ZAKINIU 6 - Sumi Naga CL (Re-edited) Bible (BSI)

Azakütsü Akijeu

¹ “Ampeu nongu Lhou no nongu shika penike akhuaye eno pimheye azah I tsü, hipaqo ye nongu no ilo pükhalu niye akeu yeghi lo pelu peniye ke,

² tishianguno nongu eno nongu nuli ngo atilimi no akhuaye ngo azakütsü I no nongu tsü akeu pelu no aküxü tivilo Ampeu nongu Lhou sümsa eno axüshulu peniye ke.

³ Tighenguno, O Israel, inilo, eno pükapütsa pelulo, tino nongu kivipu shilu nani, eno Ampeu ni puasü Lhou no tushoqhive ketoi, nongu ye akichhizü ngo akhingozü no qole akeu yeghi lo shishe ikowolu nani.

⁴ “O Israel, hi inilo: Ampeu ni Lhou likhi no Alhou ke!

⁵ O mlo kuchopu, o ngulho kuchopu, eno o kumto kuchopu pesü Ampeu o Lhou kimiye lo.

⁶ Ishi tsala lo I no azah hi o tsü akeqo o mlo lo qhilu lo.

⁷ Hipaqo pesü amlo tsüqhiyi no tianuli shikalo, nongu no aki lo akelo, khalau chekelo, akulhoqhi eno mlaitha kelo hipaqo pesü pialo.

⁸ Hipaqo pesü amchipu shi nongu umlo lo khapu eno nongu kishe lo khapu lo.

⁹ Nongu ki hukikha ngo khagho lo yepe qhilo.

¹⁰ “Ampeu nongu Lhou no nongu puasü Abraham, Isaac, eno Jacob tsünike tushoqhi keu yeghi lo nongu sailoghi no nongu no shiqhemo keu phughi kije eno akivi nongu tsükelo,

¹¹ nongu no sümo keu thime kivi jeli no aki chhitoi, nongu no chhumo keu zütughuko, nongu no shosümo keu tsailu ngo olive xathili aghi, eno nongu no tipaqo chuno aghapiqilu kelo,

¹² nongu ye Ampeu khuu Egypt lo aqüaxe lono nongu saipeghi keno, Pa kümsümave nosake tsükhüi lo.

¹³ Ampeu nongu Lhou sümsa lo, Pa likhi huthu lo eno Pa je lo likhino tushoqhi lo.

¹⁴ Nongu ye ashiaye nongu sümxape akemi lhouqo mlla moni,

¹⁵ kughengu Ampeu nongu Lhou nongu gholo akeu ye anhekushu Lhou ke, Pa no nongu shou amloideve no ayeghi lono nongu püghave nosake.

¹⁶ “Nongu no Massah lo shike toi Ampeu nongu Lhou peju kevilo.

¹⁷ Nongu ye amlo tsüqhiyi Ampeu nongu Lhou zakütsü, Pa shepe eno akhuayeqo pelulo.

¹⁸ Ampeu zülo kiu no achipi eno alo keno ti shilo, tishianguno nongu kivipu shinani, eno Ampeu no nongu puasüqo tsünike tushoqhi keu aghüma yeghi lo ilo no pükhalu nani.

¹⁹ Ampeu no piveke toi Pa no nongu zülono no ghümi hapheve tsü nani.

²⁰ “Hithiu nongu tianuli no nongu vilo, ‘Ampeu ni Lhou no azah tsükeu lo ashepe, akhuaye, eno pimheye kiqi ye kiu kea?’ ipi ighiju kelo,

²¹ nongu nuli vilo pilo, ‘Ningu ye Egypt lo Pharaoh qüaxemi shi ache kelo Ampeu no Pa küka kumto lono ningu xaphelue.

²² Ampeu no ni nhethe lono Egypt lo Pharaoh ngo paw yepemi shou amchipu ngo akümzapu kümla kije ngo aküighüpu pephe.

²³ Tishino Pa no ni puasüqo lau tushoqhi püakeu yeghi pesü tsünike tilauno ningu saipeghi.

²⁴ Ishi ningu no xüake toi Ampeu no ningu püxüpe ni kivipu shitsü niye Ampeu ni Lhou no Pa sümsa lopi azah hipaqo tsüe.

²⁵ Ampeu ni Lhou no azah tsükeu kümtsü ningu no tsaqüi Pa zülo pelu aye, ningu ghenguno tino achipiu shinani.’