ZAKINIU 5 - Sumi Naga CL (Re-edited) Bible (BSI)

Azakütsü Chighi

¹ Moses no Israelmi kümtsü kukumqo no pi, “O Israel, ishi tsala lo I no akhuaye ngo pimheye nongu vilo pikeqo inilo, tipaqo shikalu no kutokughoi pelulo.

² Ampeu ni Lhou no Horeb lono ningu sasü puloshoqhi shie.

³ Ampeu ye ni puasüqo sasü puloshoqhi shike kumoe, ikemu khunoqo ishi hilehi ani keno ningu xüküami sasü shike.

⁴ Naghuto lono Ampeu no agi kinheqhe no ami lono nongu pütsae.

⁵ Ni ye tipa ghuloki lo nongu eno Ampeu dolo puthugho no Pa no kiu pi keno nongu vilo pie. Kughengu nongu ye ami msa kelauno naghuto lo iqhomoe. Ampeu no pi,

⁶ “‘Ni ye Ampeu, khuu Egypt lo aqüaxe kibo lono nongu saipeghi keno, nongu Lhou huke.

⁷ “‘Nongu ye I nguno alhou kütau mlla moni.

⁸ “‘Nongu ye atsütsü lo, ayeghi lo, ayeghi qhou, momu ayeghi qhou azü lo akeu julho kimihi kiumu mlape qhimoni.

⁹ Nongu ye tipaqo zülo pishiqho momu qemoni; kughengu Ni Ampeu nongu Lhou ye anhekushu Lhou, I mithi kemi tianuli lau tiqheli aküthüu ngo abidiu kutolo aghime süghi cheni.

¹⁰ Ikemu I kimiye eno I zakütsü pelu kemi lau tiqheli qhethonhe kutolo Iw iqemokeu kikimiye piye cheni.

¹¹ “‘Nongu ye adou lono Ampeu nongu Lhou je peitha moni, kughengu Ampeu ye adou lono Pa je peitha keqo akipimi tsünani.

¹² “‘Ampeu nongu Lhou no azah tsüke toi Sabbath tsala akimthe shi pelu lo.

¹³ Atsala tsügho dolono nongu kümla thokha shini,

¹⁴ ikemu atsala akütsüniu ye Ampeu nongu Lhou lau Sabbath tsalake. Tipani ye nongu na no tianuli na, aqemi eno aqelimi na, atsüaqu na, momu inaghami no gholo akemi namu, kiu kümlamu shimoni. No qemi eno aqelimi ghi nongu toi akulhoqhi pelo.

¹⁵ Nongu ye Egypt lo aqüaxemi shi ache kepi kümsü luni, eno Ampeu no Lhou no Pa küka kumto lono nongu saipeghi ke. Tighenguno Ampeu nongu Lhou no Sabbath tsala pelu lopi azah nongu tsü ani.

¹⁶ “‘Ampeu nongu Lhou no azah tsüke toi o pu ngo o za gihu lo, tishianguno no ye axüshu nani, eno Ampeu o Lhou no o tsü akeu yeghi lo no ye thokha kümtsü akivipu shilu nani.

¹⁷ “‘Ghiqhi kevilo.

¹⁸ “‘Shupu-salha kevilo.

¹⁹ “‘Püka kevilo.

²⁰ “‘O kisüghüu shou akimki thopi shi kevilo.

²¹ “‘O kisüghüu nipu jumine kevilo; pa ki alu, pa qemi, pa qelimi, pa mishitsü, paw khurha, momu pa no aghikeu kiumu jumine kevilo.’

²² “Atsa hipaqo ye nongu no naghuto lo kumqo akelono kütau kiumu süküqha mono Ampeu no ami, khüngküsü eno aküzü kutho lono asütsa kuloghi shi pike. Eno Pa no atupha kini shou tipaqo yepuku no I tsüe.

²³ Naghuto no iqü akelo, nongu no aküzü lono asütsa chilu kemtsa, no lagha lo sakiphemi ngo layemi kümtsü I lau ighi.

²⁴ Eno pi, ‘Julo, Ampeu ni Lhou no Pa juküvü eno aküka ningu piyevae, nino ami lono Pa sütsa chiluvae. Ishi tsala lo Alhou no timi pütsa keu ithuluvae, ikeghi timi ye xüaphie.

²⁵ Ikehu itehi ningu ye kushiye thini kea? Kughengu ami kije hipau no ningu pitiqhive nani. Ningu no Ampeu ni Lhou sütsa chilu kithe aye, ningu ye thiniae.

²⁶ Kughengu aküxüpu Lhou no ami lono pütsa keu chilu kelo, timi khuana xülu püani keshea?

²⁷ Aphivilo wuno Ampeu ni Lhou no pikeu kümtsü inilo, eno Pa no o vilo pikeu kümtsü ni vilo pilo, nino inino papeni.’

²⁸ “Ampeu no nongu tsa chilu no I vilo pi, ‘I no timi hipaqo tsa khikhi o pütsa akeno chiluvae. Panongu no pive keu ye achipie.

²⁹ O panongu no I sümsa eno I zakütsü papeni ke pülhapuju hitoi keu mlo aghike aye, panongu eno pano kughukomi ghenguno akivipu shiniche!

³⁰ Wuno panongu vilo pilo, “Nongu phiki lo idewo lo.”

³¹ Ikemu no, Moses, ye hile I phivilo puthugho lo, o pelo panongu shika penike I no azakütsü, akhuaye, eno pimheye kümtsü o vilo pini, tishianguno I no tsü akeu yeghi lo panongu pelo tipaqo pelu peni.

³² Tighenguno Ampeu no Lhou no azah tsükeu papeni ke jukuto lo. Nongu ye tipau lono ajeu mu piyiu mu wuve kevilo.

³³ Ampeu nongu Lhou no azah tsükeu kümtsü shilo, tishianguno nongu ye xülu nani, eno nongu no pükhalu niye akeu yeghi lo nongu ye akivi shino eno axüshu nani.