ZEKHARIA 9 - Sumi Naga CL (Re-edited) Bible (BSI)

Israel Ghümi shou Küghakütha

¹ Ampeu tsa no Hadrach yeghi shou ikughi ani eno Damascus no tipau kulhokiqhi ake. Kughengu Ampeu nhethi ye timiqo shou eno Israel shiaye kümtsü shou jupuku ani,

² Israel sasü kughuthu akeu Hamath, eno Tyre ngo Sidon no ighono alokütsü kemu tipaqo shou ghi jupuku ani.

³ Tyre ye qogheki shiqhevae ghükayi no ayeghimkhu toi, eno ameshoyi kivi no alaghi lo aniba toi amoqhevae.

⁴ Ikemu julo, Ampeu no li küakini süwuve tsü nani azüghi lo li küka kütsave tsü nani, eno li ye ami no pitileve nani.

⁵ Ashkelon no ti ithulupe msa nani; Gaza ghi amloiju ihi nani; Ekron ghi, kughengu pa küpkhü ye kübangüvae. Akükau ye Gaza lono pühave nani; Ashkelon ye küghüna moae;

⁶ mshomishimi no Ashdod lo küghünauve nani, eno I no Philistia qheküza kishekhave tsü nani.

⁷ I no pa kichi lono aji luvetsü nani, eno ahu dolono aphikümqhüpu luvetsü nani; pa ghi ni Lhouw ghükulumi shive no Judah lo alagha lakhi toive nani, eno Ekron ye Jebusimi toive nani.

⁸ Tishino I no aghukhemi toi I kilo ngokhe luve nani, tishianguno khunomu ipe-ilomo; nedaqoda kemi khunomu pano qhasü ighi kithemo nani, kughengu itehi ye I nhethi ampi no ithuluvae.

Zion Kükau Chekeu

⁹ Shishe alovilo, O Zion limi! Ighamku lo, O Jerusalem limi! Julo, o kükau ye o lau chenie; Pa ye achipiu eno xakuluu, aqhokigheu shi khurha sacheni, khurhati shou ikuno chenie.

¹⁰ I no Ephraim launo khurkulu eno Jerusalem launo aghükishi khurshi ikhive nani; aghüshi shexilika ikhive nani, eno pa no shiyeqo lau külakishi tsa pi nani; pa yekipe no azüghi lono azüghi kutolo eno Aghoki lono ayeghi shekha kutolo shinani.

¹¹ Iw puloshoqhi ji nongu sasü shikeu ghenguno I no azü kühakeu qokutho lono now akughumi khaqhi pheni.

¹² Now sükusho-a lo ideighilo, O lajupu akeu kughumiqo; ishi no I no shuphe anike küghüsü no nongu tsüchileni.

¹³ I süzü toi I no Judah piqevae; Ephraim pesü tipau piji shivae. I no o nuli xukutho nani, O Zion, o nuli lachile nani, O Greece, ghüshimi zütakikihi toi o peithani.

Ampeu no Paw Timi Xaluni

¹⁴ Tileno Ampeu no panongu lau ipeghi nani, Pa piji no tsütsüpha toi ighi nani; Ampeu Alhou no afuko küigha nani eno apeu miyitsü lono ighi nani.

¹⁵ Aqokitikhi Mpeu no panoqo süsho nani, panongu no kütsale eno akighi lono atu kihi chekemi theqhive nani, panongu no atsaiji sho nani eno shomzü akeshi igha nani, akiptia chekuqo pütsüni ye akhu chhitoi akeshi nani.

¹⁶ Tipani Ampeu panongu Lhou huno Paw timi loji xalu nani; kükakütsüqho lo achiku toi panoqo no Pa yeghi lo vü nani.

¹⁷ Kughengu Pa kivi eno Paw jukivi ye kishi kije kelae! Ashothi no apumiqo eno atsaizü kithe no ilimiqo pelo nibonilei lupe nani.