ZEFANIA 2 - Sumi Naga CL (Re-edited) Bible (BSI)

Judah Ghümi shou Küghakütha

¹ Kuho kumqolo, iyei, kumqolo, O akukujo küha keu shiye,

² xaküthaza shikupu mphi lono —atsala no amuu toi fupe wuve mphi lono— Ampeu loghu pitiqhi keu no o shou ikughi mphi lono, Ampeu xukighide tsala no o lau ighi mphi lono hekütsü lo.

³ Ampeu phulo, nongu ayeghi lo aqhokighemi, Pa chipiu zakütsü peche kemi; achipiu-mikucho; akümtsha shilo; Ampeu xukighide tsala lo o pesü küghütshüve luvi ke.

⁴ Kughengu Gaza ye pighive nani, Ashkelon ye yenguyive nani; Ashdodmi ye pucho mta lono haleve eno Ekron ye nhüve nani.

⁵ Nongu azüghimkü lo küami, Kherethmi shiye haküsapue! O Philistiami yeghi Canaan, Ampeu tsa no o lachile anie, xüküami kühave moke kutolo I no nongu kütsaleve nani.

⁶ Eno no, azüghimkü ye atsü-aqu ngo ambekhemi ghenguno achu kümza luza shive nani.

⁷ Azüghimkü huye Judah lagha lo ghülu kemi sala shive nani, pano tsü-aqu no tile mzachu eno akhemi no kijiliu Ashkelon lo aki akeqo lo ihozü nani. Kughengu Ampeu panongu Lhou no panoqo kümsülu no pano ngukümgha tsüchile nani.

⁸ “Moabmi no thogha junu keu eno Ammonmi no cheqhi keu, panoqo no Iw timi junu eno pano lughi shou aqheküza tsa pikeu I no chiluvae.

⁹ Tighenguno, Ni hi xü anike,” aqokitikhi Mpeu, Israel Lhou no asheshu, “Moab no Sodom eno Ammonmi no Gomorrah toive nani, apüghüli eno amti kuchhuki shive no alholo ghenguno pighive nani. Iw timi ghükulumi no panoqo lepuwuve nani eno Iw timi lo ghükulumi no pano mheghi shive nani.”

¹⁰ Panongu qheküza lame hi no panongu saje shi nani, kughengu panongu no aqokitikhi MPEUw timi junu eno panoqo shou qheza ke.

¹¹ Ampeu no panoqo shou aküighüpu süghi nani; kughengu Pa no ayeghi lo lhouqo akhü no pithive nani, eno shiye kümtsü pütüta-a lono, Pa zülo qhoqhü itsaqi nani.

¹² O nongu Cushmiqo ghi, I zütakikihi no ghiqhive nani.

¹³ Pa no ahuumi shou Pa u süqhe nani eno Assyria kütsaleve nani, Pa no Nineveh küghüküghaleive tsüno asayeli toi qhai qhive nani.

¹⁴ Pichepighi eno tüghashi kümtsü no aphughi mta lo iqi ihozü nani; aqhaqho eno achequ thotsü liw qhemghaike chebo lo ngo nani; alashe lono igha nani; kütsakungo keu no ahukikha lo ngove nani; kughengu cedar sü no mlakeu ye muhumaive nani.

¹⁵ Hi no alokivi eno sükusho akeu mishighüna, li mlo lono piche, “Ni thono kütami ye khumu kühae.” Li ye kiutoi küghüküghaleive akelae, tüghashi kungo-a shivae! Khunoqo no li hechesü wu keno atuthu kuloghi sheqhi eno au sükumqo luve ke.