ZEKHARIA 4 - Sumi Naga CL (Re-edited) Bible (BSI)

Ameshoyi Kulukibepu

¹ Kungumi khuu I pütsa akeno pa no itaghi ighi no timi lakhi no züake lono küda puthuve ketoi I küda puthu.

² Eno I vilo pi, “No ye kiu ithulu ani kea?” I no khochile, “Ameshoyi kulukibepu lakhi I no ithulu ani, tipau kütsüqa lo akhu lakhi eno akulu tsüni no tipa shou ani, akulu lakhikhi lo ayihu kichi tsüni ani.

³ Eno olive sübo kini no tipau küdau ani, lakhino akhu ajeu ani eno lakhino piyiu ani.”

⁴ Kungumi khuu I pütsa akeno pa vilo I no pi, “Hipaqo ye kiu kea I mpeu?”

⁵ Kungumi huno I khochile pi, “Hipaqo ye kiu keno no ye mtha kea?” I no khochile, “Moe, I mpeu.”

⁶ Ikehu pa no I vilo pi, “Hi ye Zerubbabel tsükeu Ampeu tsa ke: Akumto no kumo, momu aküka nomu kumoe, ikemu I Ghungu vecheo noe, ipi aqokitikhi Mpeu no pi.

⁷ O naghuto kuloghi, no ye kiu kea? Zerubbabel zülo no ye külaqave nani. Pa no ashekhau tuqu pewo gho akelo timiqo no iqhaighu ‘Kimiyekini, Alhouw kimiyekini!’ ipi nani.”

⁸ Tileno Ampeu tsa I lau ighi no pi,

⁹ “Zerubbabel u no aki hipau aboqha qhavae; pa u no itaghi hipau kishekha nani. Tileno aqokitikhi Mpeu no nongu lau I puwu kepi nongu no ithi nani.

¹⁰ Kughengu khunono akikishi lo ajuichemo kepi aghüthisü akeno alovive nani, eno Zerubbabel u lo akimghitu ithulu nani. “Akulu tsüni hipaqo ye Ampeu nhethi ayeghiqha kümtsü shou jupuku achekeu ke.”

¹¹ I no pa vilo iniju, “Akulukibepu ajeu eno piyiu olive sübo akeu ye kiu kea?”

¹² I no akiniu pa pütsa no iniju, “Ameshoyi yihu phivilo olive süloka kini akeu, khipau lono akughupu thazü lephe ani keno tipaqo ye kiu kea?”

¹³ Pa no I vilo pi, “Hipaqo ye kiu keno no ye mtha keshea?” I no khochile, “Ni ye mthae, I mpeu.”

¹⁴ Ikehu pa no pi, “Hi ye nukisheve keu pama ayeghiqha kümtsü Mpeu gholo puthugho achekeu ke.”