ZAKINIU 28 - Sumi Naga CL (Re-edited) Bible (BSI)

Aghokulu Kükümgha

¹ “Nongu no Ampeu nongu Lhou gholu eno ishi tsala lo I no azah nongu tsü akeu kümtsü tsaqüi pelu aye, Pa no ayeghi lo shiye akeqo kümtsü nguno akiqheu lo nongu süqhe nani.

² Nongu no Ampeu nongu Lhou gholu aye kükümgha hi kümtsü nongu shou ikughi nani.

³ Nongu ye aphughi lo eno aluza lo kükümgha ithulu nani.

⁴ Nongu polo ikighi tianuli, alu lo tüxatini, atsüaqu eno pichepighi lhoxü kümtsü kughuko luno kükümgha ithulu nani.

⁵ Now tüxatini eno abiale kümghatsü nani.

⁶ Now ikipe ikulo lo kümtsü kümghatsü nani.

⁷ “Ampeu no aghümi nongu leighi kemi nongu zülono theqhive tsü nani. Panongu no ala lakhi lono nongu leighi namu ala tsüni lono pove nani.

⁸ Ampeu no nongu biale kümghatsü eno no kümla küghütha kümtsü kümghatsü nani. Pa no nongu tsü akeu yeghi lo nongu kümghatsü nani.

⁹ Nongu no Ampeu nongu Lhou zakütsü gholu eno Pa pulou lo cheche aye, Pa no tushoqhi ketoi nongu pesü Pa kimthe timiqo shinani.

¹⁰ Ayeghi lo ashiaye kümtsü no nongu ye Ampeu no kulu kemie pi ithi nani eno nongu jumsa nani.

¹¹ Ampeu no nongu puasüqo tsünike tushoqhi keu yeghi lo kinikülü kupukuno shi nongu tsü nani, no tianuli kughuko tsü, pichepighi lhoxü lo eno tüxatini kümgha tsü nani.

¹² Ampeu no Pa küakini ki nongu lau khaqhitsü nani, atsütsü lono atusho achipi lono tsütsüghu piqitsü nani, eno nongu kümla kümtsü kümghatsü nani, tishikeu lono nongu ye shiye kutomo lau püna nani ikemu kütami launo nalumo nani.

¹³ Ishi tsala lo I no Ampeu zakütsü nongu tsü akeqo nongu no tsaqüi papelu aye, Ampeu no nongu pelo ashomhi kumono akütsü shipe nani, nongu ye iku nani kethono iqighimo nani,

¹⁴ nongu no tipaqo lono tsüghüsü ajeu piyiu wumo eno alhou kütauqo qemo aye, tishi tsü nani.

Hekibide Ghenguno Müsüini

¹⁵ “Ikemu ishi tsala lo Ampeu nongu Lhou zakütsü eno akhuaye I no azah nongu tsü akeqo nongu no gholumo eno pape move aye, müsüini keu hi kümtsü nongu shou ikughi nani.

¹⁶ Nongu ye aphughi lo eno aluza lo müsüinive kemi shi nani.

¹⁷ Now tüxatini eno abiale ye müsüinive nani.

¹⁸ Nongu polo ikighi tianuli, alu lo tüxatini, atsüaqu tikughuko, eno pichepighi loji lo ati kümtsü müsüinive nani.

¹⁹ Now ikipe ikulo kümtsü müsüinive nani.

²⁰ “No kümla lhoksa eno Ampeu milive ke ghenguno, nongu kütsave eno püghave moke kutolo Ampeu no nongu kümla küghütha kümtsü lo müsüini, kübangü keu eno amlo shikümka keu süghitsü nani.

²¹ Nongu no ilo ngoniye akeu yeghi lono nongu püghave moke kutolo Ampeu no püsa nongu gholo puwutsü nani.

²² Ampeu no kitixeküsü jeli, aghakimki, atsala külü, züha, akushu mülhü pesü tüxatini ghaqhive tsükeu vecheo nongu ghime nani. Nongu pithive moke kutolo hipaqo no nongu haqhi nani.

²³ Nongu shou atsütsü no alazayi toive, eno nongu qhou ayeghi no ayi toive nani.

²⁴ Ampeu no nongu ghakhu lo tsütsüghu pesü amkhu shive tsü nani. Nongu pithive moke kutolo atsütsü lono ayeghimkhu ghuqhi nani.

