ZAKINIU 30 - Sumi Naga CL (Re-edited) Bible (BSI)

Xaide eno Akipimi Qhikütsü

¹ “Kughou I no nongu zülo qhitsü akeu kükümgha eno müsüini keu hi kümtsü nongu shou ikughini, eno Ampeu Alhou no nongu hape shiyeqo gholo puwuve keu-a lono ti kümsü luni keno,

² nongu eno no tianuli no Ampeu lau ideighi no nongu mlo eno angulho kuchopu pesü hi ishi tsala lo I no azah nongu tsü akeu pelu aye,

³ tileno Ampeu nongu Lhou no angukümgha nongu tsüchile nani, eno Pa no apanagha shiyeqo dolo nongu hapuwuve keu amlo ighiqhiyive no sachile ighi nani.

⁴ Nongu hape ayeghi cheku lo puwuve aghimu tilauno Ampeu nongu Lhou no nongu sawo hekütsü nani.

⁵ Ampeu nongu Lhou no nongu puasüqo mheghi yeghi lo nongu saghi no nongu pelo tile ngope nani. Eno Pa no nongu puasüqo nguno alau kinikülü ngo atianuli kughuko tsü nani.

⁶ Ampeu nongu Lhou no nongu eno no polo kughukomi mlo kishekimthe nani, tishikeu lono nongu no amlo eno angulho kuchopu pesü Ampeu nongu Lhou kimiye eno xülu nani.

⁷ Ampeu nongu Lhou no hi müsüini keu kümtsü no ghümi khunono nongu ghime keno, tipaqo shou pukuve tsü nani.

⁸ Nongu no itaghi Pa gholu kithe eno ishi tsala lo I no azah tsü akeu kümtsü pelu nani.

⁹ Nongu no mlakeu thokha lo Ampeu nongu Lhou no kinikülü kupukuno shi nongu tsü nani; ti ye nongu tianuli kughuko, pichepighi lhoxü, eno tüxatini lo kümgha tsü nani. Pa no amlokiqi lono nongu puasüqo kinikülü kupukuno shitsü ketoi, itaghi amlokiqi shi nongu lau kinikülü kupukuno shitsü nani.

¹⁰ Ikemu nongu ye Ampeu nongu Lhou gholu eno Ayezah Kaku hipau lo Pa zakütsü ngo akhuaye yepüa keqo papelo, eno nongu mlo eno angulho kuchopu pesü Pa lau ideighi lo.

Aküxü ngo Akithi Kishekulu

¹¹ “Kughengu ishi tsala lo hi azakütsü I no nongu tsü akeu ye ighono kushokütsü momu tokümlapu kumoe.

¹² Ti ye atsütsü lo ani püzü, ‘Nino ti chilu no papeni kehu khuu no ni züqhushi atsütsü lo ikuno süghi tsüni kea?’ ipi kepu vehu kumoe.

¹³ Momu ti ye azüghi tüxau ani püzü, ‘Nino ti chilu no papeni kehu khuu no ni züqhushi azüghi katha wuno süghi tsüni kea?’ ipi kepu vehu kumoe.

¹⁴ Ikemu atsa huye nongu phivilo ani. Ti ye nongu kichi lo eno nongu mlo lo ani, ikehu nongu ye shilu nani.

¹⁵ “Julo, ishi tsala lo I no nongu zülo aküxü ngo akivipu, eno akithi ngo alhoksa qhitsü ani.

¹⁶ Tsala ishi tsala lo I no Ampeu nongu Lhou zakütsü nongu tsü akeu nongu no papelu eno nongu no Pa kimiye, Pa gholu eno Pa zakütsü, akhuaye eno pimheye kümtsü pelu aye, nongu ye xülu nani eno kughuko luno nongu no ngoniye akeu yeghi lo Ampeu nongu Lhou no kümghatsü nani.

¹⁷ Ikemu nongu no hebide eno initsü mono kütau lhouqo mlla nike tsüghüve aye,

¹⁸ I no ishi tsala lono nongu kütüghü anike nongu ye mtsüqheino kütsave nani. Nongu ye Jordan katha iku ngoniye akeu yeghi lo ado kushuo xümla nani.

¹⁹ Ishi tsala lo I no nongu zülo aküxü ngo akithi, kükümgha ngo müsüini keu qhitsü ani, eno atsütsü ngo ayeghi pelo thopi shipenike küsü ani. Tighenguno aküxü kishelu lo, tishianguno nongu eno no polo kughukomi ye xülu nani,

²⁰ Ampeu nongu Lhou kimiyelu, Pa tsa chilu no Pa süijelu nani. Kughengu Pa no nongu küxü ke, eno no puasü Abraham, Isaac, eno Jacob lau tushoqhi keu yeghi lo axükushu nongu tsü nani.