ZAKINIU 4 - Sumi Naga CL (Re-edited) Bible (BSI)

Aghokulu Zakütsü

¹ “Itehi I no nongu shika akeu khuaye ngo pimheye papelo, tishikeu lono Ampeu no puasü Lhou no nongu tsü akeu yeghi lo ilolu nani.

² I no nongu lau kiu azah tsüve akeno tipau shou kiumu küpha momu ikhive kevilo, ikemu Ampeu nongu Lhou zakütsü khikhi I no nongu tsüve akeno papelo.

³ Ampeu no Baal-peor lo kiu shikeno nongu ampi no ithuluvae. Pa no nongu gholono Peor lo Baal mllauve kemi kümtsü kütsave.

⁴ Ikemu nongu khunoqo Ampeu no Lhou lau amikucho shikeno, ishi tsala kutolo xü anie.

⁵ Julo, nongu no ilo niye akeu yeghi lo pelu peniye Ampeu I Lhou no azah I tsüke toi I no akhuaye ngo pimheyeqo nongu shikavae.

⁶ Tipaqo pelu lo kughengu ashiayeqo zülo tino nongu lokütsüpu eno vethakulupu shinani, panongu no tipaqo chilu no pi nani, ‘Kuchou no shiye kije hipau ye alokütsü eno vethakulu timiqoe.’

⁷ Kughengu Ampeu ni Lhou no kugho kughomu nino kukelo ni phivilo aketoi khuno shiye kije no alhou titoi ke ani kea?

⁸ Eno ishi I no akhuaye eno pimheye nongu tsü akeu toike amikucho yezah khuno shiye no ani kea?

⁹ “Kutokughoi lo, eno müamzü nongu küxü jukuto lo, tikumo aye nongu nhethi no ithuluve keqo kümsümave nosa, eno no küxü tivilo nongu mlo lono hauve nosake. Tipaqo ye no tianuli eno atilimi pelo ithi pelo.

¹⁰ Horeb lo nongu no Ampeu nongu Lhou zülo puthugho akelo kishi Ampeu no I vilo pi keno kümsülu lo, ‘Timiqo pelo pano küxü tivilo I sümsani keu shikalu penike I lau kukumqo lo, tishino panongu no pano tianuli ghi shika peni.’

¹¹ Ikehu nongu naghuto pukhu philo ighi no puthugho, eno naghuto huno aküzü ngo khüngküsü eno züchiyi keu no küzüphope atsütsü kutolo ami iqü ikuae.

¹² Tileno Ampeu no ami lono nongu pütsae. Nongu no atsa ye chilu kemu koghe ye ithumlae; tile asütsa likhi chilue.

¹³ Pa no Paw puloshoqhi nongu vilo sheshu, nongu vilo shilo pikeu ye Azakütsü Chighi, ti ye Pa no atupha kini shou yepuku tsüe.

¹⁴ Tileno nongu no ilo niye akeu yeghi lo pape kepu khuaye ngo pimheye nongu shika lopi azah I tsüe.

Ajulho Kümlla Lakha

¹⁵ “Horeb lo Ampeu no ami lono nongu pütsa kelo, nongu ye kiu koghemu ithumla kehu nongu ampi jukuto lulo,

¹⁶ tikumo aye nongu ye no sala kiukiu julho koghe, kiptimi na totimi namu, mlakeu lono nongu shikitiqelu nosae,

¹⁷ ayeghi lo kiukiu lhoxü koghe, amülhü lo yekiche ghau koghe na,

¹⁸ itikiche koghe na, azü lo kiukiu kha koghe namu mla kevilo.

¹⁹ Itaghi nongu no atsütsü lo jupuku kelo, khetsünhe, aqhi, ayepu eno titoike jeli no nongu züluve no tipaqo mllauve nosake kutokughoi lo, kughengu tipaqo ye Ampeu nongu Lhou no atsütsü qholo ashiaye kümtsü sala pulhosü tsüke.

²⁰ Ikemu Ampeu no Pa mheghi shiniye Egypt lo ayi miphoki lono nongu saipeghi no ishi ye nongu ye Paw timi shi anie.

²¹ Tinguno alau, nongu ghenguno Ampeu no I shou amloideve no I pelo Jordan katha iku amheghi shi nongu tsü akeu yeghi kivi lo ilopemo nike tushoqhive.

²² Ni ye hipa ghakhu lono thiniae; ni ye Jordan katha ikumo nani. Ikemu nongu ye katha iku aghüma yeghi pükhalu nani.

²³ Ikehu kutokupui lo, tikumo aye nongu ye Ampeu nongu Lhou no nongu sasü puloshoqhi shikeu pheve no Ampeu nongu Lhou no shi kevilo pikeu julho mlano mllauve nosae.

²⁴ Kughengu Ampeu nongu Lhou ye amiküqü eno anhekushu Lhou ke.

²⁵ “Kughou nongu no atianuli eno atilimi auveni eno aghakhu tile no kitemi shiveni keno, nongu no kiukiu julho mlakeu vecheo alhoksa shiuve, eno Ampeu nongu Lhou zülo kiu no kixikila keno shikeu lono Pa pelo axuidepe aye,

²⁶ I no ishi tsala lono kungugha ngo ayeghi pelo nongu shou thopi shi penike kusü anike, nongu no Jordan katha iku pükhalu niye akeu yeghi lo nongu ye pai püghave nani. Nongu ye tile kushuo xümo nani, ikemu kütsakungo khave nani.

