Dadaba Yonasi 1 - Suri Latin

Lɔga Jorɛa :Yonasi Tumu

¹ Kali kona Tumu yogɛsɛ liya Amate kènno Yonas lɔgɔ na sɛɛsɛ,

² “Bana ok ngaɔrronu bu ke Nɛnɛweye. Anye bare kɔjɔyau lɔga gɛ gɛrsa, no ibbaytɔ.”

³ Na Yonas nɔng kedhdhɛsɛ lɔga Tumu ba na kajar Tumu Tersesegiye. Na bana na ogu chɔɔ ɔra kènno Yobe. Na jɔa gonggula bo kɔa Tersesegiye na gadhiu birinya na dhɔyu lɔga dhugunɛsɛna ꞉Tumu na tunnugu gonggul na ogu.

⁴ Na gonggul hunaa kɔa na dokko ma kɛrghɛnde, Tumu kuyɛy huroyte dhandali na ma bhɔttɛ na ajo gonggul ngani kubɛ.

⁵ Na zuga kuliyɛa gonggul dɛɛbɛ na tɛngɛrɛ bho na ogolo tumoa gɛ na kɛyayɔ. Na ibhta ahaa ɛlla gonggulɔ na ujuktɛsɛ ma na kɔta gonggul na kete hɔlhɔli. Na Yonas nɔng ungu gonggulɔ bhɛa unguny toye luy.

⁶ Na gulsaa gongguluny koo assa nɔng bhɛa ungusɛa na ibbanisiu na sɛɛsɛ, “Ay! Nganga ngaungusi! Bana na ogol Tumua nunu. Kako karriy na kibbaysieytɔ.”

⁷ Na zuga kuliyɛa gonggul se, “Ga, kèmesigi dami na kàtaga hirre lɔ ridhing na honynyɛ ngalɔktaye.” Na mesigi na te Yonas.

⁸ Na ululumana na seyɛsɛ, “Ga, dhugunogiy lɔgɔ! Ngalɔkta hɛsagiyɛ aggeye tisana noy? Na inye ani hirre lɔkte guny mesiye a ɔng? Na kuni ori? Na kuni ba inong? Na ani bhor inong?”

⁹ Na nɔng sɛɛsɛ, “Anye kani hira Isirayeli na kɛyɛbhi Komoru Tumu, na bere ghendono ba ko tumu na iho tumɔ.”

¹⁰ Na dhugunɛsɛ lɔga bare messo ꞉nɛa na taga bhɛa bare jorɛa Tumu. Na dɛɛbɛ na seyɛsɛ, “Na ngalɔkta gɛrɛ ku ngangaye bare mesi kɛ ɔng?”

¹¹ Na hunaa huroy mɛdhaye, yɔk ghini Yonas na seyɛsɛ, “Na mɛa kèmesiny ɛnɛng na ma kalaldayɔ?”

¹² Na nɔng sɛɛsɛ, “Ngalɔkta hɛsagungɛye kaggayɔ hunde mesinyanɛ lɔga ganyuye. Na hunde ujuktaganyu ngamaya toyeye, lalnanɛyɔ.”

¹³ Na yɔk zuga kuliyɛa gonggul se kayaga gonggul dheyyɔ. Na illobo tɛr tɛr na ngani ngaɔninyao. Na ma irrɔkta dhɛ dhɛ dhɛ.

¹⁴ Na yɔk zugo turtɛsɛ Tumu na seyɛsɛ, “Komoru Tumuye; hunde kujugɛsɛno ngahirra ma toyeye, gigey ngaajjiy. Anna hinoni ꞉inyo tɔllɔng na kemesso ngangaye.”

¹⁵ Na yɔk ibhta Yonas na ujuktɛsɛ ma na maa bo ɔnnɛna lalda.

¹⁶ Na yɔk hunaa orɛa ngalɔktaye, tɛngɛrɛ Tumu gore na udduldɛsɛ Tumu go na bhiigi ko Tumu lɔgɔ.

¹⁷ Na nɔng Tumu ibha urgusiya bo gore na gɔyu Yonas. Na nɔng saniu urgusiyɔ kɛngɔ ungo sizzi ko kaliɛna sizzi.