kɛdɛmni ko bhee jagarɛ kɛrɛsɛ.”

¹⁰ Na nɔng Tumu sɛɛsɛ, "Inye anna wa munyusi galiya chɔɔ ngani dugayo chillana mɛa na rogonɔ dhɔrɔgɔsa.

¹¹ Na anda anye ngakumunyusɛo ngaɔrra lɔ ngaerroya ku shiinya 120 ko gen toyeye ko ngaahaya mɛzzi rɛk bu mɛr bhakkɛ Nɛnɛweye?”