ZEFANIA 3 - Sumi Naga CL (Re-edited) Bible (BSI)

Jerusalem shou Küghakütha

¹ Hebide eno shipixi, qoda neda chekeu mishighüna haküsapue!

² Li ye khuu sütsa mu ini chemo; eno shikithekütsü ikhilu chemoe. Li ye Ampeu pükhübe chemo; eno Alhou kupunu ighi chemoe.

³ Li qholo hiyampemi akeqo ye abongshuu toi keqoe; xaküthami no avela tüngtüghaqo, tsütho mono külhüve chekeqo.

⁴ Liw tungkupmi ye lhelheshi, pishikiqhimi ke; achinemi no akimthe pesü kitiqe; eno ayezah hexa cheni.

⁵ Ampeu ye li lau achipikumo shimono achipiu mikucho shike; ina atsütsü Pa ye tamono Pa chipiu xakütha pephe piye cheni; ikemu achipikumomi ye akukujo ghi ithi chemoe.

⁶ “I no shiyeqo ghitha pevae; pano ghukhe-aqo ye kütsavae; pano laghila ye kümsa shive no khunomu tipaqo lo püla movae; pano phughiqo ye pighive no milakhimu küghüna movae.

⁷ I no pi, ‘Mtsüqheino no ye I sümsa nani; no ye shikithekütsü ikhilu nani. Tishino o kungo-a ye kütsamo nani eno o shou aghime ighimo nani.’ Ikemu panongu no alaushi pano kümla shipüsa kithe auveke.

⁸ “Tighenguno I no ithughi no thopi tsüni keu tsala khelo” ipi Ampeu no sheshu. Kughengu Iw xakütha ye shiye eno kükaqhaqo hekütsüni keu, panongu shou I xukighide pitipüza keu lepukuni keu ke; kughengu I loghu miküqü no ayeghi kümtsü pitileve nani.

Shiyeqo Mlo Pekibide

⁹ “Kughengu tipa ghuloki lo I no shiyeqo tsapi tsüghükhüi shi kilive tsü nani, ti ye kümtsü no Ampeu je kulu eno lakhi shi Pa qelu peniye ke.

¹⁰ Cush ghoki kukuu no I mlla chekemi, Iw timi apanaghave kemi no akümllagho süghi nani.

¹¹ “Tipani nono I hebide püaghi namu Ni ye o shikujomo nani; kughengu I no o launo aqheküzami tsütsüngoju chekemi ikhive nani, eno Iw akimthe toghi lo nongu ye akuchhoma shikithe mo nani.

¹² Ikemu I no nongu gholo akümtshami eno aqhokighemi qhitsü nani. Panongu no Ampeu jelono aküghütshü-a phu nani,

¹³ Israel lo ghülu keqo ye achipikumo xakütha shimo nani eno akimki tsa pimo nani, momu pano kichi lo pishikiqhi mili ithulumo nani. Panongu no chuno ihozü nani eno khunomu pano kichimo nani.”

Israel Lokivi

¹⁴ Igha ale phelo, O Zion limi; ighalo, O Israel! Alovilo eno o mlo kuchopu süno ilhe alovilo, O Jerusalem limi!

¹⁵ Ampeu no o launo küghakütha pewuve tsüae; Pa no o ghümiqo haleve tsüae. Israel Kükau, Ampeu no o gholo anike no ye khilemu alhoksa msakithe moae.

¹⁶ Tipani Jerusalem vilo pi nani: “Msa kevilo, O Zion; o u miqemleive kevilo.

¹⁷ Ampeu o Lhou no o gholo ani, akughushuu, xaluni küau no alokivi shi o jupe amloqi; eno nono Paw kikimiye lo iqünhei lunani; Pa no igha alephe o jupe alovi nani.

¹⁸ Tiqhetini ghenguno mlo chekeqo I no hekütsü nani, tishianguno nongu ye aghime shikithe mo nani.

¹⁹ Julo, tipa ghuloki lo I no nongu qhasü chekemi ghimeqhi nani. I no aphiau kinitave kemi xalu eno hapheve kemi hekütsü nani, eno pano kukujo pesü shekiqhe lo süve tsüno ayeghiqha kümtsü ajepipi tsü nani.

²⁰ Kughou I no nongu hekütsüni keno tileno I no nongu sasü kümtsa aki lo ighi nani; kughengu ayeghi lo ashiaye kümtsü gholono I no nongu je pipitsü eno sheqhe nani, ti ye I no nongu nhethe lono no küakini tsüchile kelono tishi nani,” ipi Ampeu no pi.