ZEKHARIA 13 - Sumi Naga CL (Re-edited) Bible (BSI)

¹ “Tipa tsala lo David laghami eno Jerusalem lo küami xine eno mithekumo qhukimthe tsünike ghenguno azüpuki lakhi ipeghi nani.

Ajulho Kümlla Kishekhave

² “Tipa tsalani, aqokitikhi Mpeu no pi, I no ayeghi lono ajulho jeqo xavetsü nani, tishianguno tipaqo ye kümsüchile move nani. I no ayeghi lono tungkupmi eno mithekumo ghungu ghi ikhive tsü nani.

³ Khuana no itaghi tungkuptsa pi aye, pa punuu puaza no pa vilo pi nani, ‘No ye xümoae, kughengu nono Ampeu jelono akimki tsa pi anike.’ Eno kughou pa no tungkuptsa pini keno pa punuu puaza no pa jiqhive nani.

⁴ “Tipa tsala lo kughou tungkupu lakhi no tungkuptsa pini keno paw kungunhetsü ghenguno kujove nani. Pa ye pishiqhi nike ghenguno amhi hebephi pepumo nani,

⁵ ikemu pa no pi nani, ‘Ni ye tungkupu kumono alukichimie, kughengu timi lakhi no I lhothe ghuloki lono I jepuwuve ke.’

⁶ Tsala khuana no pa vilo, ‘O mqa lo azaku hipaqo ye kiu kea?’ ipi iniju aye, pa no khochile nani, ‘I küsami ki lono aghüzaku ithulu keqo ke.’

Ambekheu Ghiqhi

⁷ “O azütakikihi, ithu Iw ambekhemi mjochile lo, Timi khuu I shelo puthugho ani keno mjochile lo,” ipi aqokitikhiMPEU no asheshu. “Ambekheu ghiqhilo eno ambeqo ye apanaghave nani; I no itimiqo shou I u süqheni.

⁸ Aqokitikhi Mpeu no asheshu, ayeghi kikije küthü lo kini ye kütsave no pühave nani, eno aküthüu likhi no xülu nani.

⁹ I no hi aküthüu pesü ami lo süno ghükayi thakimthe ketoi shinani eno ameshoyi peju ketoi shinani. Panongu no I je ku nani, eno I no khochile nani. I no ishi pi nani, ‘Panoqo ye Iw timie’; panoqo no pi nani, ‘Ampeu ye I Lhoue.’”