²⁵ “Ampeu no nongu ghümi pelo nongu shou toluvepe nani. Nongu no ala lakhi lono panoqo lewu nani ikemu ala tsüni lono panongu zülono kuhapo nani. Ayeghi lo kükaqha akeu kümtsü no nongu shou kiu shiani keno ithulupe thüghüi nani.

²⁶ Nongu no thive kelo asükumo ye aghau ngo tüghashiqo no chuve nani eno tipaqo shikümsa no hapuponi kemi kühave nani.

²⁷ Ampeu no Egyptmi shou shi ketoi nongu phimpi lo amishe pukutsü nani, no phimpi lo apiyi, ayiko küsü, eno akumtho ipeghi no shipivi mlape nani.

²⁸ Ampeu no nongu shiküghüzüve nani, anhethi kighicheve tsü eno kübangü keu nongu shou pukutsü nani.

²⁹ Nongu ye puchomghü lo ghi anhethi kighichemi toi kükauve nani eno no kümla lo tokulu shimo nani. Nongu qhasüve eno ishokibe pükaqhi nani, eno khunomu nongu kuphumo nani.

³⁰ Nongu no anipu inisü nani, ikemu kütami no li shipüthave nani. Nongu no aki shipe qhinani, ikemu tile ngolumo nani. Nongu no atsailu chinani ikemu tipa xathi chumo nani.

³¹ Nongu zülono no mishitsü ghiqhi nani, ikemu nongu ye ashi chumla nani. Nongu zülono now khurha sünhe sawuve nani, ikemu nongu tsüchile monani. No mbeqo pesü nongu ghümi tsüve nani, ikemu khunomu nongu kuphumo nani.

³² Nongu no ju apülaghi no tianuli ye kütami tsüve nani. Eno ghulo atsütsü nongu tianuli ideighini mala juanie pi nongu nhethi khoive nani.

³³ Nongu no akaveshi tüxatini mlaphe keu kümtsü nongu no ithimo keu shiye no luvetsü nani, eno nongu qodaqhi kijipüsa nani,

³⁴ eno nongu nhethi no ithulu akeu ghime no nongu pelo izüuvepe nani.

³⁵ Ampeu no vimlakeu mishe pesü nongu pukhu lo puku tsünani, tino nongu pukhu lono akütsüqa kutolo nhaluve nani.

³⁶ “Ampeu no nongu eno no puasüqo no mthakeu ghakhu lo nongu eno no kükau hapuwuve nani. Tilauno nongu no asüatu lhouqo qeuve nani.

³⁷ Ampeu no khile nongu puwuveni keno, ashiaye tipaqo gholo nongu ghili akümsapu, ahole, eno atichepu shi kügha nani.

³⁸ Nongu no apiti kutomo yisü nani ikemu aghulo likhi ghilehu nani, kughengu tülhaqu no chuvetsü nani.

³⁹ Nongu no atsailu chi no tucho nani, ikemu atsaithi xolumo momu atsaizü sholumo nani, kughengu apithe no atsaibo tsavetsü nani.

⁴⁰ No ghakhu kümtsü lo olive sübo ipeghi nani, ikemu nongu ye olive thazü peitha lumo nani, kughengu olive lothi no pithi ixive nani.

⁴¹ Nongu no atianuli lho nani, ikemu panongu ye now shimo nani, kughengu panongu ye akughumi shi küghape wuve nani.

⁴² Nongu sübo eno axabo kümtsü pithe-ninga no tsathave nani.

⁴³ Nongu gholo kachenami akemi no nongu nguno qhemghai ikuve nani, eno nongu ye chuninhei kitheve nani.

⁴⁴ Pano no nongu püna nani ikemu nongu ye pano püna kepu küha nani. Pano no akütsü shiuve nani eno nongu no ashomhi shi nani.

⁴⁵ “Nongu no Ampeu nongu Lhou gholumo eno Pa zakütsü ngo akhuaye papemo kehu müsüini keu hi kümtsü nongu shou ighi nani, eno nongu kütsave moke kutolo nongu gholo anani.

⁴⁶ Hipaqo no nongu eno nongu polo kughukomi shou alholo amchipu eno akümzapu shinani.

⁴⁷ Nongu no alovi eno amloqi qhiyi Ampeu qemo kehu, nongu no thokha thime pofushi auve kehu,

⁴⁸ nongu ye amzü-atüghü, aphi kümsa, eno tüqütügha lono no ghümi, Ampeu no nongu lau puwu niye akemi qeuve nani. Pa no nongu kütsave moke kutolo ayi kuokhasü nongu pipe nani.

