ZEKHARIA 6 - Sumi Naga CL (Re-edited) Bible (BSI)

Khurkulu Bidi

¹ Itaghi I no I nhethi tsükhope jukelo khurkulu bidi naghuto kini dolono ipeghi keu ithulu. Naghuto ti ye alazayi naghutoqo ke.

² Khurkulu atüghüu no khurshi huchuyi keqo no sünhe che, akiniu no tsübui keqo,

³ aküthüu no metsüghoi, eno abidiu no hughai keqo—ti kümtsü akumtoe.

⁴ I no kungumi I pütsa keu vilo iniju, “I mpeu, hipaqo ye kiu kea?”

⁵ Kungumi huno I khochile pi, “Hipaqo ye ayeghi kümtsü shou Ampeu zülo ipeghi piyeve kethiu atsütsü lo ako bidi mülhü süvelau wuve nani.

⁶ Khurshi tsübui keqo no sünhe chekeu khurkulu no ahuu ghakhu küdau iqhove, metsüghoi keqo no tipa shelo shi, eno hughai keqo no apeu iqive.”

⁷ Kughou khurshi kumtoqo no ipeghi keno panongu ye wuno ayeghiqha xuju nike khelhoae. Eno pa no pi, “Wulo, ayeghiqha xujulo.” Ikehu panongu no ayeghiqha xüjuwu.

⁸ Tishino kungumi huno ighamku I vilo pi, “Julo, ahuu ghakhu küdau iqhove keqo no tilau I Ghungu kulhoqhive tsüae.”

Kükakütsüqho eno Achineki

⁹ Ampeu tsa ishi I lau ighi:

^10-11 “Haphe sawuve kemi Heldai, Tobijah eno Jedaiah, khunoqo Babylon lono ighive akeno tipaqo launo ghükayi ngo ameshoyi lulo, tipa tsala lono Zephaniah nu Josiah kilo wulo. Ghükayi ngo ameshoyi pesü kükakütsüqho mlalo, eno tipa pesü Jehozadak nu Joshua achinetou pipelo.

¹² Eno pa vilo pilo, ‘Aqokitikhi Mpeu no ishi piani, “Khuu je no Aloka keno, julo: pa ye pa-a lono aloka qüpuwu nani, eno pa no Ampeu chineki shiqhe nani.

¹³ Ampeu chineki shiqheni keu, ayekipe gigihu xapu eno kükalakhü lo iqa no ayepeni keu ye pa ke. Pa kükalakhü lo achinemi lakhi anani, eno külakishi no pama dolo anani.”’

¹⁴ Kükakütsüqho ye Helem, Tobijah, Jedaiah, eno Zefania nu Hen noqo pelo kümsüchile lupe kepushi Ampeu chineki lo anani.

¹⁵ “Khunoqo putou acheni keno panongu no ighi no Ampeu chineki shiqhe nike kuphu nani. Aqokitikhi Mpeu no nongu lau I puwu kepi nongu no ithi nani. Eno nongu no amlo tsüqhiyi Ampeu no Lhou tsa gholu aye, hi ye shikupu nani.”