ZAKINIU 31 - Sumi Naga CL (Re-edited) Bible (BSI)

Joshua no Moses Thisülu

¹ Moses no Israelmi vilo atsa hipaqo pikibe,

² “Ni ye ishi no ampe 120 shivae, eno ipeilo luni keu küka kühavae. Tinguno alau, Ampeu no I vilo pivae, ‘No ye Jordan katha ikumo nani.’

³ Ikemu Ampeu nongu Lhou ampi no nongu züuno iku nani, eno shiye tilau akeqo kütsave tsü nani, tishikeu lono nongu no pano yeghi lo ngolu nani. Ampeu no piveke toi Joshua no nongu saphe nani.

⁴ Ampeu no Amorimi kükami Sihon ngo Og pama kütsave ketoi shiye hupaqo ghi kütsave nani.

⁵ Ampeu no panoqo shou nongu pelo tokulu shilupe nani, I no nongu vilo pikeu kiqi lono panoqo lau shilo.

⁶ Akumto shilo eno amlo loghilo, panongu msa momu juighü kevilo, kughengu Ampeu nongu Lhou no nongu sasü chenani. Pa ye nongu phevemo momu qhivemo nani.”

⁷ Tishino Moses no Israelmi kümtsü zülono Joshua vilo pi, “Akumto shilo eno amlo mtolo, kughengu nono timi hipaqo sakipheu shino Ampeu no pano puasüqo lau tushoqhi keu yeghi lo ilo nani.

⁸ Ampeu no o züu chenani. Pa ye o gholo chenani eno o phevemo momu qhivemo nani. Msa momu amlo hauve kevilo.”

Ayezah Phisü

⁹ Tithiu Moses no Ayezah hipau yepe Ampeuw Puloshoqhi bohu kipemi Levimi ngo Israel sakiphemi tsüve.

¹⁰ Pa no panoqo azah tsü, “Ampe akütsüniu shekha, kuqhokiphe mpe lo ado bekütha shipüa keu, Apusho Ghulhu lo,

¹¹ kughou Israelmi kümtsü no Ampeu nongu Lhou no kishetsü keu-a lo ighini keno, Israelmi kümtsü no chikulupu shi nongu no Ayezah hipau phisüni.

¹² Kiptimi, totimi, atianuli, eno no aphughi lo kachenami kümtsü kukumqo no ti chilupe, eno Ampeu nongu Lhou sümsani keu ithi no Ayezah hipau pape pelo.

¹³ Pano tianuli khunono Ayezah hipau mtha keno, tipaqo ghi chilu pelo, eno nongu no Jordan katha iku ngoniye akeu yeghi lo xüake tivilo, panongu ghi Ampeu nongu Lhou sümsa nani.”

Israel Sakipheu Joshua

¹⁴ Ampeu no Moses vilo pi, “O kithi tsala ye kupunuvae. I no Joshua süküsü shiveni ke pa kusasü nokujo kuposhukulu phiki lo ighilo.” Moses ngo Joshua pama no kuposhukulu phiki lo ilove.

¹⁵ Ampeu no khüngküsü tsükucho lono aphiki lo ipeghi, eno aphiki kulaghi lo puthugho luve.

¹⁶ Ampeu no Moses vilo pi, “No ye o puasüqo gholo züuveni keu do tovae. Tithiu timi hipaqo ye panongu no iloche keu yeghi lo I milive no inami lhouqo mllauve nani, eno I no pano sasü puloshoqhi shikeu kubove nani.

¹⁷ Tipani I mlo kighide panongu shou ikughi no panoqo pheve nani, panongu launo I gi kughove nani, tileno panongu ye kütsaleve nani. Panongu shou alhoksa ngo shiluküsa kutomo ikughi nani, eno panongu no pi nani, ‘Alhoksa hipaqo ni shou ikughi akeu ye, ni Lhou no ni gholo kühave kehu keshea?’

¹⁸ Ikemu tipa ghuloki lo I no panoqo launo I gi küsüve nani, kughengu panongu no alhoksa kümtsü shino kütau lhouqo mllauve ke.

¹⁹ “Tighenguno itehi ale hipau yelo eno Israelmi shika lo. Hi no I ghenguno Israelmi shou thopi shipenike panoqo shika lo.

²⁰ Kughou I no pano puasü lau tushoqhi ketoi panongu sasü akichhizü ngo akhingozü no qowu akeu yeghi lo iloghini, eno panongu no achuqupu chunishi ke thaqhü chuno atha pubeiveni keno, panongu ye tsüghüsü kütau lhouqo mllauve nani, eno I milive no Iw puloshoqhi kubove nani.

²¹ Eno kughou alhoksa ngo shiluküsa kutomo panongu shou ikughini keno, ale hipau no pano shou thopi shinani (kughengu ale hipau ye kümsüma mono pano tianuli gholo ache nani). Kughengu I no panongu sailo chekeu yeghi lo panongu ye kiu shive nani keno, ishi nomu Ni ye ithi ani.”

²² Ikehu tipani no Moses no ale hipau yepe eno Israelmi shikave.

²³ Eno Ampeu no Nun nu Joshua süküsü shino pa vilo pi, “Akumto shilo eno amlo mtolo, kughengu nono Israelmi sasü I no tushoqhi keu yeghi lo ilo nani, eno I no o gholo anani.”

²⁴ Moses no kaku lo Ayezah hipau ashekha kutolo yeve kethiu,

²⁵ pa no Levimi, Ampeuw Puloshoqhi bohu kipemi vilo pi,

²⁶ “Ayezah kaku hipau ikhipe Ampeu nongu Lhouw Puloshoqhi bohu phivilo qhilo, tishianguno tino Paw timiqo shou thopi shinani.

²⁷ Kughengu panongu ye kishi kuthovi eno hekibidemi keno, I no ithi ani. I no xüaphi lo thotsü nongu ye Ampeu hebide chenike I no thive kethiu ye kishita hebide nani kelae!

²⁸ Alagha lo sakiphemi ngo kijemi kümtsü I zülo hekütsü lo, I no hipaqo pesü panongu vilo pini, eno panongu shou thopi shipenike kungugha ngo ayeghi kusüni.

²⁹ I no ithi anike I no thive kethiu nongu ye kixikila shinani eno I no azah tsükeu lono tsüghüve nani. Hithiu alhoksa no nongu shou ikughi nani, kughengu nongu no Ampeu zülo kiu no alhoksa keno shinani, eno tino Pa loghu xukutho nani.”

Moses Le

³⁰ Tishino Moses no Israelmi kümtsü lau ale hipau lo atsathi ashekha kutolo phisüpe piye: