ZAKINIU 27 - Sumi Naga CL (Re-edited) Bible (BSI)

Ebal Toghi lo Akiptia

¹ Moses ngo Israel sakiphemi no timiqo azah tsü, “Ishi tsala lo I no azah nongu tsü akeu kümtsü papelo.

² Nongu no Jordan katha iku Ampeu nongu Lhou no ayeghi tsü akeu lo iloluke tsalani no nongu ye atupha kije ghope qhino aghani pesü nudape qhilo.

³ Ampeu nongu puasü Lhou no piqhike toi, Pa no akichhizü ngo akhingozü no qowu akeu yeghi lo nongu no ngoluve kemtsa, atupha tipaqo shou Ayezah hi kümtsü yepe qhilo.

⁴ Nongu no Jordan katha ikuve kethiu, I no ishi tsala lo hi nongu vilo pi akeu tuquqo pesü Ebal Toghi lo mushuda pe qhilo.

⁵ Tile atu pesü Ampeu nongu Lhou lau akümlla-khache shiqhelo. Ayi nhemgha kiumu tipaqo lo peitha moni.

⁶ Atu yethamo keu pesü Ampeu nongu Lhou lau akümlla-khache shiqhelo eno tileno Ampeu lau akipti kümllagho pesü tsülo,

⁷ tileno külakishi kümllagho pesü tsüno tilehi no chulo, eno Ampeu nongu Lhou zülono alovilo.

⁸ Atuqo lo Ayezah tsa lothi kümtsü mtsümishei yepuku lo.”

Ebal Toghi lono Müsüini

⁹ Tishino Moses ngo Levimi achinemi no Israelmi kümtsü vilo pi, “O, Israel, iqünhei shino inilo. Ishi tsala lono nongu ye Ampeu nongu Lhou timiqo shivae.

¹⁰ Tighenguno ishi tsala lo I no azakütsü ngo akhuaye nongu tsü akeu kümtsü papelo.”

¹¹ Tipani Moses no Israelmi ghutu,

¹² “Nongu no Jordan katha ikuve kethiu, hipaqo no Gerizim Toghi lo puthugho no timiqo kümgha tsüni: Simeon, Levi, Judah, Issachar, Joseph eno Benjamin.

¹³ Eno müsüini kepu shi hipaqo no Ebal Toghi lo puthughoni: Reuben, Gad, Asher, Zebulun, Dan eno Naphtali.

¹⁴ Levimi no Israelmi kümtsü lau ighamku atsa hipaqo pini:

¹⁵ “‘Khukhumu Ampeu zülo aphikümqhüpu, kütshakügha shi küsüuno asüatu momu ayi julho mla püaghi keu ye müsüinivae.’ Eno timi kümtsü no ‘Amen,’ ipi khochileni.

¹⁶ “‘Khukhumu pa puaza gihumo keu ye müsüinivae.’ Eno timi kümtsü no ‘Amen,’ ipini.

¹⁷ “‘Khukhumu pa kisüghüu lughitu ikhi kiqeve keu ye müsüinivae.’ Eno timi kümtsü no ‘Amen,’ ipini.

¹⁸ “‘Khukhumu anhechemi laghi sabideve keu ye müsüinivae.’ Eno timi kümtsü no ‘Amen,’ ipini.

¹⁹ “‘Khukhumu kachenami, mighimi, eno chimemi chipiu shipühave tsükeu ye müsüinivae.’ Eno timi kümtsü no ‘Amen,’ ipini.

²⁰ “‘Khukhumu papu nipu sazüve no papu shipüthave keu ye müsüinivae.’ Eno timi kümtsü no ‘Amen,’ ipini.

²¹ “‘Khukhumu lhoxü sasü ipa keu ye müsüinivae.’ Eno timi kümtsü no ‘Amen,’ ipini.

²² “‘Khukhumu pa chelimi sazüve keu ye müsüinivae.’ Eno timi kümtsü no ‘Amen,’ ipini.

²³ “‘Khukhumu pa nikishiu sazüve keu ye müsüinivae.’ Eno timi kümtsü no ‘Amen,’ ipini.

²⁴ “‘Khukhumu tuqhouno pa kisüghüu ghiqhive keu ye müsüinivae.’ Eno timi kümtsü no ‘Amen,’ ipini.

²⁵ “‘Khukhumu pimimo kemi ji pele nike külügho lukeu ye müsüinivae.’ Eno timi kümtsü no ‘Amen,’ ipini.

²⁶ “‘Khukhumu Ayezah hi kümtsü papemo keu ye müsüinivae.’ Eno timi kümtsü no ‘Amen,’ ipini.