ZAKINIU 32 - Sumi Naga CL (Re-edited) Bible (BSI)

¹ “O kungugha, I no atsa pinike inilo, eno ayeghi ghi I tsa inilo.

² I kükütsü no tsütsüghu kighiji toi, I tsapi no atsüzü toi tsüghükhüi pelo, tsütsüghu kümtsha no atsüni kümtsha shou iku ketoi, eno tsütsüghu no ayeghi shou ghupuku ketoi pelo.

³ Kughengu I no Ampeu je sheqheni; Ni Lhou kughushu pinie!

⁴ “Pa ye Atuqu, Pa kümla ye kupukülai, Pa kümla kümtsü achipiu ke. Pükhübekulu eno akipimi kühakeu Lhou ke, achipiu eno amikucho ye Pa ke.

⁵ Panongu ye kühakügha shivae, Paw timi kumovae kughengu panongu ye mithe movae; panongu ye küsakügha eno chighichilai keu tiqhelimi ke.

⁶ Nongu mbomzü eno akükümsü küha keqo, hitoi Ampeu lochileni keshea? Pa ye nongu Papu, Pulhoküsüu, nongu iqhikumto tsüke kumo?

⁷ Khaghi ghili kümsü lulo; khaghi lomi ghili kümsü julo; o pu vilo iniju lo, pa no piye nani, layemi vilo inijulo, pano no pi nani,

⁸ Shishe Akiqheu no shiyeqo pütüta mheghi kutotsü kelo, Pa no timiqo kijetha kelo, Pa no Alhou nuliqo kikihi kiqi lono ashiayeqo lughi shotsü.

⁹ Ikemu Ampeu saje ye Paw timiqo ke, Jacob no Pa mheghi saje shilue.

¹⁰ “Pa no asayeqha lono Jacob phulu, asayeqha lo küghüküghalei keu lono phulue; Pa no pa boluve no pa tuchomjoe, pa pesü Pa mlo kuchuu shie.

¹¹ Alhuqu no pa püsü chixele eno pa chishibo no atiqo shou fupuku ketoi, pa chishibo sükhope pa tiqo vake toi, pa mqa lono atiqo xapu ketoi,

¹² inami lhou sümono Ampeu likhi no Paw timi sapheke.

¹³ Panoqo pelo qhemghai keu yeghi shou chewupe, alu lo pekighiqo chulupe, atuqu lono akhingozü chupe, eno atu yeghi lono thazü tsüe.

¹⁴ Atsüaqu kichhizüchi ngo akichhizü tsü, ambeti, Bashan netsü eno ambeti tha tsüe, ashothi akiviu eno atsaithi kivi no mlakeu tsaizü shoke.

¹⁵ “Ikemu Jeshurun no chhikhoive kelo hebideuve; nongu no atha pubeyi, chhikhoi, eno athinibeive; tileno pa no pa lhokeu Lhou pheve, eno xakulupu Tuqu thogha ke.

¹⁶ Panongu no inami lhou pesü Ampeu pelo anheshupe; aphikümqhüpu pesü Pa loghu shikighide.

¹⁷ Panongu no mthakeu lhou, alhou kumono tüghami lau aghashie, pano puasü no khilemu msamo keu lhou, alhou kithe ipeghi keqo mllae.

¹⁸ Panongu ye pano tuchophe keu Tuqu lau amlo tsümoe, eno pano punu keu Lhou kümsümave.

¹⁹ “Ampeu no hi ithulu no panongu milive, kughengu pa nuliqo no Pa ghujue.

²⁰ Pa no pi, “I no panongu launo I gi küsüveni; pano shekuho I no jutsüni, kughengu panongu ye hekibide tiqhelimi ke, pano lolo pükhübekulu kühae.

²¹ Panongu no alhou kumo keu pesü I pelo anheshupe; panongu no ajulho pesü I mlo shikighide tsüe. Ikehu I no pano pelo kiumu kumo kemi jupe anheshu peni; mbomzü shiye sawo pano mlo shikighide tsüni.

²² Kughengu I loghu no ami iqüvae, tino Kithigha kutho kutolo piti nani, ayeghi ngo tile akeqo pitive nani, eno naghuto boqha pitive nani.

²³ “‘I no pano shou amhekiqipu süghi nani; panoqo shou I piji peitha nani;

²⁴ panongu ye akhüava no thinani, eno kitixeküsü ngo tüghükupu püsa no püghale nani; I no panongu lau tüghashiqo puwu nani, eno tüghükupu pighi puwu nani.

²⁵ Aki khalau azütakikihi no akithi süghi nani; alou no shithüghüi keu anani, apumi ilimi eno anga kughunu ngo asa kümpami lau aphiphi shi hitoi shi nani.

