ZEKHARIA 5 - Sumi Naga CL (Re-edited) Bible (BSI)

Liküküzü Kaku Yechekeu

¹ Itaghi I no I nhethi tsükhope jukelo liküküzü kaku lakhi yecheghi keu ithulue!

² Kungumi huno I vilo pi, “No ye kiu ithulu ania?” I no khochile, “Liküküzü kaku lakhi yechekeu ithulu ani. Ti ye akushulau auxakuchho muku, eno akijelau auxakuchho chighie.”

³ Pa no I vilo pi, “Hi ye aghakhu kümtsü shou ghukusho ikughi akeu ke. Kughengu liküküzü kaku tüxau akeu kiqi lono püka chekemi kümtsü kileqhive nani, eno itaghi tüxau akeu kiqi lono akimki shoqhi shi chekemi kümtsü kileqhive nani.

⁴ Aqokitikhi Mpeu no pi, I no hipau puwu nani, eno hi no küpkami kilo eno khuu no I je lono akimki shoqhi shicheni keno pa kilo ilo nani. Eno tipau no pa kilo ngove no asüpa ngo atuqo ghi külhüve nani.”

Ashoghi lo akeu Totimi

⁵ Tithiu kungumi I pütsa akeu huno azüu ighi no I vilo pi, “O nhethi tsükhope ti ipeche keu ye kiu keno julo.”

⁶ I no pi, “Ti ye kiu kea?” Pa no pi, “Hipau ye ashoghi lakhi ipeche keu ke.” Eno pa no pi, “Hi ye aghakhu kümtsü lo timiqo xineke.”

⁷ Julo, ayi künha lhapheve no totimi lakhi ashoghi lo iqa aghi!

⁸ Pa no pi, “Hi ye Küsakügha ke.” Pa no ashoghi lo li inasüve no ayi künha mishishei keu pesü tipau kichi nhave.

⁹ Tishino I no I nhethi tsükhope jukelo totimi kini azüu ipe cheghi! Pama ye amülhü lo achishibo xakhope yecheghi. Pama chishibo ye azüghau chishibo toi eno pama no ashoghi pesü ayeghi ngo atsütsü dolo ikuve.

¹⁰ I no kungumi I pütsa akeu vilo iniju, “Pama ye ashoghi khilau pewu cheni kea?”

¹¹ Pa no pi, “Tipau ki mla tsüniye Shinar yeghi lo pewu cheni. Kughou no aki tipau shiqhiveni keno, pama no ashoghi pesü tile qhive nani.”