ZAKINIU 34 - Sumi Naga CL (Re-edited) Bible (BSI)

Moses Kithi

¹ Tithiu Moses ye Moab qa lono chesü Nebo Toghi lo iqhove, eno Jericho ghüngü lo Pisgah kütsüqa lo ikuve. Tilauno Ampeu no Gilead lono Dan kutolo, aghakhu pa piye,

² Naphtali, Ephraim ngo Manasseh yeghi, Judah ghakhu kuchopu, kulolau züghi kutolo,

³ Negeb ngo aqa yeghi, ti ye Jericho Khila, amsabo mishighüna eno Zoar kutolo.

⁴ Ampeu no Moses vilo pi, “I no Abraham, Isaac, eno Jacob vilo, ‘I no o polo kughukomi tsüni,’ ipi tushoqhi keu yeghi hi cheni. I no o pelo o nhethi no ti ithuluve peae, ikemu no ye tilau wumoae.”

⁵ Ikehu Ampeu no pikeu kiqi lono Ampeu qeu Moses ye tilau Moab ghakhu lono thive.

⁶ Ampeu no Moab khila lo Beth-peor ghüngü lo pa qhove, ikemu ishi kutolo khunomu pa kumo kuqho-a mtsümishei mthae.

⁷ Moses ye ampe 120 shi akelono thive. Pa nhethi ye züvemo, momu pa phimpi ye qeivemoe.

⁸ Israelmi no Moab khila lo pa ghenguno atsala shighi mloqae. Tishino Moses ghenguno mloqa keu tsala kishekhave.

⁹ Nun nu Joshua ye alokütsü no chhitoive, kughengu Moses no pa shou au beno kümgha tsüe. Ikehu Israelmi no Joshua gholu eno Ampeu no Moses vecheo azah tsükeu papeke.

¹⁰ Israel lo Moses toike tungkupmi khilemu ipeghi mphi, kughengu pa ye Ampeu sasü agi kinheqhe no küptsa cheke.

¹¹ Tungkupmi kütami khunomu Ampeu no Moses puwu no Egypt kükau, paw kijemi eno pa ghakhu shou amchipu ngo akichiqhipu kümla mlake toi shimphie.

¹² Kütami khunomu aküka kumto ngo akümsapu jeli Moses no Israelmi kümtsü nhethe lo shike toi shimphie.