ZAKINIU 7 - Sumi Naga CL (Re-edited) Bible (BSI)

Kishekiphe Timiqo

¹ “Kughou nongu no pükha niye akeu yeghi lo Ampeu nongu Lhou no nongu sailoghi nike nongu nguno akumtou eno timi kütsasa akemi shiye tsüni, Hittimi, Girgashimi, Amorimi, Canaanmi, Perizimi, Hivimi eno Jebusimi hapheni keno,

² eno kughou Ampeu nongu Lhou no tipaqo nongu u lo süve tsüno nongu no tipaqo leluveni keno, nongu ye kümtsü kütsave masae. Nongu ye pano sasü puloshoqhi shimoni eno kimiyekini piye moni.

³ Panongu sasü külakupu shimoni; nonga pesü pano nuli tsümoni eno pano nga sawo no nuli tsümoni,

⁴ kughengu panongu no pano lhou mlla peniye I launo no nuli sawuve tsü nanike. Tileno Ampeu mlo kighide nongu shou ikughi nani eno Pa no paikhavi no nongu kütsave nani.

⁵ Ikemu nongu ye hitoi pano lau shilo: pano kümlla khache hephove tsülo, atsükucho kubove tsülo, Asherim julho ghekuchove tsü, eno ajulhoqo pitive tsülo.

⁶ “Kughengu nongu ye Ampeu nongu Lhou lau akimthemi ke. Ampeu nongu Lhou no ayeghi lo ashiaye kümtsü gholono Paw akughupu mheghi shou ampi shipenike nongu kishelue.

⁷ Nongu no kütami nguno kutomo kehu Ampeu no nongu kimiye eno kishelu ke kumoe, kughengu nongu ye ashiayeqo kümtsü dolo aghuloue.

⁸ Ikemu Ampeu no nongu kimiye eno no puasüqo lau tushoqhi keu shikupu niye akumto kije lono eno Egypt kükau Pharaoh qüaxe lono nongu xachile luke.

⁹ Tighenguno Ampeu nongu Lhou ye Alhou kepi ithilo, khunono Pa kimiye eno Pa zakütsü peluni keno, tiqheli qhethonhe kutolo Paw puloshoqhi eno iqemokeu kikimiye piye chekeu pükhübekulu Lhou ke,

¹⁰ ikemu Pa mithi kemi ye pano no ithulu ghi kütsakungo pesü tsüchile cheni. Pa ye Pa mithi kemi lau künacho chemo, ikemu vejoi tsüchile cheni.

¹¹ Tighenguno I no ishi tsala lo azakütsü eno akhuaye ngo pimheye nongu tsü keqo kutokupui pelulo.

¹² “Nongu no pimheye hipaqo tsaqüi ini no pelu aye, Ampeu nongu Lhou no nongu lau Paw puloshoqhi ngo iqemokeu kikimiye no puasüqo lau tushoqhi püakeu peche nani.

¹³ Pa no nongu kimiye, kümghatsü, eno kughuko tsü nani. Pa no nongu puasüqo lau tushoqhi keu yeghi lo nongu polo kughukomi kümghatsü nani, eno no luza lo axathi, athi, atsaizü, eno thazü kümghatsü nani, now amishi eno ambe loji lo atiqo kughuko tsü nani.

¹⁴ Ashiaye kümtsü nguno alau nongu kümghatsü nani. Nongu gholo kiptimi totimi khumu anuhami shimo nani momu nongu tsüaqu namu lakhimu iqovemo nani.

¹⁵ Ampeu no nongu launo küsükini kümtsü süwuve tsü nani, eno nongu no Egypt lo ithulu keu küsü lhoksa lakhimu nongu shou pukutsü mono ti kümtsü no mithi kemi shou pukuve tsü nani.

¹⁶ Ampeu nongu Lhou no nongu u lo sütsü keu shiaye kümtsü kütsave lo. Nongu nhethi no kimiyeqhiyi pano jumoni, momu pano lhouqo mlla moni, kughengu tino nongu meluve nani.

¹⁷ “Tsala nongu no amlo lono, ‘Shiye hipaqo ye I nguno akijeu ke ni ye kishino hipaqo kütsaluni kea?’ ipi aye,

¹⁸ panongu msa kevilo, ikemu Ampeu nongu Lhou no Egypt lo Pharaoh ngo paw timiqo lau kiu shikeno kümsülu lo.

¹⁹ Nongu nhethi no ti pekuju kije ithulu keu, amchipu, akichiqhipu kümla, Pa u küka kumto sükhope Ampeu nongu Lhou no nongu saipeghi keu kümsülu lo. Titoi Ampeu nongu Lhou no nongu no msa akeu shiaye kümtsü lau shitsü nani.

²⁰ Tinguno alau, Ampeu nongu Lhou no panongu lau akhighiqo puwu nani, eno khunoqo pokasü wuve no itshü aghini keno kümtsü kütsave nani.

²¹ Panongu jumsa kevilo, kughengu akijeu eno aküighüpu Lhou Ampeu no nongu gholo ani.

²² Ampeu nongu Lhou no nongu zülono kititi no shiye hipaqo hapheve nani. Nongu ye ghuthu khavi no pano kütsamo nani, tikumo aye timi ye tüghashiu pachive nosae.

²³ Ikemu Ampeu nongu Lhou no panongu pesü nongu tsüve nani eno pano kütsave moke kutolo kübangüve penani.

²⁴ Pa no panow kükami pesü nongu tsüve nani eno nongu no atsütsü qholono pano je pühave tsü nani. Khunomu nongu sasü kumjo lumo nani.

²⁵ Pano lhou julhoqo pitive tsü masae. Nongu ye ajulho shou ameshoyi ngo ghükayi aghi keqo jumine moni, momu nongu sala lumoni, tino nongu meluve nosae, kughengu ti ye Ampeu nongu Lhou ghenguno aphikümqhüpu ke.

²⁶ Nongu kilo aphikümqhüpu thime süghi moni, kughengu tino kütsakungo süghi cheni. Ti jukuchhube lo eno mithi lo, kughengu ti ye kütsakungo kepu lo tsüvae.