ZEFANIA 1 - Sumi Naga CL (Re-edited) Bible (BSI)

¹ Amon nu Josiah no Judah kükau shi ake lono Zefania lau Ampeu tsa ighi. Pa ye Cushi nu, Gedaliah nu, Amariah nu, Hezekiah nu ke.

Judah shou Küghakütha

² “I no ayeghi lono thokha joleve nani,” ipi Ampeu no sheshu.

³ “I no timi eno tüghashi jole nani; I no atsütsü lo aghauqo eno azüghi lo akhaqo jole nani, I no kixikilami püxakulu nani. I no ayeghi lono timiqo kütsave nani,” Ampeu no pivae.

⁴ “I no Judah ngo Jerusalem lo küami shou I u chhopuku nani; hipa-a lono I no Baal kümlla eno asü-atu chinemi kütsave nani,

⁵ aki kütsüqa lono atsütsü lo aqokitikhi zülo qhoqhü chekemi, Ampeu zülo itsaqi eno tushoqhi ani kemu Milcom vecheo ghi tushoqhi chekemi,

⁶ Ampeu papeche no athiu idewove kemi, Ampeu phumo momu Pa küsütsamo kemi kütsave nani.”

Ampeu Tsala ye Kupunuvae

⁷ Ampeu Alhou zülo iqüghai lo! Kughengu Ampeu tsala ye kupunuvae; Ampeu ye aghakishi kutovae eno kuküsümi kishekimthevae.

⁸ Eno Ampeu ghakishi tsalani— “I no hiyampemi, akükau nuliqo eno inaghami phimini xapuche kemi kümtsü ghime nani.

⁹ Tipani khunono akikhasü ilhe kache ilo anguka eno pishikiqhi vecheo pano mpeu ki shepichhi tsü cheni keno I no ghime nani.

¹⁰ “Tipani,” Ampeu no asheshu, “Akha Khagho lono aküqa sütsa, Achebo Akiniu lono mloküqa lakhi, atoghiqo lono aghügha küsa lakhi chilu nani.

¹¹ Mloqa lo, O alhikishi-a lo küxümi! Kughengu lhidimi qhoi kühavae; ghükayi huju chekemi kümtsü kütsavae.

¹² Tipa ghuloki lo I no akulu pesü Jerusalem phuju nani, eno khunono akuchhoma shini, eno amlo lono, ‘Ampeu ye akivi mu alhoksa mu shimo nani’ ipini keno I no panoqo ghime nani,

¹³ Panongu küakini xüvetsü nani, eno panongu ki kütsave tsü nani. Panongu no aki shipüaghi namu, panongu ye tilehi ngomo nani; pano no atsailu chi aghi namu, tipau tsaizü yelumo nani.”

¹⁴ Ampeu tsala kije ye kupunuvae, punukhoi eno pai cheae; Ampeu tsala sütsa ye kukhukimji ke; tile akumtomi huno igha qae.

¹⁵ Tipa tsala ye aloghu tsala, aghime eno amloghuju tsala, ixapinyi eno kütsale keu tsala, züchiyi keu eno aküzü tsala, khüngküsü kutho zümoike tsala,

¹⁶ aliwo kumto eno qhemghaike qoghe akeu mishighünaqo shou afuko igha eno aghüle kukeu tsalae.

¹⁷ I no timiqo lau aghime süghini, tino panongu ye anhethi kighichemi toi chewu nani, kughengu panongu no Ampeu shou axine shike; panongu ji ye amkhu toi pele nani, eno akumo no tübatüzü toi nani.

¹⁸ Ampeu loghu tsalani panow ghükayi momu ameshoyi nomu panongu xalu kepu shimo nani. Pa nhekushu mi lono ayeghiqha kümtsü pitileve nani; ayeghi lo küami ghenguno Pa no züleno thokha kishekhave tsü nani.