ZAKINIU 9 - Sumi Naga CL (Re-edited) Bible (BSI)

Amikucho Ghenguno Kumoe

¹ “Inilo, O Israel: nongu ye ishi tsala lono Jordan katha iku nongu nguno akijeu akumtou shiyeqo, eno shishe kije eno aliwo no iku atsütsü toni keshi akeu phughiqo haphe niye ani.

² Tipaqo ye Anakim laghami kehu chuqumghai eno akumto ke; nongu no pano ithi ani, eno panongu ghili ishi pikeu chiluvae, ‘Khuu no Anak laghami mjochile luni kea?’

³ Tighenguno ishi tsala lo hi ithilo, khuu amiküqü toi nongu züu cheni keno, Pa ye Ampeu nongu Lhou ke. Pa no nongu zülono panongu kütsave no qhasüve nani. Pa no nongu vilo piqhive ketoi, nongu no panoqo hapheve no paikhavi püghave nani.

⁴ “Ampeu nongu Lhou no nongu zülono panoqo hapheve kethiu, nongu mlo lono, ‘I mikucho ghenguno Ampeu no I sasü ayeghi hipau pükhalu peke,’ ipi kevilo. Kuchou loye shiye hipaqo kixikila ghenguno Ampeu no nongu zülono panongu hapheve anike.

⁵ Nongu mikucho momu amlo kimthe ghenguno nongu ye ayeghi hipau lo pükhalu niye anike kumoe, ikemu shiye hipaqo kixikila ghenguno Ampeu nongu Lhou no panongu hapheve anie, tishikeu lono Pa no nongu puasü Abraham, Isaac, eno Jacob lau ashoqhi shipüa keu iqhikumto niye ke.

⁶ “Tighenguno hi ithilo, no mikucho ghenguno Ampeu no aghüma yeghi hipau nongu tsü anie pi kümsü kevilo, kughengu nongu ye kuthovi kemie.

⁷ Asayeqha lo nongu no kishi Ampeu nongu Lhou loghu xukutho keno kümsülu lo. Egypt qhiveke tsalani no a-a hipau lo ighi moke kutolo, nongu ye Ampeu hebide ighivae.

⁸ Horeb lo ghi nongu no Ampeu loghu xukutho, eno Pa ye ighono amloideve kehu nongu kütsani ye shive.

⁹ Kughou Ampeu no nongu sasü puloshoqhi shikeu tupha kini lunike I no iqho keno, ni ye tilau atsala lhobidi kiumu chusho mono ngove.

¹⁰ Ampeu no atupha kini Alhou uloti no yepuku keu I tsü, eno tiküma lo yepuku püaghi keu ye, nongu no naghuto philo kumqo ke tsalani Pa no ami lono nongu vilo pikeu tsaqo ke.

¹¹ Atsala lhobidi thiu Ampeu no puloshoqhi tupha kini I tsüe.

¹² Tile Ampeu no I vilo pi, ‘Ithu no mtazü iqilo, kughengu ow timi, nono Egypt lono saipeghi keqo ye küsakügha kümla shivae. Panongu ye I no azah tsükeu lono tsüghüve no pano sala ayi julho mla luvae.’

Ameshoyi Mishiti

¹³ “Ampeu no tinguno alau I vilo pi, ‘I no timi hipaqo ithuluvae, julo panongu ye kuthovi kemie.

¹⁴ I lakha kevilo, Ni ye panongu kütsave no atsütsü qholono panongu je pühave tsüniae. Tithiu no I no o pesü panongu nguno shiye kuloghi eno akumtou shitsüni.’

¹⁵ Ikehu I no naghuto lono iqighi kelo naghuto lono ami iqü aghi. Atupha küma I u lo peche.

¹⁶ I no jukelo, nongu ye Ampeu nongu Lhou zülo axine shive aghi. Nongu no ameshoyi mishiti mla püaghive, eno paikhavi Ampeu no azah tsükeu lono tsüghüve aghie.

¹⁷ Tileno I no nongu zülono atupha vephove.

¹⁸ Tishino itaghi I no Ampeu zülo putho pucho atsala lhobidi itsaqi. Nongu no Ampeu zülo axine shikeu lono Pa mlo shikighide ke ghenguno ni ye kiumu chusho move.

¹⁹ Kughengu Ampeu mlokiqi kumo eno amlo kighide shishe kije shive no nongu kütsave niye shive. Ikemu Ampeu no tile ghi I tsa initsüe.

²⁰ Ampeu ye Aaron shou ghi shishe aloghu ideve no pa kütsave niye shive, ikemu tipa tüqhüdo lono I no Aaron ghengu ghi inikhu tsüe.

²¹ Tishino nongu no mlakeu axinepu mishiti julho I no ikhipe pitive no mukhumuno shive tsü. Eno I no tipau mukhu pewo naghuto lono qoiqi akeu ghoki lo vesüve.

²² “Taberah lo, Massah lo, eno Kibroth-hattaavah lo ghi nongu no Ampeu loghu xukutho ke.

²³ Kughou Ampeu no Kadesh-barnea lo nongu vilo, ‘I qholo eno I no nongu tsü akeu yeghi pesü amheghipu shilu lo,’ ipi no nongu puwu keno, nongu no Pa zakütsü hebideve, Pa pülümo eno Pa sütsa inimoe.

²⁴ I no nongu ithi ke tsalani no ishi kutolo nongu ye Ampeu hebide acheni.

²⁵ “Ikehu I no Ampeu zülo atsala lhobidi pishiqhope ngove, kughengu Ampeu no nongu kütsave niye shive.

²⁶ Tile I no Ampeu lau ishi inikhue, ‘O Ampeu Alhou, O mheghi timi, Nono O küka kije lono xachilelu, eno O u no Egypt lono saipeghi keqo kütsave kevilo.

²⁷ O qemi Abraham, Isaac, eno Jacob kümsülu lo eno timi hipaqo mlo kutho, kixikila, eno pano xine kihitsü kevilo.

²⁸ Tikumo aye, Nono ni saipeghi keu yeghi no ishi pi nosae, “Ampeu ye Pa no piqhikeu yeghi lo panongu sailo mlavae, eno panongu mithi kehu sawo asayeqha lono pithive niye ani.”

²⁹ Kughengu hipaqo ye Ow timi eno O mheghi, O küka kumto lono saipeghi keqo ke.’