ZAKINIU 24 - Sumi Naga CL (Re-edited) Bible (BSI)

Aküghüxa Yezah

¹ “Timi lakhi no totimi lakhi sasü külakupu shiveni, ikemu li lolo achipi shimo keu ithulu kehu li ju aghaqi mlave no aküghüxa shepe li tsüve no pa ki lono li puwuveni,

² tithiu li no kütami kilo külauveni,

³ eno akimi akiniu ghi li juni shimove no aküghüxa shepe li tsüve no pa ki lono li puwuve, momu ti akimi akiniu huno thive aye,

⁴ akimi atüghüu ye itaghi li sasü küghüna kithe moni, kughengu li ye kitiqeve ake eno ti ye Ampeu nongu Lhou zülo ye aphikümqhüpu ke. Ampeu nongu Lhou no nongu tsü akeu yeghi lo kixikila xine tikithipu ye shimoni.

Mudomgho Yezah

⁵ “Timi lakhi no anileshi külakupu shipe akelo, pa ye aghükishi momu aqoaho kümlapu lo peitha moni. Pa ye ampe lakhi kutolo aki lo ngono pa nipu lopivi tsüni.

⁶ “Timi khuu pelomu athi kütsüghü tuqu pesü aküna shoqhi shimoni, kughengu ti ye aküxü pesü ashoqhi shi akeu thoke.

⁷ “Timi lakhi no pa thiküzümi Israelmi kügha sawo pa qemi shipe momu jeve aye, ti aküpkau huye pithive lo. Hitoi alhoksa ye nongu dolono ikhiveni.

⁸ “Apügha küsü vehulo Levi chinemi no nongu vilo pikeu kiqi lono shinike pükapütsa lo. I no panoqo lau azah tsüke toi nongu ye ti shini.

⁹ Ampeu nongu Lhou no nongu sasü Egypt lono ipeghi kelo, Miriam shou kiu shive keno kümsülu lo.

¹⁰ “Nono o kisüghüu lau kiuala püna kelo, tipau züqhulo aküna shoqhi thime lunike pa kilo ilomoni.

¹¹ No ye khalau no ngoni eno pa no ti o lau süipeghini.

¹² Pa no kumlhomi shi aghi aye, no ye kijili lakhimu thime tipau qhiluve moni.

¹³ Khetsünhe iloche kemtsa pa tsüchileve lo, tishianguno pa pelo tipau uzü luno o kümghatsü pelo. Tino Ampeu nongu Lhou zülo achipi shi nani.

¹⁴ “Kumlhomi aqe kiqemi, ti ye Israelmi na, no phughi lo kachenami namu sapüsa moni.

¹⁵ Khetsünhe ilomphi lono tipa tsalani jume pa tsüveni (kughengu pa ye kumlhomi ke eno ti pükhüpe acheni), tikumo aye pa no Ampeu lau nongu ghenguno ighamku kelo nonguu no akipimi shive nani.

¹⁶ “Anuli kipimi ghenguno apunoqo pithi moni, eno apunoqo kipimi ghenguno anuli pithi moni. Timi kümtsü pütüta xine ghenguno thi masae.

¹⁷ “Kupokichemi eno mighimi chipiu luvetsü moni, eno chimemi launo aküna shoqhi aphimini lumoni,

¹⁸ ikemu nongu ye Egypt lo aqüaxemi shi ache eno Ampeu nongu Lhou no nongu xaphelu kepi kümsülu lo; tighenguno hitoi shilopi I no nongu azah tsü ani.

¹⁹ “Nongu no ghile hukelo, aghi kipiqhe hami kümsümave no alu lo qhive aye, ti lunike idehu moni. Ti ye kachenami, mighimi, eno chimemi ghenguno qhive tsüni, tishianguno nongu no mlakeu thokha lo Ampeu nongu Lhou no kümghatsü nani.

²⁰ Kughou nongu no olive xonike aloka lo hepukuni keno, akiniu aloka lo hepuku moni. Ti ye kachenami, mighimi, eno chimemi ghenguno qhive tsüni.

²¹ Nongu no atsaithi ghuthu lakhi xoluve kethiu akiniu xolu nike idewo moni. Ti ye kachenami, mighimi, eno chimemi ghenguno qhive tsüni.

²² Nongu ye Egypt lo aqüaxemi shi ache eno Ampeu nongu Lhou no nongu xaphelu kepi kümsülu lo; tighenguno hitoi shilopi I no azah nongu tsü ani.