ZAKINIU 33 - Sumi Naga CL (Re-edited) Bible (BSI)

Moses Kükümgha Ashekhau

¹ Kükümgha hipaqo ye Alhou timi Moses no thivenike zülono Israelmi shou pipuku tsüke.

² Pa no pi, “Ampeu no Sinai lo ighi Seir lono ni shou ipeghi; eno Paran Toghi lono yepüvüe; Pa no akimthemi 10,000 gholono ighi, Paw ajeu amiküqü peche.

³ Iyei, Ampeu no Paw timi kimiye, Pa kimthe timi kümtsü Paw sükusho lo ae; ikehu panongu no O pape ke, eno Ow mijekütsü papeke,

⁴ Moses no Jacob laghami pelo amheghi shi peche peniye Ayezah ningu tsüke.

⁵ Ikehu alagha lo sakiphemi eno Israelmi kümtsü no kumqope akelono Ampeu no Jeshurun shou akükau shive.

⁶ “Reuben ye thimo no xü apelo, ikemu paw timi ye aghulo likhi pelo.”

⁷ Judah ghenguno pa no pi: “O Ampeu, Judah sütsa ini tsülo, Paw timi gholo pa sachile ighilo. O u pesü pa ghenguno mla tsüno pa ghümi launo kuphu tsülo.”

⁸ Levi ghenguno pa no pi: “Ow Thummim Levi tsülo, akimtheu lau Ow Urim tsülo, Nono Massah lo pa peju, eno Meribah lo pa sasü mtoke.

⁹ Pa no pa puaza vehu lo pi, ‘Ni ye pama kihi movae’; pa no pa thiküzümi pheve eno pa tianuli jukümghaleve ke. Kughengu panongu ye O tsau no akhoto shive eno Ow puloshoqhi pape wuve ke.

¹⁰ Panongu no Ow pimheye pesü Jacob shika nani eno O Yezah pesü Israelmi shika nani; panongu no axokütsüngü O zülo qhi nani eno O kümlla khache lo kuchopu kipti kümllagho qhi nani.

¹¹ O Ampeu, pa lagha kümgha tsülo, eno pa kümlaqo ikhilu tsülo, pa ghümi abongshuuqo heqhive tsülo, pa mithi kemi idethughipe kevilo.

¹² Benjamin ghenguno, pa no pi, “Ampeu qhuu ye sükusho lo ani. Akiqheu Lhou no pa khekuto eno pa gholo acheni.”

¹³ Joseph ghenguno pa no pi, “Ampeu no kungugha lo eno ayeghi akuthou lono agho akiviu pesü pa yeghi kümgha tsüe,

¹⁴ khetsünhe no phu pinive keu xathi akiviu, eno aqhi-aqhi lo axathi akiviu pesü pa kümghatsü peniu,

¹⁵ mulho naghuto lo xathi akiviu, pülhapuju toghi lono kupukuno shi,

¹⁶ aghüma yeghi lono agho akiviu eno asüminipho lo achekeu no Pa mlo kiqi gholono, kükümgha hi kümtsü Joseph shou ache peniu. Kughengu pa ye pa thiküzümi gholo sakipheu ke.

¹⁷ Pa ye amshitsü piti tüghüu, pa ye akükanguagha ani, pa kibo ye aviala kibo ke; Pa kibo no timi shoqhi nani, eno ayeghi shekha kutolo timi kümtsü shoqhi nani; tipaqo ye Ephraim lo timi qhethonhe chighi, eno Manasseh lo timi qhethonhe ke.

¹⁸ Zebulun ghenguno pa no pi, “Zebulun, now ikipe lo alovilo, Issachar, no phiki lo alovilo.

¹⁹ Panongu no panow naghuto lo ashiayeqo kusü nani; tilau no achipiu ghakishi shinani; kughengu panongu ye azüghi eno asayeqha lono küsü püakeu kinikhuki kupukuno shi süghi cheni.

²⁰ Gad ghenguno pa no pi, “Gad pekho tsükeu Lhou shelo! Gad ye abongshuu toi ipu cheni, pa no au eno akütsü sülave tsüe.

²¹ Pa no ayeghi akiviu pükha luve, kughengu tilau zatsüu saje kophe püae; pa no timiqo shou sakiphemi eno Israelmi sasü ighi no Ampeu kuchou xakütha pephe tsüe.”

²² Dan ghenguno pa no pi, “Dan ye Bashan lono ilhe ipeghi keu abongshuuti lhothe.”

²³ Naphtali ghenguno pa no pi, “O Naphtali, amlokiqi o shou ani, eno Ampeuw kükümgha kuchopu o shou ani, azüghi ngo apeu yeghi ye ow ke.”

²⁴ Asher ghenguno pa no pi, “Anuli dolo akümghau ye Asher; pa thiküzümi dolo aheu ye pake, pa pukhu no thazü lo nesülu peniu.

²⁵ Ow khagho ye ayi ngo alazayi no aküptasü shi nani, eno o küxü tsala hutoi o küka ghi tishi nani.

²⁶ “O Jeshurun, Alhou toike khumu kühae, Pa no kükanguagha lono atsütsü kathasü o kuphu nike cheni.

²⁷ Lhokta Lhou no o kungo-a ke, Paw pülhapuju u no o puqhe acheni. Pa no o zülono o ghümi haphe no picheni, ‘Kütsave lo.’

²⁸ Tighenguno Israel ye sükusho lono xücheni, atsütsü lono atsüzü piqitsü keu, athi ngo atsaizü yeghi lo Jacob ye iqüghai xülu cheni.

²⁹ O Israel, o lokivipue! O toike khuu ania, Ampeu no xaluve keu timi, o kuphu chekeu züto, eno ow tokulu zütakikihi! O ghümi no kimiye tsülopi o lau ighi nani, eno nono pano neda nani.”