ZEKHARIA 8 - Sumi Naga CL (Re-edited) Bible (BSI)

Zion Kinikülü eno Külakishi

¹ Aqokitikhi Mpeu tsa ighi eno pi,

² “Aqokitikhi Mpeu no piani: Ni ye Zion ghenguno shishe anheshu ani, Ni ye aloghu kije lono li ghenguno aghichipo ani.

³ Ikehu Ampeu no piani: Ni ye Zion lo ideighivae eno Jerusalem lo ngouve nani, Jerusalem ye pükhükulupu mishighüna, eno aqokitikhi MPEUw naghuto, akimthe naghuto ipi ku nani.

⁴ Aqokitikhi Mpeu no ishi piani: Asü-apüzaqo no itaghi Jerusalem laghila lo iqa nani, ateasü shive kehu milakhi khino au lo aküsü küsüpe nani.

⁵ Eno mishighüna laghila lo apu-angaqo no chhitoi ili nani.

⁶ Aqokitikhi Mpeu no ishi piani: Tsala ghükulumi itehi akeu hipaqo nhethe lo hi no akümzapu shi aghi aye, I nhethe lo ghi akümzapu shikepu keshea? ipi aqokitikhi Mpeu no asheshu.

⁷ Ikehu aqokitikhi Mpeu no pi: Julo, I no kipela ghakhu eno kulola ghakhu lono Iw timiqo xalu nani,

⁸ eno Jerusalem lo xü penike I no panongu saghi nani. Panongu no Iw timi shive nani eno pükhükulu ngo achipiu mikucho lono I no panongu Lhou shi nani.”

⁹ Aqokitikhi Mpeu no piani: “Aqokitikhi Mpeu ki boqha ghoke tsala lo tungkupmi kichi lono atsa hipaqo pikeu chilu ighi kemi nongu kümtsü no achineki shiqhelu kepushi nongu u mtotoi luvelo.

¹⁰ Kughengu tipa züu ye timi momu lhoxü piqelu kepu shimoe, momu hu-wo chekemi ghenguno aghümi launo sükusho kühae, kughengu I no timi lakhikhi pesü pa kisüghüu ghümi shivepe ke.

¹¹ Ikemu itehi Ni ye khaghi lo toi ghükulumi hipaqo peithamo nani, ipi aqokitikhi Mpeu no asheshu.

¹² Kughengu külakishi xusüni keu do ighi nani. Atsaibo no axathi pithi nani, ayeghi no tüxatini ipeghi lupe nani, eno atsütsü no atsüzü tsü nani. Ghükulumi hipaqo pelo thime hi kümtsü ithulupe nani.

¹³ Nongu ye ghushove kemie pi shiyeqo gholo küghakiche shiveke, O Judah ngo Israel laghami, ikehu I no nongu xalu nani eno nongu ye kükümghau shive nani. Msa kevilo, ikemu nongu u mtotoi lulo.”

¹⁴ Kughengu aqokitikhi Mpeu no piani: “Kughou nongu puasüqo no I loghu shikighide keno I no küsakusho süghini ye kughu, eno ti süchilemo ketoi,

¹⁵ hipa ghuloki lo ghi I no Jerusalem ngo Judah lagha lau akivi süghini ye kughuvae; msa kevilo.

¹⁶ Nongu no thime hipaqo shilo: Lakhino lakhi lau kuchou tsa pilo; now khagho lo xakütha kiu no achipi keno tsülo eno külakishi ghenguno mlalo;

¹⁷ nongu mlo lono lakhino lakhi shou küsakügha kuchughu kevi, eno kichile shoqhi kimiye kevilo, kughengu hi kümtsü I no mithike, ipi Ampeu no asheshue.”

¹⁸ Aqokitikhi Mpeu tsa I lau ishi ighi,

¹⁹ “Aqokitikhi Mpeu no piani: Judah lo küami ghenguno aqhi abidiu, apunguu, akütsüniu eno achighiu lo kümvü keu ye alokivi, amlokiqi eno alophalei keu ghulhuqo shi nani. Tighenguno kuchou eno külakishi kimiyelo.

²⁰ “Aqokitikhi Mpeu no ishi piani: Timiqo ye ighini aphi, mishighünaqo lo küami ghi ighi nani.

²¹ Mishighüna lakhi lo küami no lakhiu lo wuno pi nani, ‘Ningu mtazü wuno AMPEUw kimiyekini khuni eno aqokitikhi Mpeu phuni nolo; Ni ghi wucheni.’

²² Ashiaye kutomo eno akumto shiyeqo no aqokitikhi Mpeu phusü Jerusalem lo ighi nani eno AMPEUw kimiyekini khu nani.

²³ Aqokitikhi Mpeu no ishi piani: Tipa ghuloki lo shiye eno ashiaye kütüta lono timi chighi no Jewmi lakhi kuuphi tsüqü luve no pi nani, ‘Ni pelo o gholo wu pelo, kughengu Alhou ye o gholo anie pi nino chiluvae.’”