⁴⁹ Alhuqu no yeiqighi keshi, ayeghi shekhau no Ampeu no shiye lakhi nongu shou saghi nani, nongu ye pano shiye tsa vethamla nani.

⁵⁰ Shiye tipau no ayiküsa shinani eno layemi mu gihumo nani, momu itimi kipimi mu qhitsümo nani.

⁵¹ Panongu no nongu tsüaqu no ati piti keqo ngo now tüxatini chukhave tsü nani eno nongu kütsakungo nani. Panongu no nongu pühave moke kutolo now athi, atsaizü, thazü, amishi, ambe eno aneqo kiumu qhitsü mono luvetsü nani.

⁵² “Panongu no nongu phughi kümtsü khasü luve nani, eno nongu no pükhübe chekeu aliwo qhemghai putu püakeu kümtsü ikiqive nani. Ampeu nongu Lhou nongu tsükeu yeghi lo panongu no nongu phughi kümtsü lo nongu khasüve nani.

⁵³ No ghümi no khasü luve no nongu pishipuju akelo, nongu no Ampeu tsükeu tianuli heqhichu nani.

⁵⁴ Nongu dolo timi ighono akümtshau eno kithikiyi keu timiu ghi pa thiküzüu momu pa no kimiye chekeu nipu momu pa no püxü püakeu tianuli sasü achuqupu kije chumo nani.

⁵⁵ Aghümi no aphughi khasüve no pishipuju akelo, pa ye kiumu chukepu kühave kehu pa nu heqhipe chu akeu shi panongu sasü kije chumo nani.

⁵⁶ Nongu gholo totimi shishe akümtshau eno kithikiyi kelauno apukhu mu ayeghi lo neqhi jumphi keu huno li kimi eno atianuli launo achuqupu süchile luve nani.

⁵⁷ No ghümi no aphughi khasü luve no nongu pishipuju akelo, li no chukepu kühave kehu apunu lo anu küzükeu nha eno li no punu keu tianuli ghi küsüuno chuve nani.

⁵⁸ “Kaku hipau lo Ayezah yepüakeu kümtsü nongu no amikucho shi papemo, eno Ampeu nongu Lhouw akichiqhipu eno akümzapu je sümsamo aye,

⁵⁹ Ampeu no nongu shou eno no tianuli shou paküta keu püsa, shipivimla keu eno akümsapu küsü pukutsü nani.

⁶⁰ Egypt lo küsü nongu no msa chekeu kümtsü Pa no nongu shou süghi kithe nani.

⁶¹ Ayezah kaku hipau lo yepüa mo keu küsü eno kitixeküsü jeli kümtsü Ampeu no nongu kütsave moke kutolo nongu lau puwu nani.

⁶² Inahuu nongu ye atsütsü lo ayepu jehi ikowove kemu aghulo likhive nani, kughengu nongu no Ampeu nongu Lhou gholu moveke.

⁶³ Ampeu no amlo kiqishi nongu lau akivi mla eno ikowolu peke toi itaghi Pa no amlo kiqishi nongu kütsave nani. Nongu no ngoniye akeu yeghi lono nongu nhüjove nani.

⁶⁴ “Ampeu no ayeghi halau no halau kutolo ashiaye jeli gholo nongu apanagha haleve nani, eno tilau nongu ye asüatu lhou, khikhi nongu na no puasüqo namu mtha keno, tipaqo mllauve nani.

⁶⁵ Shiye hipaqo gholo nongu ye iqüghai mla nani, eno nongu pukhu ghenguno akulhokiqhi-a küha nani, Ampeu no akümsa mlo, lajupu kühave keu nhethi, eno aghüthiküsü mlo tsü nani.

⁶⁶ Nongu ye ighüqhiyi xünani. Putho pucho nongu ye msaichi eno aküxü pülümo ghi xünani.

⁶⁷ Nongu mlo lo msaichi keu no chhitoive kehu, eno nongu nhethi no ithulu akeu jupe nongu no inaqhe atsütsü ishi pi nani, ‘Avelau shi aghike aye!’ eno kijili atsütsü ishi pi nani, ‘Inaqhe shi aghike aye!’

⁶⁸ Nongu ye khilemu Egypt lo idewomo nanie pi I no tushoqhi püakeu Ampeu no zükilu lono Egypt lo nongu sachilewo nani; eno tilau nongu no nongu ampi pesü aqüaxemi shi aghümi vilo jesü nani, ikemu khunomu qhümo nani.”