²⁶ “I no qhoi panoqo kütsaveni, timiqo mlo lono panongu shipühave tsüni,” ipi ni ye piluni cheke,

²⁷ ikemu tino pano ghümi tsabo shiveni keu ighüve ke, tikumo aye pano ghümi no vetha pimive no ishi piuve nosae, “Hi ye nino tolu kethono Ampeu no kumoe.”’

²⁸ “Kughengu panoqo ye mijekütsü kühakeu shiye, pano lolo alokütsü kiumu kühae.

²⁹ Panongu no alokütsü aghike aye hi vethaluni cheke; panongu ye ashekha vehu kimchi luni cheke!

³⁰ Ampeu no panongu phevemo aye eno pano Tuqu no pano jepuwu moaye, kishino milakhi no qhethonhe halelu, eno mikini no qhethonhe chighi hale luni kea?

³¹ Ni ghümiu ghi pano tuqu ye ni Tuqu toimo kepi ithi anie.

³² Pano tsaizü ye Sodom ngo Gomorrah tsaibo lono ighie; pano tsaithi ye tüghü tsaithi, eno pano tsaibo ye khumtsai ke.

³³ Pano tsaizü ye apighiw tüghü eno akümkau tüghü toike.

³⁴ “‘Hi ye I gholo küsüpe I kini pekükütsü chebo lo khatha püanike kumo?

³⁵ Amkhükulu ye Iw ke I no tsüchile nani, panongu pukhu no nekipheni keu do ye kupunuvae, Panow küsakusho tsala ye kupunuvae, eno pühaveni keu tsala ye pai ighive nani.’

³⁶ Ampeu no Paw timi lolo aküka kühave keu, eno aqüaxemi na ililai kemi namu kühave keu ithulu kelono Paw timiqo xaphelu nani eno Pa qemiqo kimiyeqhiyi nani.

³⁷ Tileno Pa no pi nani, ‘Pano no ijelu chekeu tuqu, pano lhouqo ye khilave akea?

³⁸ aghakishi lo atha chuvetsü chekeu eno atsaizü kümllagho shovetsü chekeu khile ani kea? Tipaqo pelo ighi no nongu kuphu pelo; eno nongu sükushou shipelo!

³⁹ “‘Itehimu Ni ye Pa huke julo, I nguno alau kütau lhou kühae; I no pithive eno püxüve cheni; I no ghüzave no shipivi cheni; khunomu I u lono xaphe mlae.

⁴⁰ Kughengu Ni ye alhokupuju xüani eno kungugha küdau I u süqhepe tushoqhi ani,

⁴¹ I no I zütakikihi mlapui chighive eno küghatha nike kutove aye, I ghümi shou amkhülu nani eno I mithi chekemi lochile nani.

⁴² I piji no ajih shomzüpe nani, I zütakikihi no ashi chupe nani asa kushuo kupumi aghümi ghiqhive kemi, eno küghaluve kemi jih shou tishipe nani.

⁴³ “O kungugha, Paw timi gholo alovilo; alhou kümtsü no Pa zülo pishiqho lo, kughengu Pa nuliqo jih peleve keu Pa no amkhü lutsü eno Pa ghümi shou amkhülue. Pa no Pa mithi kemi lochile no Paw timi yeghi shikimthe tsü.”

⁴⁴ Moses ngo Nun nu Joshua pama no Israelmi kümtsü pelo chilu penike ale hipau phisü tsü.

⁴⁵ Kughou Moses no hi kümtsü pesü Israelmi lau pive keno,

⁴⁶ pa no pi, “Mtsüqheino nongu ye ishi tsala lo I no azah hipaqo nongu tsükeu amlo lo süpulo, Tishino no tianuli vilo hipaqo pesü kütülo, tishianguno panongu pelo amikucho shi Ayezah hi kümtsü papelu peni.

⁴⁷ Kughengu atsa hipaqo ye abokümsa kumoe, ikemu hi ye nongu küxü, eno hipau vecheo nongu no Jordan katha iku ngoniye akeu yeghi lo axükushu shilu nani.”

Moses Kithi Pichho

⁴⁸ Tipani Ampeu no Moses vilo pi,

⁴⁹ “Moab ghakhu lo Abarim naghuto, Jericho ghüngüu Nebo Toghi lo ikulo, eno I no Israelmi tsüniye akeu Canaan yeghi juluve lo.

⁵⁰ Eno tipau naghuto lono o mu Aaron no Hor Toghi lono thive no paw timi lau wuve ketoi, no ghi thive no ow timi lau wuvelo,

⁵¹ kughengu Zin sayeqha, Meribah-kadesh züpuki lo timiqo zülono nono akimthe shi Ni ikhilu move.

⁵² Ikehu no ye putou no ayeghi ithulu nani, ikemu I no Israelmi tsü akeu yeghi lo ilomo nani.”