ZAKINIU 8 - Sumi Naga CL (Re-edited) Bible (BSI)

Ampeu Alhou Kümsülu lo

¹ “Ishi tsala lo I no azakütsü nongu tsükeu kümtsü tsaqüi papelo, tishianguno nongu ye xülu, ikowolu, eno Ampeu no nongu puasüqo lau tushoqhi keu yeghi lo ilo ngolu nani.

² Nongu pelo kuchunilu peniye, nongu mlo lo kiu ani eno nongu ye Pa zakütsüqo pelu nani kemo keno peju nike hi ampe lhobidi Ampeu nongu Lhou no nongu sasü asayeqha lo ighikeu kümsülu lo.

³ Pa no nongu kuchuni no müzüthive pe, eno manna pesü lojie. Nongu eno no puasüqo mu ti ye kiu keno mthae, ikemu nongu pelo timi ye achuqupu vecheo likhino xülu chemo ikemu Ampeu tsa vecheo xülu nani kepi ithi peniye Pa no hi shike.

⁴ Hi ampe lhobidi dolo nongu phimini ixüvemo eno nongu pukhu inguuve moe.

⁵ Tishiaye nongu mlo lo hi ithilo, milakhi no pa nu sakümzü ketoi Ampeu nongu Lhou no nongu sakümzü cheni.

⁶ Ikehu Ampeu pape eno sümsa keu vecheo Pa zakütsü pelulo.

⁷ Kughengu Ampeu nongu Lhou no aghüma yeghi lo nongu sailoni cheni, ayeghi tipau ye aghoki eno azüpuki akeu eno ayeghi qhou züpuki no akhila ngo naghuto lono ipeghi anie;

⁸ ti ye ashothi, barleythi, atsaibo, mububo, khaghatu bo, olive, eno akhingozü ipeghi chekeu yeghi ke.

⁹ Tile nongu ye asho luzüla mono chulu nani, eno athokha shimo nani. Tipa yeghi loye atuqo no ayi eno tile naghutoqo lono aküsayi chhuphelu nani.

¹⁰ Nongu no chuno apo sünheilu nani eno tileno Ampeu nongu Lhou no aghüma yeghi nongu tsüke ghenguno Pa shikimthi nani.

¹¹ “Ampeu nongu Lhou zakütsü eno pimheye ngo akhuaye khikhi I no ishi tsala lo nongu tsüani keno, kümtsü pape mono Pa kümsümave nosake kutokupui lo.

¹² Tikumo aye nongu no aghapiqi chuluve, aki kivi shiqhe luve eno tipaqo lo xüuve kethiu,

¹³ nongu tsüaqu lojiqo no kighishelu khave, now ameshoyi ngo ghükayi no kümzapu shive, eno nongu no pighi akeqo thokha kighishe luve kethiu,

¹⁴ tileno nongu lolo aqheküza ikughive no nongu no Egypt lo aqüaxe lo akelono xaphelu keu Ampeu nongu Lhou kümsümave nosake.

¹⁵ Pa no akümsa küighüpu sayeqha khile tüghükupu pighi ngo achuwopaza ani eno azü küha keno, ti kathasü nongu sawu eno atuqu lono azü qoipeghi peke.

¹⁶ Pa no nongu peju no kuchuni eno ashekha lo akivipu shitsü niye asayeqha lono nongu puasüqo nomu mthakeu manna pesü nongu lojike.

¹⁷ Ikehu nongu mlo lono, ‘I küka kumto lono küakini hipau ithulue,’ ipilu nosake tsükhüi lo.

¹⁸ Ampeu nongu Lhou kümsülu chelo, kughengu nongu pelo kinimi shilu penike aküka tsükeu ye Pa noke, tishikeu lono ishi tsala lo toi, Pa no nongu puasüqo sasü puloshoqhi shikeu shikupu niye ke.

¹⁹ Tsala nongu no Ampeu nongu Lhou pheve no kütami lhouqo pape eno huthu mllauve aye, ishi tsala lono I no nongu lau mtütüi pive anike nongu ye pühave nani.

²⁰ Ampeu no nongu zülono shiyeqo püghave keshi, nongu ghi Ampeu nongu Lhou gholumo aye püghave nani.