ZEKHARIA 11 - Sumi Naga CL (Re-edited) Bible (BSI)

Ghiqhini ye akeu Mbeloji

¹ O hukikhaqo khaqhilo, O Lebanon, tishino ami no ow cedarboqo pitileve penie!

² Mloqa lo, O Cypressbo, kughengu cedarbo ye ikiqivae, ajekipi süboqo ye kütsavae! Mloqa lo, Bashan phisüboqo, kughengu aghasü ye yeqhivae!

³ Ambekhemi no mloqa igha ani, kughengu pano jekipi ye kütsavae! Abongshuuqo no ighamku ani, kughengu Jordan lo aghasü ye kütsavae!

⁴ Ikehu Ampeu I Lhou no pi: “Ambe loji ghiqhini ye akeqo lau ambekheu shilo.

⁵ Panongu qhüluve keqo no pano ghiqhive kemu aghime tsümono wuvepe, eno khunono panongu jeve keno tipaqo no pi, ‘Ampeu sheqhelo, ni ye kinimi shivae,’ pano mbekhemi no pano küpümoe.

⁶ Kughengu hipa ghakhu lo küxümiqo lau Ni ye küpükeu kühavae, ipi Ampeu no asheshu. Julo, I no timi lakhikhi pelo pa kisüghüu u lo, eno pa kükau u lo ikiqi ilovepe nani, panongu no ayeghi kütsale nani, eno Ni ye panongu u lono khumu xaphemo nani.”

⁷ Tighenguno ambe küqhümi no ambeloji ghiqhini ye akeqo lau I no akheu shiluve. Eno I no aküsü kini ikhiluve, lakhi je no Qhuivülai keu kuvetsü eno lakhiu je no Küqhakulu kuvetsü. Eno I no ambe jukuto luve.

⁸ Aqhi lakhi lono I no ambekhemi küthü kütsave. Ikemu panongu lau Ni ye kheakulu shimlave eno panoqo ghi I jumithive.

⁹ Tighenguno I no pi, “Ni ye nongu kheu shimoae. Kiu no thiveni ye ani keno, thive peni. Kiu no kütsaveni ye ani keno, kütsave peni. Eno khunoqo achili shini keno lakhino lakhi phiashi chuve peni.”

¹⁰ I no Iw Qhuivülai keu küsü ikhiluve no ashiaye kümtsü sasü puloshoqhi shikeu hexave ghi ti süchheve.

¹¹ Ikehu puloshoqhi ye tipa tsala lono hexave, eno ambe küqhümi, khunoqo I ju akeno, tipaqo no hi ye Ampeu tsa kepi ithive.

¹² Tileno I no panoqo vilo pi, “Hi no nongu ghenguno alokeu shi aghi aye, I jume I tsülo; ikemu tishimo aye, tipaqo qhiluve lo.” Eno panongu no I jume ghükayi shighi ahu shiphetsü.

¹³ Tile Ampeu no I vilo pi, “Panongu no amekusho shi I jume shitsü keu—ayeghi li kümlau lau ti vepuwuve lo.” Ikehu I no ghükayi shighi ikhipe Ampeu kilo ayeghi li kümlau lau vesüve.

¹⁴ Tishino I no Judah ngo Israel dolo athiküzü azükighi shi achekeu hexave ghi I küsü akiniu Küqhakulu süchheve.

¹⁵ Tithiu Ampeu no I vilo pi, “Itaghi ghuthu lakhi mbomzü mbekheu nanu ikhilulo.

¹⁶ Kughengu julo, I no aghakhu lo ambekheu lakhi saputhuni cheni, pa ye kütsave keqo hijumo, alhotheqo phumo, aghüzaku shipivimo, ashiaji kivishi akeqo lojimo nani, ikemu atha pubeyi akeqo tsüchu eno apukhu shobapu keqo mütsü hexüve tsü nani.

¹⁷ “Iw ameküküha mbekheu khuu ambeloji qhive keno ahasapue! Azütakikihi no pa u ajeu eno pa nhethi ajeu ghive peniu! Pa umlo qhoi thizümüive, pa nhethi ajeu icheve peniu!”