ZAKINIU 26 - Sumi Naga CL (Re-edited) Bible (BSI)

Amsüu Xathi eno Chighi Saje

¹ “Ampeu nongu Lhou no nongu mheghi shitsü akeu yeghi lo ngoluve eno tsaqüi xüsüve kethiu,

² nongu ye Ampeu no nongu tsü akeu yeghi lo pekighi xathi amsüu hami ashoghi lo süno Ampeu nongu Lhou no Pa je ghenguno kishetsü ke-a lo pewuni.

³ Tipa ghuloki lo achineu shi akeu lau pewu no pa vilo pini, ‘Ishi no I no Ampeu o Lhou lau shuphe anike ni ye Ampeu no ni puasüqo tsünike tushoqhi keu yeghi lo iloghi luvae.’

⁴ Tishino achineu no nongu u lono ashoghi ikhipe Ampeu nongu Lhou kümlla khache lo qhiveni.

⁵ “Tishino Ampeu zülono nongu no ishi pini: ‘I puasü ye kupokichemi Arameami. Pa ye Egypt lo iqi no tilau thilishi ache, ikemu tilauno pa ye shiye kije, akumto, eno anoghi shive.

⁶ Egyptmi no ningu kijipüsa eno jukünatha no anguka shi ningu pelo mlape.

⁷ Tileno nino Ampeu ni puasü Lhou lau ighamku eno Pa no ni sütsa chilu tsüno ni ghime, aka-agha, eno qhaküsü ithulu tsüe.

⁸ Ampeu no Pa küka kumto u sükhope amchipu ngo akümzapu eno kümsapu kümla pephe no Egypt lono ni xaphelue.

⁹ Pa no hilau akichhizü ngo akhingozü qowu akeu yeghi lo ni saghie.

¹⁰ Ikehu julo, O Ampeu, Nono I tsükeu yeghi lo amsüu xathi itehi I no peighi ani.’ Tishino nongu no Ampeu Alhou zülo qhitsü no Pa mllani.

¹¹ Ampeu nongu Lhou no thokha akivi pesü tsüke ghenguno nongu eno no kibolomi, Levimi eno kachenami no gholo akemi sasü alovilo.

¹² “Kughou ampe aküthüu, ti ye Levimi, kachenami, mighimi, eno chimemi lau chighi saje tsü chekeu mpe, lo nongu no thokha lo chighi saje tsüve no panongu ghapiqive tsüni keno,

¹³ Ampeu nongu Lhou zülono ishi pini, ‘Ni ye akimthe saje I ki lono ikhiphevae, eno Nono azah I tsüke toi ti pesü Levimi, kachenami, mighimi, eno chimemi tsüvae. Ni ye O yezah lakhimu hebidemo momu kümsümave moe.

¹⁴ I no mloqa akelomu ni ye chighi saje chumoe, I no mithe move namu kiumu ikhilumoe, momu tipau lono ikhipe kithimi lau akümllagho tsümoe. Ni ye Ampeu I Lhou gholu eno Nono azah tsükeu kiqi lono thokha shivae.

¹⁵ Kungugha lo O kimthe-a lono jupiqi no Ow timi Israelmi, eno Nono ni puasüqo lau piqhike toi ni tsükeu hi akichhizü ngo akhingozü qowu akeu yeghi kümgha tsülo.’

¹⁶ “Ishi tsala lono Ampeu nongu Lhou no akhuaye eno pimheye hipaqo nongu pelo pape penike azah tsü ani. Tigheno nongu mlo kuchopu eno angulho kuchopu pesü ti shilo.

¹⁷ Ishi tsala lono nongu no Ampeu ye no Lhou kepi piphevae eno Pa gholu no akhuaye, azakütsü, eno pimheye kümtsü pape nike shuphevae.

¹⁸ Eno ishi tsala lono Ampeu no piqhike toi nongu ye Paw akughupu mheghi kepi shuphevae, eno Pa zakütsü kümtsü pelu lo pivae.

¹⁹ Pa no lhokeu shiye kümtsü nguno akiqheu shi shekiqhe, ajuaje, eno agigihupu lo nongu süqhe nani, eno Pa no piqhike toi nongu ye Ampeu nongu Lhou zülo akimthe timi shinani.”