ZAKINIU 29 - Sumi Naga CL (Re-edited) Bible (BSI)

Moab lo Puloshoqhi Shikithe

¹ Horeb lono Ampeu no Israelmi sasü puloshoqhi shikeu gholo itaghi Moab yeghi lono Ampeu no Moses azah tsüno panoqo sasü puloshoqhi shikithe.

² Moses no Israelmi kümtsü kukütsü no pi, “Ampeu no nongu zülono Egypt lo Pharaoh ngo pa qemi eno pa ghakhu shou kiu shikeno ithuluvae.

³ Nongu nhethi no pekuju kije, amchipu eno akichiqhipu kümla ithuluvae.

⁴ Ikemu ishi kutolo Ampeu no vethalu kepu mlo, anhethi eno akini nongu tsümoe.

⁵ I no asayeqha lo ampe lhobidi nongu sasü ighivae, ikemu nongu phimini ngo apukhuqho ye puxüve mphie.

⁶ Nongu ye asho chumphi, atsaizü momu aji kümka shomphi, tishikeu lono nongu no Ni ye Ampeu nongu Lhou kepi ithi peniye ke.

⁷ Kughou nongu no a-a hipau lo ighi keno, Heshbon kükau Sihon ngo Bashan kükau Og pama no ningu sasü aghü shiniye ighi. Ikemu ningu no pama theqhive.

⁸ Ningu no pama yeghi luvetsü no Reuben ngo Gad laghami eno Manasseh lagha tüxa kijeve tsüe.

⁹ Tighenguno puloshoqhi hipau lo akeu tsa kümtsü papelo, eno nongu kümla thokha lo tolu nani.

¹⁰ “Ishi nongu kümtsü Ampeu nongu Lhou zülo puthugho ani: alagha lo akütsü, sakiphemi, hiyampemi, Israel lo kiptimiqo,

¹¹ no tianuli, anipu, nongu ghazü lo kachenami, nongu sü kighemi, eno azü kipemi.

¹² Nongu ye Ampeu nongu Lhou sasü puloshoqhi shinike ishi hile puthugho ani,

¹³ tishianguno Pa no nongu lau eno no puasü Abraham, Isaac, eno Jacob lau tushoqhi ketoi ishi tsala lono nongu pesü Paw timi shino Pa no nongu Lhou shiniye ke.

¹⁴ Ni ye nongu likhi sasü puloshoqhi shi anike kumoe,

¹⁵ ikemu ishi tsala lo khunoqo hile Ampeu ni Lhou zülo puthugho ani, eno khunoqo hile ningu gholo küha keno, kümtsü sasü ashoqhi shi ani.

¹⁶ “Ningu no kishi Egypt lo xüche eno shiyeqo ghakhu vechesü ighi keno nongu no ithi ani.

¹⁷ Panongu gholo aphikümqhüpu thime, asüatu julho, ghükayi eno ameshoyi julhoqo nongu no ithuluvae.

¹⁸ Tigheno tsükhüi lo, tikumo aye nongu dolo kiptimi totimi na, alagha ashiaye namu khami no Ampeu launo tsüghüve no shiye tipaqo lhou mllauve nosa, eno nongu dolo tüghükupu eno khumtsai ke xathi pithi kepu sü kuhu aghi nosake tsükhüi lo.

¹⁹ Milakhi no hi puloshoqhi lo yepüa keu chilu no pa ampi kümghatsü ghi, ‘I no kuthovi ghi xüani kemu, ni ye sükusho qholo anie,’ ipi aghi aye, hitoi kemi ye akivimi eno alhoksami kümtsü aphiphishi joleve nani.

²⁰ Ampeu ye titoi kemi kipimi qhitsümo nani, Pa mlo kighide ngo anhekushu no pa shou ikughi nani, kaku hipau lo müsüini keu kümtsü pa shou pukutsü nani, eno atsütsü qholono pa je ikhivetsü nani.

²¹ Ayezah kaku hipau lo müsüini keu kiqi lono Ampeu no Israel laghami kümtsü zülono pa ghimeni ke kichephe nani.

²² Tiqheli akiniu lo nongu tianuli ngo aghakhu kushuo lono ighi kemi inami no Ampeu no kishi aghakhu hipau ghime eno küsükini pesü pishipuju keno ithulu püzü ishi pi nani—

²³ aghakhu kümtsü amichu ngo amti no chhitoivae, kiumu shosümo eno ipeghimoe, atsüni mu ipeghimoe; hi ye Ampeu no Pa loghu lono Sodom ngo Gomorrah eno Admah ngo Zeboiim kütsakungo keshivae—

²⁴ tile shiye kümtsü no ishi pi nani, ‘Ampeu ye kushiye axuide aghakhu hipau lau hitoi shi kea?’

²⁵ Tileno timiqo no pi nani, ‘Ti ye panongu no Ampeu pano puasü Lhou no Egypt lono panoqo saipeghi kelono puloshoqhi shikeu panongu no pemove kehue,

²⁶ eno panongu no mthakeu lhou, Ampeu no panongu tsümo keu qeuve eno mllauve ke.

²⁷ Tighenguno Ampeu mlo kighide no ayeghi hipau shou ikughi, eno kaku hipau lo müsüini keu kümtsü süghi ke.

²⁸ Ampeu no Pa mlo kighide kije lono aghakhu hipau lono panongu nhüpe itehi ayeghi kütau panongu no akeu lo vesüve.’

²⁹ “Tuqhou thimeqo ye Ampeu ni Lhouw ke, ikemu thime pephe piyeve keqo no alhokupuju ningu eno ni tianuliqo salae, tishianguno ningu pelo Ayezah hipau lo akeu thokha shipeniye ke.