ZEKHARIA 2 - Sumi Naga CL (Re-edited) Bible (BSI)

Akimghipu Süta Kungunhetsü

¹ I no I nhethi tsükhope jukelo timi lakhi no akimghipu süta pa u lo pe aghi keu ithulu!

² I no ighiju, “No ye khilau wucheni kea?” Pa no I vilo pi, “Jerusalem mighi juni, akijelau khipahi eno akushulau khitohi keno juniye ke.”

³ Eno julo, kungumi I pütsa akeu huno azüu ighi, kungumi kütau ghi pa sasü kushoni ye azüu ighi

⁴ eno pa vilo pi, “Powu no lhothemi hupau vilo pilo, ‘Jerusalem ye aliwo küha keu phuqo toi küghüna nani, kughengu timi ngo pichepighi no shishe ikowoni cheni.

⁵ Eno I no li bothape ami liwo lakhi shive nani, Ampeu no asheshu, I no li gholo ajuküvü shi nani.’”

⁶ Ithulo! Ithulo! Ahuu yeghi lono povelo, Ampeu no asheshu. Kughengu I no atsütsü lo ako bidi mülhü toi nongu apanagha haleve ke, Ampeu no asheshu.

⁷ Ithulo! Nongu khunoqo Babylon limi sasü xü ani keno Zion lo poka wulo.

⁸ Kughengu aqokitikhi Mpeu no pi, Pa juküvü no nongu xüle pewuve keu shiyeqo lau I puwu kethiu, khuu no nongu buni keno pa nhethi no juküsü shi püakeu buvae:

⁹ “Julo, I no panoqo shou I u peqhe nani eno khunono panongu qe ani keno tipaqo no pano xüle pewuve nani. Tileno aqokitikhi Mpeu no I puwu kepi nongu no ithi nani.

¹⁰ Alephe eno alovilo, O Zion limi, kughengu julo, I no ighi no nongu gholo xü nani, Ampeu no asheshu.

¹¹ Tipa tsalani shiye kutomo no Ampeu gholo küqhave nani, eno Iw timi shive nani. I no nongu gholo xü nani, eno aqokitikhi Mpeu no nongu lau I puwu kepi nongu no ithi nani.

¹² Ampeu no akimthe yeghi lo Pa saje shi Judah ighi luve nani, eno itaghi Jerusalem kisheluve nani.”

¹³ Ampeu zülo timi kümtsü no inaqhoi shilo, kughengu Pa ye Pa kimthe kungo-a lono ithughivae.