ZAKINIU 3 - Sumi Naga CL (Re-edited) Bible (BSI)

Akükau Og Theqhive

¹ “Tithiu ningu no tsüghüsü Bashan lo iqho. Ikelo Bashan kükau Og no paw timi kümtsü hekütsüpe ningu sasü aghü shinike Edrei lo ighi.

² Ikemu Ampeu no I vilo pi, ‘Pa msa kevilo kughengu I no pa eno paw timi ngo ayeghi kümtsü o tsüvae. Nono Amorimi Heshbon kükau Sihon lau shike toi, pa lau ghi shinani.’

³ Ampeu ni Lhou no Bashan kükau Og ningu u lo süvetsü eno ningu no milakhimu poka pemono pithive.

⁴ Tile ningu no paw mishighüna lhotsügho kümtsü luvetsü, ningu no lumo keu lakhimu kühave, ti ye Bashan lo Og kükaqha, Argob qha kümtsü ke.

⁵ Mishighüna hi kümtsü aliwo qhemghai, khagho, eno aküptasü kumto akeqo. Tile aphu putu sümo keu ghi kutomo ae.

⁶ Ningu no Heshbon kükau Sihon lau shike toi ti kümtsü kütsave, eno kiptimi, totimi ngo atianuli pithi khavetsü.

⁷ Ikemu pichepighi ngo tinhemgha ye ningu no hakho pewuve.

⁸ Tipa ghuloki lo ningu no Jordan kukuu Amorimi kükau kini launo ayeghi, Arnon Khila lono Hermon Toghi kutolo luvetsü

⁹ (Sidonmi no Hermon pesü Sirion piche eno Amorimi no Senir piche).

¹⁰ Atoqa yeghi lo mishighüna kümtsü, Gilead ngo Bashan qha kümtsü, tino Og kükaqha lo mishighüna Salecah ngo Edrei kutolo nino luvetsü.

¹¹ (Rephaim lagha lo ghükulumi gholo Bashan kükau Og likhi ache. Pa lüpa ye ayi lüpa, ti ye Ammonmi yeghi lo Rabbah lo anike kumo? Ti ye akushulau aunhekipshe chighiküthü tüxa, akijelau no aunhekipshe tsügho.)

¹² “Kughou ningu no aghakhu tipau qhasülu keno, I no Arnon Khila mtsü lo Aroer akeu lono Gilead ato yeghi tüxa eno tile mishighüna akeqo ishi pesü Reuben ngo Gad lagha tsüve.

¹³ Gilead tüxa eno Og kükaqha Bashan kümtsü, ti ye Argob qha, pesü Manasseh lagha tsüve. Tipa gholono Og kükaqha, ghi panongu tsüve ke. (Ti Bashan yeghi pesü Rephaim yeghi ipi cheni.

¹⁴ Manassehmi Jair no Argob qha, ti ye Bashan lono Geshur ngo Maacah lughi kuto, kümtsü luvetsü, eno tipa qhalo aphuqo pa je kiqi lono Havvoth-jair kuvetsü, ti ye ishi kutolo tishi chephi.)

¹⁵ I no Gilead pesü Makhir tsüve,

¹⁶ Reuben ngo Gad lagha no Gilead lughi lono Arnon Khila kutolo tsüve eno aghuthu ye akhila mta lono kothasü Jabbok ghoki lo Ammonmi lughi kutolo ke;

¹⁷ Jordan ghoki no aghuthu shino Arabah ghike, ti ye Chinnereth lono Arabah Züghi, Amti Züghi eno kipelau Pisgah pukhuphi kutolo ke.

¹⁸ “Tipa ghuloki lo, I no nongu azah tsü, ‘Ampeu nongu Lhou no ayeghi hipau pesü nongu tsüvae. Ikemu now aghütomi kümtsü aghü nanu xapu nongu thiküzümi Israelmi züuno Jordan katha ikulo.

¹⁹ Nongu nipu, atianuli eno atsüaqu (I no ithi anike nongu ye atsüaqu kutomo anie) likhino I no nongu tsükeu phughiqo lo ngoveni,

²⁰ ti ye Ampeu no nongu kulho qhitsü ketoi no thiküzümi kulho qhitsü moke kutolo. Tishino panongu no Jordan kukuu Ampeu no tsükeu yeghi lo ngolu khave kethiu no nongu ghi pütüta mheghi I no tsükeu lo idewoni.

²¹ Tipa ghuloki lono I no Joshua azah tsü, ‘Ampeu o Lhou no akükau pama lau kiu shi keno, o nhethi no ithuluvae. Nono kathawu keu kükaqha kümtsü lau Ampeu no tishi nani.

²² Panongu msa kevilo, kughengu Ampeu o Lhou no o züqhushi aghüshi nani.’

Moses ye Canaan lo Ilomlave

²³ “Tipa ghuloki lo I no Ampeu qhüiniju,

²⁴ ‘O Ampeu Alhou, No ye itehi no O kighiche eno akumto pesü O qeu piyethu aphie. Kughengu Ow akümzapu kümla Nono shi aketoi kungugha lo eno ayeghi lo alhou khuu no shikulupu kea?

²⁵ Kimiyeno I pelo katha iku Jordan kukuu ayeghi kivi, ti ato yeghi kivi ngo Lebanon ithulu pelo.’

²⁶ Ikemu nongu ghenguno Ampeu no I shou axuideve kehu I tsa ini tsümoe, eno I vilo pi, ‘Tavae; hipa vehu ye I vilo pikithe kevilo.

²⁷ Pisgah kütsüqa lo ikuno kulolau, kipelau, ahuu, eno apeu küdau o nhethi no juluve lo, kughengu no ye Jordan katha ikumoae.

²⁸ Joshua pichebe lo, pa hakutho eno shikumto lo, kughengu pa no timi hipaqo sakipheu shino ayeghi qhasü lunike wu nani.’

²⁹ Ikehu ningu no Beth-peor ghüngü lo akhila lo ngove.