ZAKINIU 25 - Sumi Naga CL (Re-edited) Bible (BSI)

¹ “Tsala mikini atsa kügha nike küghaki lo wukelo, küghaküthau no lakhi no pimiha eno lakhiu no küqüve keu pitsü kelo,

² küqüve keu ghaqhi nike küghaküthau no pa zülo timi tipau pelo ihozü peni, eno akipimi kiqi lono ghaqhini.

³ Ghuthu lhobidi kutolo likhi pa helu nani, tinguno alau ye hemoni; tinguno alau heqhi aye, aqha zülono pa shikujo niae.

⁴ “Amshitsü no athi qophe akelo tipau kichi khavetsü moni.

Amu Akithiu lau Shikepu

⁵ “Athiazü kini kümtsa aki lakhi lo xüache no milakhi no anu shimono thive aye, pa nipu achimeu huye abolomi nguno kütami sasü küla moni. Akithiu thiküzüu no anipu shi li valuve no akithiu kümlapu saje shini.

⁶ Eno li no anu atüghüu punu keu ye akithiu nu kepi kihini, tishianguno Israel lo ti akithiu je pühave monani.

⁷ Ikemu akithiu thiküzüu no li sasü küghüna nishimo aye, li no aphughi lo sakiphemi zülo wuno pini, ‘I kimi thiküzüu ye pa mu je Israel lo apenike pulo amoe; pa ye akimi thiküzüu kümlapu I lau mlatsü amoe.’

⁸ Tileno sakiphemi no pa kuno pütsa kelo, pa no tsüikhomo, ‘Ni ye li sasü küghüna moe,’ ipi aye,

⁹ akithiu nipu no sakiphemi zülono pa pukhukuqho xajove tsüno pa gi lo müsüte pukuni eno ishi pini, ‘Timi khuu no pamu lagha shiqhetsü moni keno, pa lau hitoi shilo.’

¹⁰ Eno Israel lo timi tipau lagha pesü, ‘Apukhuqho xaluve tsükeu lagha’ ipi kuni.

Mudomgho Yezah

¹¹ “Timi kini kichighi akelo lakhi nipu no li kimi saphu niye lakhiu phighü tsüqü luvetsü aye,

¹² li u micheve tsülo. Kimiye qhiyi li shou jupuku moni.

¹³ “Now süqhu lo akimghitu ajeli kini, akijeu ngo aghulou pemoni.

¹⁴ Nongu kilo akimghi bohu ajeli kini, akijeu ngo aghulou qhimoni.

¹⁵ Kuchou eno achipi kimghitu peni, tishianguno Ampeu nongu Lhou no tsü akeu yeghi lo nongu ye axüshulu nani.

¹⁶ Kughengu titoi pishikiqhi kümla shikeu ye Ampeu nongu Lhou zülo aphikümqhüpu ke.

¹⁷ “Nongu no Egypt lono ipeche kelo Amalekmi no nongu lau kiu shikeno kümsülu lo.

¹⁸ Nongu no qeive eno akulhoshi chekelo, panongu no nongu leighi, eno Alhou msa mono athiu chekemi ghiqhive tsüe.

¹⁹ Tighenguno, kughou Ampeu Alhou no nongu mheghi shitsü akeu yeghi lo nongu no ngoluve eno no sükümxa lo akemi launo akulho qhiluni keno, nongu ye ayeghi lono Amalekmi shipühaveni; hi kümsüma kevilo.