²⁷ Ampeu no ashiayeqo gholo nongu kutholeve nani, eno khuno shiye lau nongu hapuwuve akeno tipaqo gholo nongu ye aghuloshi likhive nani.

²⁸ Nongu no tilau timi u no asüatu pesü mlakeu lhouqo qe nani, alhou tipaqo ye ithulu, chilu, chulu, tsüngülu chemoe.

²⁹ Ikemu tilauno nongu no Ampeu nongu Lhou phu nani, eno nongu no amlo eno angulho kuchopu pesü Pa phu aye phulu nani.

³⁰ Nongu no shiluküsa lo akelo, eno hithiu hi kümtsü nongu shou ikughive kethiu, nongu no Ampeu nongu Lhou lau ideighi nani eno Pa gholu nani.

³¹ Kughengu Ampeu nongu Lhou ye kimiyekini Lhou ke. Pa ye nongu qhivemo nani, kütsavemo momu no puasü sasü puloshoqhi shikeu kümsümave monani.

Ampeu Likhi no Alhou

³² “Wove keu tsala lo nongu punu mphilo tsalaqo lhejulo, Alhou no ayeghi lo timi lhoke tsala lono ishi kutolo lhekide julo, eno kungugha halau no halau kutolo lhejulo, khilemu hitoi ke kümla kije shipüani kemo kea, momu chilu püani kema?

³³ Timi khunomu nongu toi ami lono alhou sütsa chilu kethiu ghi xülu kema?

³⁴ Momu khuno lhou no pekuju, amchipu, akümzapu kümla eno aghüshi vecheo Pa u kumto pesü kümsapu kümla pephe, eno Paw shiniye shiye dolono shiye kishephe kea? Hi kümtsü Ampeu nongu Lhou no Egypt lo nongu nhethe lono shike kumo?

³⁵ Nongu lau hi piye keu ye, nongu pelo Ampeu ye Alhou kepi ithi peniye ke; Pa nguno kütami ye khumu kühae.

³⁶ Pa no nongu ghasüni ke kungugha lono Pa sütsa nongu pelo chilupe. Ayeghi lono nongu pelo Paw miküqü kije ithulupe, eno nongu no ami lono Pa sütsa chilue.

³⁷ Pa no nongu puasüqo kimiye kehu pano polo kughukomi kishelu no Pa küka kije lono Pa ampi no Egypt lono nongu saipeghi.

³⁸ Nongu zülono nongu nguno akijeu eno akumtou shiyeqo hapheve tsü tishino nongu sailo pano yeghi pesü ishi kutolo nongu mheghi shitsü ke.

³⁹ Tighenguno ishi tsala lo hi ithi no nongu mlo lo qhilulo, Ampeu ye kungugha lo eno ayeghi lo Alhou ke; kütami khumu kühae.

⁴⁰ Tighenguno ishi tsala lo I no nongu tsü akeu khuaye eno zakütsü kümtsü pelulo, tishianguno nongu eno no polo kughukomi kümtsü akivi shilu peni, eno Ampeu nongu Lhou no alhokuthu ghenguno nongu tsü akeu yeghi lo axüshulu penie.”

Sükusho Phughi

⁴¹ Tishino Moses no Jordan kukuu kipelau mishighüna küthü kishe kütüta shive,

⁴² ti ye shipimipe pithive kemi pelo powo ngolu peniye ke; khuana no shipimipe pa kisüghüu pama dolo kiumu kimthi kimxi keu kühamu pithive aye, pa ye mishighüna hipano küthü dolo lakhi lo powo ngolu nani eno tilauno pa küxü süsholu nani.

⁴³ Reuben lagha ghenguno asayeqha lo atoqa yeghi lo Bezer kutotsü; Gad ghenguno Gilead lo Ramoth; eno Manasseh ghenguno Bashan lo Golan kutotsü.

Ayezah Kilekithi

⁴⁴ Moses no Israelmi lau tsükeu Yezah.

⁴⁵ Israelmi no Egypt lono ipeghive kethiu, Moses no panongu vilo pikeu ashepe, akhuaye, eno pimheye hipaqo ani.

⁴⁶ Ti ye panongu no Jordan kukuu, Amorimi kükau Sihon, khuu Heshbon lo ache keno, pa yeghi lo Beth-peor ghüngü lo akhila lono Moses no atsa hipaqo pi. Hi ye Israelmi no akükau Sihon theqhive kethiu

⁴⁷ pa yeghi luvetsü, eno Bashan kükau Og yeghi ghi luve kethiu noke. Akükau pama ye Jordan kukuu kipelau Amorimi shou kükami shiche;

⁴⁸ pama yeghi ye Arnon Khila mtsü lo Aroer lono Sirion Toghi (ti ye Hermon) kutolo,

⁴⁹ eno Jordan kipelau Arabah qha lono Pisgah pukhu philo Arabah Züghi kutolo ke.